Texts

yāvān puruṣa ūrdhvabāhus tāvatā veṇunā vimimīte // (1) Par.?

etāvad vai puruṣe vīryam // (2) Par.?

vīryeṇaivainaṃ vimimīte // (3) Par.?

trīn puruṣān prāñcaṃ mimīte caturas tiryañcam // (4) Par.?

tasmāt sapta puruṣān abhy agnicid annam atti trīn parastāt trīn avastād ātmā saptamaḥ // (5) Par.?

aratnimātraṃ pakṣayor upadadhāti prādeśamātraṃ pucche // (6) Par.?

puruṣeṇa vai yajñas saṃmitaḥ // (7) Par.?

yajñapuruṣā saṃmitam // (8) Par.?

tasmāt pakṣapravayāṃsi vayāṃsi // (9) Par.?

ṣaḍgavena kṛṣati // (10) Par.?

ṣaḍ vā ṛtavaḥ // (11) Par.?

ṛtubhir eva // (12) Par.?

tisrastisras sītās sampādayati // (13) Par.?

trivṛddhy agniḥ // (14) Par.?

tā dvādaśa sampadyante // (15) Par.?

dvādaśa māsās saṃvatsaraḥ // (16) Par.?

saṃvatsarasyaiva vidhām anuvidhīyate // (17) Par.?

atho ṛtubhir eva kṛṣṭvā saṃvatsare pratitiṣṭhati // (18) Par.?

iyaṃ vā agner atidāhād abibhet // (19) Par.?

saitad dviguṇaṃ kṛṣṭaṃ cākṛṣṭaṃ cākuruta // (20) Par.?

yat kṛṣṭaṃ cākṛṣṭaṃ ca bhavaty asyā anatidāhāya // (21) Par.?

atho dviguṇenaivāsyā vīryam udyacchate // (22) Par.?

etāvanto vai paśavo dvipādaś ca catuṣpādaś ca // (23) Par.?

tān etad agnau pratidadhāti // (24) Par.?

yad udīca utsṛjed rudrāya paśūn apidadhyād apaśus syāt // (25) Par.?

yad dakṣiṇā pitṛbhyo nidhūvet // (26) Par.?

yat pratīco rakṣāṃsi hanyuḥ // (27) Par.?

dakṣiṇā prācas sūryam abhy utsṛjati // (28) Par.?

sūryo vai paśūnāṃ prāṇaḥ // (29) Par.?

prāṇam evainān abhy utsṛjati // (30) Par.?

oṣadhīnām ṛgbhir oṣadhīnāṃ phalāni vapati // (31) Par.?

rūpeṇaivānnam avarunddhe // (32) Par.?

annasyānnasya vapati // (33) Par.?

sarvam evānnam avarunddhe // (34) Par.?

yasya na vapati tena vyṛdhyate // (35) Par.?

yasya na vapet tan manasā dhyāyet // (36) Par.?

tenaiva tad avarunddhe // (37) Par.?

caturdaśabhir vapati // (38) Par.?

sapta vai grāmyā oṣadhayaḥ saptāraṇyāḥ // (39) Par.?

tā evobhayīr avarunddhe // (40) Par.?

annam arkaḥ // (41) Par.?

arko 'gniḥ // (42) Par.?

arka evaitad arkaś cīyate // (43) Par.?

kṛṣṭe vapati // (44) Par.?

kṛṣṭe hy āśiṣṭham oṣadhayaḥ pratitiṣṭhanti // (45) Par.?

anusītaṃ prajātyai // (46) Par.?

dvādaśasu sītāsu vapati // (47) Par.?

dvādaśa māsās saṃvatsaraḥ // (48) Par.?

saṃvatsareṇaivāsmā annaṃ pacati // (49) Par.?