Texts

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 8922

Click on a sentence to show its analysis
Keep the mouse pointer over a lemma to show its meanings.

vikṣepapratiṣedhārtham ekatattvāvalambanaṃ cittam abhyaset / (1.1) Par.?

yasya tu pratyarthaniyataṃ pratyayamātraṃ kṣaṇikaṃ ca cittaṃ tasya sarvam eva cittam ekāgraṃ nāsty eva vikṣiptam / (1.2) Par.?

yadi punar idaṃ sarvataḥ pratyāhṛtyaikasminn arthe samādhīyate tadā bhavaty ekāgram ity ato na pratyarthaniyatam / (1.3) Par.?

yo 'pi sadṛśapratyayapravāhena cittam ekāgraṃ manyate tasyaikāgratā yadi pravāhacittasya dharmas tadaikaṃ nāsti pravāhacittaṃ kṣaṇikatvāt / (1.4) Par.?

atha pravāhāṃśasyaiva pratyayasya dharmaḥ / (1.5) Par.?

sa sarvaḥ sadṛśapratyayapravāhī vā visadṛśapratyayapravāhī vā pratyarthaniyatatvād ekāgra eveti vikṣiptacittānupapattiḥ / (1.6) Par.?

tasmād ekam anekārtham avasthitaṃ cittam iti / (1.7) Par.?

yadi ca cittenaikenānanvitāḥ svabhāvabhinnāḥ pratyayā jāyerann atha katham anyapratyayadṛṣṭasyānyaḥ smartā bhavet anyapratyayopacitasya ca karmāśayasyānyaḥ pratyaya upabhoktā bhavet / (1.8) Par.?

kathaṃcit samādhīyamānam apy etad gomayapāyasīyanyāyam ākṣipati / (1.9) Par.?

kiṃca svātmānubhavāpahnavaścittasyānyatve prāpnoti / (1.10) Par.?

katham / (1.11) Par.?

yad aham adrākṣaṃ tat spṛśāmi yac cāsprākṣaṃ tat paśyāmy aham iti pratyayaḥ sarvasya pratyayasya bhede sati pratyayiny abhedenopasthitaḥ / (1.12) Par.?

ekapratyayaviṣayo 'yam abhedātmāham iti pratyayaḥ katham atyantabhinneṣu citteṣu vartamānaṃ sāmānyam ekaṃ pratyayinam āśrayet / (1.13) Par.?

svānubhavagrāhyaścāyam abhedātmāham iti pratyayaḥ / (1.14) Par.?

na ca pratyakṣasya māhātmyaṃ pramāṇāntareṇābhibhūyate / (1.15) Par.?

pramāṇāntaraṃ ca pratyakṣabalenaiva vyavahāraṃ labhate / (1.16) Par.?

tasmād ekam anekārtham avasthitaṃ ca cittam / (1.17) Par.?

yasya cittasya avasthitasyedaṃ śāstreṇa parikarma nirdiśyate tat katham // (1.18) Par.?

Duration=0.037932872772217 secs.