Texts

athedānīṃ kim vivakṣitavacanā mantrā utāvivakṣitavacanāḥ // (1) Par.?

kim arthaprakāśanena yāgasyopakurvanty utoccāraṇamātreṇeti // (2) Par.?

yady uccāraṇamātreṇa tadā na niyogato barhir devasadanaṃ dāmīty eṣa barhirlavane viniyujyeta // (3) Par.?

abhidhānena cet prakaraṇena vijñātāṅgabhāvo nānyatropakartuṃ śaknotīty antareṇāpi vacanaṃ barhirlavana eva viniyujyeteti // (4) Par.?

tad evam avagacchāma uccāraṇamātreṇaivopakurvantīti // (5) Par.?

kutas tadarthaśāstrāt // (6) Par.?

yad abhidhānasamartho mantras tatraivainaṃ śāstraṃ nibadhnāti // (7) Par.?

uruprathā uru prathasveti puroḍāśaṃ prathayatīti vacanam idam anarthakaṃ yady arthābhidhānenopakurvanti // (8) Par.?

athoccāraṇamātreṇa tato vaktavyo viniyoga uktaś ca // (9) Par.?

ato nārthābhidhānena // (10) Par.?

yathā sākṣaḥ puruṣaḥ pareṇa cen nīyate nūnam akṣibhyāṃ na paśyatīti gamyate // (11) Par.?

nanv arthavādārthaṃ bhaviṣyatīti cet // (12) Par.?

na hi yena vidhīyate tasya vākyaśeṣo 'rthavāda ity uktam // (13) Par.?

na ca nirapekṣeṇa vihite 'rthavādena kiṃcid api prayojanaṃ kriyate // (14) Par.?

ato nārthavādārthaṃ vacanam // (15) Par.?

tathābhyādānasamarthā mantrā udāharaṇam // (16) Par.?

liṅgād evādāne prāptā vacanena vidhīyante tāṃ caturbhir ādatta iti // (17) Par.?

catuḥsaṃkhyārtham iti cen na samuccayaśabdābhāvāt // (18) Par.?

tathemām agṛbhṇan raśanāmṛtasyety aśvābhidhānīm ādatta ity udāharaṇam // (19) Par.?

raśanādāne prāptasya raśanādāna eva śāstraṃ viniyojakam // (20) Par.?

tad vivakṣitārthatve na ghaṭeteti // (21) Par.?

nanu gardabharaśanāṃ parisaṃkhyāsyati // (22) Par.?

na śaknoti parisaṃkhyātam // (23) Par.?

parisaṃcakṣāṇo hi svārthaṃ ca jahyāt parārthaṃ ca kalpeta prāptaṃ ca bādheta // (24) Par.?

tasmān na vivakṣitavacanā mantrāḥ // (25) Par.?

ato na pramāṇaṃ barhirdevasadanaṃ dāmīty asya rūpaṃ barhirlavane viniyogasya // (26) Par.?