Texts

devayajanaṃ joṣayante / (1.1) Par.?

sa yadeva varṣiṣṭhaṃ syāt taj joṣayeran yad anyad bhūmer nābhiśayīta / (1.2) Par.?

ato vai devā divam upodakrāman / (1.3) Par.?

devānvā eṣa upotkrāmati yo dīkṣate / (1.4) Par.?

sa sadeve devayajane yajate / (1.5) Par.?

sa yaddhānyad bhūmer abhiśayītāvaratara iva heṣṭvā syāt / (1.6) Par.?

tasmād yad eva varṣiṣṭhaṃ syāt tajjoṣayeran // (1.7) Par.?

tad varṣma sat samaṃ syāt / (2.1) Par.?

samaṃ sad avibhraṃśi syāt / (2.2) Par.?

avibhraṃśi satprākpravaṇaṃ syāt / (2.3) Par.?

prācī hi devānāṃ dik / (2.4) Par.?

atho udakpravaṇam / (2.5) Par.?

udīcī hi manuṣyāṇāṃ dik / (2.6) Par.?

dakṣiṇataḥ pratyucchritamiva syāt / (2.7) Par.?

eṣā vai dik pitṝṇām / (2.8) Par.?

sa yad dakṣiṇāpravaṇaṃ syāt kṣipre ha yajamāno 'muṃ lokamiyāt / (2.9) Par.?

tatho ha yajamāno jyog jīvati / (2.10) Par.?

tasmād dakṣiṇataḥ pratyucchritamiva syāt // (2.11) Par.?

na purastāddevayajanamātramatiricyeta / (3.1) Par.?

dviṣantaṃ hāsya tadbhrātṛvyamabhyatiricyate / (3.2) Par.?

kāmaṃ ha dakṣiṇataḥ syād evamuttarataḥ / (3.3) Par.?

etaddha tveva samṛddhaṃ devayajanaṃ yasya devayajanamātram paścātpariśiṣyate / (3.4) Par.?

kṣipre haivainam uttarā devayajyopanamati / (3.5) Par.?

iti nu devayajanasya // (3.6) Par.?

tad u hovāca yājñavalkyaḥ vārṣṇyāya devayajanaṃ joṣayitum aima / (4.1) Par.?

tatsātyayajño 'bravīt sarvā vā iyam pṛthivī devī / (4.2) Par.?

devayajanaṃ yatra vā asyai kvaca yajuṣaiva parigṛhya yājayediti // (4.3) Par.?

ṛtvijo haiva devayajanam / (5.1) Par.?

ye brāhmaṇāḥ śuśruvāṃso 'nūcānā vidvāṃso yājayanti saivāhvalaitan nediṣṭhamām iva manyāmaha iti // (5.2) Par.?

tacchālo vā vimitaṃ vā prācīnavaṃśam minvanti / (6.1) Par.?

prācī hi devānāṃ dik / (6.2) Par.?

purastādvai devāḥ pratyañco manuṣyān upāvṛttāḥ / (6.3) Par.?

tasmāt tebhyaḥ prāṅ tiṣṭhañjuhoti // (6.4) Par.?

tasmād u ha na pratīcīnaśirāḥ śayīta neddevānabhiprasārya śayā iti / (7.1) Par.?

yā dakṣiṇā dik sā pitṝṇām / (7.2) Par.?

yā pratīcī sā sarpāṇām / (7.3) Par.?

yato devā uccakramuḥ saiṣāhīnā / (7.4) Par.?

yodīcī dik sā manuṣyāṇām / (7.5) Par.?

tasmānmānuṣa udīcīnavaṃśām eva śālāṃ vā vimitaṃ vā minvanti / (7.6) Par.?

udīcī hi manuṣyāṇāṃ dik / (7.7) Par.?

dīkṣitasyaiva prācīnavaṃśā nādīkṣitasya // (7.8) Par.?

tāṃ vā etām pariśrayanti ned abhivarṣād iti / (8.1) Par.?

nveva varṣā / (8.2) Par.?

devānvā eṣa upāvartate yo dīkṣate / (8.3) Par.?

sa devatānāmeko bhavati / (8.4) Par.?

tira iva vai devā manuṣyebhyaḥ / (8.5) Par.?

tira ivaitad yat pariśritam / (8.6) Par.?

tasmāt pariśrayanti // (8.7) Par.?

tanna sarva ivābhiprapadyeta brāhmaṇo vaiva rājanyo vā vaiśyo vā / (9.1) Par.?

te hi yajñiyāḥ // (9.2) Par.?

sa vai na sarveṇeva saṃvadeta / (10.1) Par.?

devānvā eṣa upāvartate yo dīkṣate / (10.2) Par.?

sa devatānāmeko bhavati / (10.3) Par.?

na vai devāḥ sarveṇeva saṃvadante brāhmaṇena vaiva rājanyena vā vaiśyena vā / (10.4) Par.?

te hi yajñiyāḥ / (10.5) Par.?

tasmād yadyenaṃ śūdreṇa saṃvādo vindedeteṣām evaikam brūyād imamiti / (10.6) Par.?

vicakṣvemam iti vicakṣveti / (10.7) Par.?

eṣa u tatra dīkṣitasyopacāraḥ // (10.8) Par.?

athāraṇī pāṇau kṛtvā śālām adhyavasyati / (11.1) Par.?

sa pūrvārdhyaṃ sthūṇārājam abhipadyaitad yajur āhedam aganma devayajanam pṛthivyā yatra devāso ajuṣanta viśva iti / (11.2) Par.?

tadasya viśvaiśca devairjuṣṭam bhavati ye ceme brāhmaṇāḥ śuśruvāṃso 'nūcānāḥ / (11.3) Par.?

yadahāsya te 'kṣibhyām īkṣante brāhmaṇāḥ śuśruvāṃsas tad ahāsya tairjuṣṭam bhavati // (11.4) Par.?

yad v āha yatra devāso ajuṣanta viśva iti tadasya viśvair devair juṣṭam bhavati / (12.1) Par.?

ṛksāmābhyāṃ saṃtaranto yajurbhir iti / (12.2) Par.?

ṛksāmābhyāṃ vai yajurbhir yajñasyodṛcaṃ gacchanti / (12.3) Par.?

yajñasyodṛcaṃ gacchānīty evaitad āha / (12.4) Par.?

rāyaspoṣeṇa samiṣā mademeti / (12.5) Par.?

bhūmā vai rāyaspoṣaḥ / (12.6) Par.?

śrīrvai bhūmā / (12.7) Par.?

āśiṣam evaitad āśāste / (12.8) Par.?

samiṣā mademeti / (12.9) Par.?

iṣam madatīti vai tam āhur yaḥ śriyam aśnute yaḥ paramatāṃ gacchati / (12.10) Par.?

tasmād āha samiṣā mademeti // (12.11) Par.?