Texts

Help

Select a text:
Bibliography
Select a chapter:
 1 revision
Associated topic(s): agnicayana

Show parallels  Show headlines
Use dependency labeler
Chapter id: 16209
  • Click on a sentence to show its analysis
  • Keep the mouse pointer over a lemma to show its meanings.
medho vā eṣa paśūnāṃ yat kūrmaḥ // (1) Par.?
yat kūrmam upadadhāty etam evainaṃ medham abhisaṃjānānāḥ paśava upatiṣṭhante // (2) Par.?
jīvantam upadadhāti // (3) Par.?
sa hi medhyaḥ // (4) Par.?
catuṣpād bhavati // (5) Par.?
catasro diśaḥ // (6) Par.?
dikṣv eva pratitiṣṭhati // (7) Par.?
mahī dyauḥ pṛthivī ca na iti dyāvāpṛthivyor evaitayā rūpe dādhāra // (8) Par.?
dadhnā ca madhunā cābhyanakti // (9) Par.?
apāṃ vā eṣa oṣadhīnāṃ raso yan madhu // (10) Par.?
yan madhunābhyanakty apām evauṣadhīnāṃ rasam avarunddhe // (11) Par.?
medho vā eṣa paśūnām ūrg dadhi // (12) Par.?
yad dadhnābhyanakti paśūnām eva medha ūrjaṃ dadhāti // (13) Par.?
iṣṭakacid vā anyo 'gniḥ paśucid anyaḥ // (14) Par.?
yaj jīvantaṃ kūrmam upadadhāti tenaivainaṃ paśucitaṃ karoti // (15) Par.?
eṣa vai svargasya lokasyottamapadī // (16) Par.?
yathā kṣetravit prajānann añjasānyān nayaty evam evainam eṣa svargaṃ lokam abhinayati // (17) Par.?
viṣṇor nābhā agniś cetavyaḥ // (18) Par.?
yo 'nābhim agniṃ cinute yajamānasya nābhim anupraviśati // (19) Par.?
sa enaṃ nirdahati // (20) Par.?
eṣā vai viṣṇor nābhiḥ // (21) Par.?
yad ulūkhalam upadadhāti viṣṇor eva nābhā agniṃ cinute // (22) Par.?
audumbaraṃ bhavati // (23) Par.?
ūrg vā udumbaraḥ // (24) Par.?
ūrjam eva madhyato dadhāti yajamāne ca prajāsu ca // (25) Par.?
tasmān madhyataḥ prajā ūrg ūrjayati // (26) Par.?
prādeśamātraṃ bhavati // (27) Par.?
etāvatī hi viṣṇor nābhiḥ // (28) Par.?
vaiṣṇavyā karmaṇyayopadadhāti // (29) Par.?
karma hy etat kriyate // (30) Par.?
athaiṣokhā // (31) Par.?
ojo vā etad vīryaṃ saṃbhriyate // (32) Par.?
yad ukhauja eva vīryam avarunddhe // (33) Par.?
eṣāṃ vā etal lokānāṃ jyotir avarunddhe // (34) Par.?
jyotir madhyato dadhāti // (35) Par.?
madhyejyotiṣam agniṃ cinute // (36) Par.?
tasmān madhyato jyotir upāsate // (37) Par.?
sikatābhiḥ pūrayati svenāyatanena // (38) Par.?
agner vā etad vaiśvānarasya bhasma yat sikatāḥ // (39) Par.?
rūpeṇaiva vaiśvānaram avarunddhe // (40) Par.?
yad ūnām upadadhyāt kṣodhuko yajamānas syāt // (41) Par.?
pūrṇām upadadhāti // (42) Par.?
akṣodhuko yajamāno bhavati // (43) Par.?
anupadasvad annam atti // (44) Par.?
ghṛtena pūrayati // (45) Par.?
etad vā agneḥ priyaṃ dhāma yad ghṛtam // (46) Par.?
priyeṇaivainaṃ dhāmnā samardhayati // (47) Par.?
Duration=0.15770292282104 secs.