Texts

śrīmārkaṇḍeya uvāca / (1.1) Par.?

tato gacchen mahārāja somatīrthamanuttamam / (1.2) Par.?

yatra somastapastaptvā nakṣatrapathamāsthitaḥ // (1.3) Par.?

tatra tīrthe tu yaḥ snāyādācamya vidhipūrvakam / (2.1) Par.?

kṛtajāpyo raviṃ dhyāyet tasya puṇyaphalaṃ śṛṇu // (2.2) Par.?

ṛgvedayajurvedābhyāṃ sāmavedena bhārata / (3.1) Par.?

japato yatphalaṃ proktaṃ gāyatryā cātra tatphalam // (3.2) Par.?

tatra tīrthe tu yo bhaktyā brāhmaṇān bhojayecchuciḥ / (4.1) Par.?

tena samyagvidhānena koṭirbhavati bhojitā // (4.2) Par.?

pādukopānahau chatraṃ vastrakambalavājinaḥ / (5.1) Par.?

yo datte vipramukhyāya tasya tatkoṭisaṃmitam // (5.2) Par.?

sahasraṃ tu sahasrāṇāmanṛcāṃ yastu bhojayet / (6.1) Par.?

ekasya mantrayuktasya kalāṃ nārhati ṣoḍaśīm // (6.2) Par.?

evaṃ tu bhojayet tatra bahvṛcaṃ vedapāragam / (7.1) Par.?

śākhāntargam athādhvaryuṃ chandogaṃ vā samāptigam // (7.2) Par.?

agnihotrasahasrasya yatphalaṃ prāpyate budhaiḥ / (8.1) Par.?

samaṃ tadvedaviduṣā tīrthe somasya tatphalam // (8.2) Par.?

bhojayedyaḥ śataṃ teṣāṃ sahasraṃ labhate naraḥ / (9.1) Par.?

ekasya yogayuktasya tatphalaṃ kavayo viduḥ // (9.2) Par.?

saṃnirudhyendriyagrāmaṃ yatrayatra vasen muniḥ / (10.1) Par.?

tatratatra kurukṣetraṃ naimiṣaṃ puṣkarāṇi ca // (10.2) Par.?

tasmātsarvaprayatnena grahaṇe candrasūryayoḥ / (11.1) Par.?

saṃkrāntau ca vyatīpāte yogī bhojyo viśeṣataḥ // (11.2) Par.?

saṃnyāsaṃ kurute yastu tatra tīrthe yudhiṣṭhira / (12.1) Par.?

vimānena mahābhāgāḥ sa yāti tridivaṃ naraḥ // (12.2) Par.?

somasyānucaro bhūtvā tenaiva saha modate // (13.1) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe somatīrthamāhātmyavarṇanaṃ nāmaikonacatvāriṃśadadhikaśatatamo 'dhyāyaḥ // (14.1) Par.?