Texts

kṛtasvapakṣaparapakṣopagrahaḥ kāryārambhāṃścintayet // (1.1) Par.?

mantrapūrvāḥ sarvārambhāḥ // (2.1) Par.?

taduddeśaḥ saṃvṛtaḥ kathānām aniḥśrāvī pakṣibhir apyanālokyaḥ syāt / (3.1) Par.?

śrūyate hi śukasārikābhir mantro bhinnaḥ śvabhir apyanyaiśca tiryagyonibhir iti // (3.2) Par.?

tasmān mantroddeśam anāyukto nopagacchet // (4.1) Par.?

ucchidyeta mantrabhedī // (5.1) Par.?

mantrabhedo hi dūtāmātyasvāminām iṅgitākārābhyām // (6.1) Par.?

iṅgitam anyathāvṛttiḥ // (7.1) Par.?

ākṛtigrahaṇam ākāraḥ // (8.1) Par.?

tasya saṃvaraṇam āyuktapuruṣarakṣaṇam ā kāryakālād iti // (9.1) Par.?

teṣāṃ hi pramādamadasuptapralāpāḥ kāmādir utsekaḥ pracchanno 'vamato vā mantraṃ bhinatti // (10.1) Par.?

tasmād rakṣen mantram // (11.1) Par.?

mantrabhedo hyayogakṣemakaro rājñastadāyuktapuruṣāṇāṃ ca // (12.1) Par.?

tasmād guhyam eko mantrayeta iti bhāradvājaḥ // (13.1) Par.?

mantriṇām api hi mantriṇo bhavanti teṣām apyanye // (14.1) Par.?

saiṣā mantriparamparā mantraṃ bhinatti // (15.1) Par.?

tasmān nāsya pare vidyuḥ karma kiṃciccikīrṣitam / (16.1) Par.?

ārabdhārastu jānīyur ārabdhaṃ kṛtam eva vā // (16.2) Par.?

naikasya mantrasiddhir asti iti viśālākṣaḥ // (17.1) Par.?

pratyakṣaparokṣānumeyā hi rājavṛttiḥ // (18.1) Par.?

anupalabdhasya jñānam upalabdhasya niścitabalādhānam arthadvaidhasya saṃśayacchedanam ekadeśadṛṣṭasya śeṣopalabdhir iti mantrisādhyam etat // (19.1) Par.?

tasmād buddhivṛddhaiḥ sārdham adhyāsīta mantram // (20.1) Par.?

na kaṃcid avamanyeta sarvasya śṛṇuyān matam / (21.1) Par.?

bālasyāpyarthavadvākyam upayuñjīta paṇḍitaḥ // (21.2) Par.?

etan mantrajñānam naitan mantrarakṣaṇam iti pārāśarāḥ // (22.1) Par.?

yad asya kāryam abhipretaṃ tatpratirūpakaṃ mantriṇaḥ pṛcchet kāryam idam evam āsīt evaṃ vā yadi bhavet tat kathaṃ kartavyam iti // (23.1) Par.?

te yathā brūyustat kuryāt // (24.1) Par.?

evaṃ mantropalabdhiḥ saṃvṛtiśca bhavati iti // (25.1) Par.?

neti piśunaḥ // (26.1) Par.?

mantriṇo hi vyavahitam arthaṃ vṛttam avṛttaṃ vā pṛṣṭā anādareṇa bruvanti prakāśayanti vā // (27.1) Par.?

sa doṣaḥ // (28.1) Par.?

tasmāt karmasu ye yeṣvabhipretāstaiḥ saha mantrayeta // (29.1) Par.?

tair mantrayamāṇo hi mantrasiddhiṃ guptiṃ ca labhate iti // (30.1) Par.?

neti kauṭilyaḥ // (31.1) Par.?

anavasthā hyeṣā // (32.1) Par.?

mantribhistribhiścaturbhir vā saha mantrayeta // (33.1) Par.?

mantrayamāṇo hyekenārthakṛcchreṣu niścayaṃ nādhigacchet // (34.1) Par.?

ekaśca mantrī yatheṣṭam anavagrahaścarati // (35.1) Par.?

dvābhyāṃ mantrayamāṇo dvābhyāṃ saṃhatābhyām avagṛhyate vigṛhītābhyāṃ vināśyate // (36.1) Par.?

tat triṣu caturṣu vā kṛcchreṇopapadyate // (37.1) Par.?

mahādoṣam upapannaṃ tu bhavati // (38.1) Par.?

tataḥ pareṣu kṛcchreṇārthaniścayo gamyate mantro vā rakṣyate // (39.1) Par.?

deśakālakāryavaśena tvekena saha dvābhyām eko vā yathāsāmarthyaṃ mantrayeta // (40.1) Par.?

karmaṇām ārambhopāyaḥ puruṣadravyasampad deśakālavibhāgo vinipātapratīkāraḥ kāryasiddhir iti pañcāṅgo mantraḥ // (41.1) Par.?

tān ekaikaśaḥ pṛcchet samastāṃśca // (42.1) Par.?

hetubhiścaiṣāṃ matipravivekān vidyāt // (43.1) Par.?

avāptārthaḥ kālaṃ nātikrāmayet // (44.1) Par.?

na dīrghakālaṃ mantrayeta na teṣāṃ pakṣīyair yeṣām apakuryāt // (45.1) Par.?

mantripariṣadaṃ dvādaśāmātyān kurvīta iti mānavāḥ // (46.1) Par.?

ṣoḍaśa iti bārhaspatyāḥ // (47.1) Par.?

viṃśatim ityauśanasāḥ // (48.1) Par.?

yathāsāmarthyam iti kauṭilyaḥ // (49.1) Par.?

te hyasya svapakṣaṃ parapakṣaṃ ca cintayeyuḥ // (50.1) Par.?

akṛtārambham ārabdhānuṣṭhānam anuṣṭhitaviśeṣaṃ niyogasampadaṃ ca karmaṇāṃ kuryuḥ // (51.1) Par.?

āsannaiḥ saha karmāṇi paśyet // (52.1) Par.?

anāsannaiḥ saha pattrasampreṣaṇena mantrayeta // (53.1) Par.?

indrasya hi mantripariṣadṛṣīṇāṃ sahasram // (54.1) Par.?

sa taccakṣuḥ // (55.1) Par.?

tasmād imaṃ dvyakṣaṃ sahasrākṣam āhuḥ // (56.1) Par.?

ātyayike kārye mantriṇo mantripariṣadaṃ cāhūya brūyāt // (57.1) Par.?

tatra yadbhūyiṣṭhā brūyuḥ kāryasiddhikaraṃ vā tat kuryāt // (58.1) Par.?

kurvataśca / (59.1) Par.?

nāsya guhyaṃ pare vidyuśchidraṃ vidyāt parasya ca / (59.2) Par.?

gūhet kūrmevāṅgāni yat syād vivṛtam ātmanaḥ // (59.3) Par.?

yathā hyaśrotriyaḥ śrāddhaṃ na satāṃ bhoktum arhati / (60.1) Par.?

evam aśrutaśāstrārtho na mantraṃ śrotum arhati // (60.2) Par.?