Texts

Help

Select a text:
Bibliography
Select a chapter:
 1 revision
Associated topic(s): Soma sacrifice

Show parallels  Show headlines
Use dependency labeler
Chapter id: 15689
  • Click on a sentence to show its analysis
  • Keep the mouse pointer over a lemma to show its meanings.
śiro vā etad yajñasya yaddhavirdhānam prāṇā uparavāḥ // (1) Par.?
havirdhāne khāyante // (2) Par.?
tasmācchīrṣan prāṇāḥ // (3) Par.?
adhastāt khāyante // (4) Par.?
tasmād adhastāc chīrṣṇaḥ prāṇāḥ // (5) Par.?
rakṣohaṇo valagahano vaiṣṇavān khanāmīty āha // (6) Par.?
vaiṣṇavā hi devatayoparavāḥ // (7) Par.?
asurā vai niryanto devānām prāṇeṣu valagān nyakhanan // (8) Par.?
tān bāhumātre 'nvavindan // (9) Par.?
tasmād bāhumātrāḥ khāyante // (10) Par.?
idam ahaṃ taṃ valagam udvapāmi yaṃ naḥ samāno yam asamāno nicakhānety āha // (11) Par.?
dvau vāva puruṣau yaś caiva samāno yaś cāsamānaḥ // (12) Par.?
yam evāsmai tau valagaṃ nikhanatas tam evodvapati // (13) Par.?
saṃtṛṇatti // (14) Par.?
tasmāt saṃtṛṇṇā antarataḥ prāṇāḥ // (15) Par.?
na sambhinatti // (16) Par.?
tasmād asaṃbhinnāḥ prāṇāḥ // (17) Par.?
apo 'vanayati // (18) Par.?
tasmād ārdrā antarataḥ prāṇāḥ // (19) Par.?
yavamatīr avanayati // (20) Par.?
ūrg vai yavaḥ // (21) Par.?
prāṇā uparavāḥ // (22) Par.?
prāṇeṣv evorjaṃ dadhāti // (23) Par.?
barhir avastṛṇāti // (24) Par.?
tasmāl lomaśā antarataḥ prāṇāḥ // (25) Par.?
ājyena vyāghārayati // (26) Par.?
tejo vā ājyam // (27) Par.?
prāṇā uparavāḥ // (28) Par.?
prāṇeṣv eva tejo dadhāti // (29) Par.?
hanū vā ete yajñasya yad adhiṣavaṇe // (30) Par.?
na saṃtṛṇatti // (31) Par.?
asaṃtṛṇṇe hi hanū // (32) Par.?
atho khalu dīrghasome saṃtṛdye dhṛtyai // (33) Par.?
śiro vā etad yajñasya yaddhavirdhānam // (34) Par.?
prāṇā uparavā hanū adhiṣavaṇe jihvā carma grāvāṇo dantā mukham āhavanīyo nāsikottaravedir udaraṃ sadaḥ // (35) Par.?
yadā khalu vai jihvayā datsv adhikhādaty atha mukhaṃ gacchati // (36) Par.?
yadā mukhaṃ gacchaty athodaraṃ gacchati // (37) Par.?
tasmāddhavirdhāne carmann adhi grāvabhir abhiṣutyāhavanīye hutvā pratyañcaḥ paretya sadasi bhakṣayanti // (38) Par.?
yo vai virājo yajñamukhe dohaṃ veda duha evainām // (39) Par.?
iyaṃ vai virāṭ // (40) Par.?
tasyai tvak carmodho 'dhiṣavaṇe stanā uparavā grāvāṇo vatsā ṛtvijo duhanti somaḥ payaḥ // (41) Par.?
ya evaṃ veda duha evainām // (42) Par.?
Duration=0.13976883888245 secs.