Texts

Help

Select a text:
Bibliography

Select a chapter:
1 revision
Show parallels Show headlines
Use dependency labeler

Chapter id: 17502

Click on a sentence to show its analysis
Keep the mouse pointer over a lemma to show its meanings.

Sūkta 1

asthād dyaur asthāt pṛthivy asthād viśvam idaṃ jagat / (1.1) Par.?

tiṣṭhanti parvatā ime sthāmann aśvā araṃsata // (1.2) Par.?

ya udānaḍ vyayane ya udānaṭ parāyaṇe / (2.1) Par.?

āvartanaṃ nivartanaṃ yo gopā api taṃ huve // (2.2) Par.?

āvṛto nyāvṛto 'bhyāvartanam āyanam / (3.1) Par.?

agneś catasra āvṛtas tābhiṣ ṭvā tarpayāmasi // (3.2) Par.?

jātavedo ni vartaya śataṃ te santv āvṛtaḥ sahasraṃ ta upāvṛtaḥ / (4.1) Par.?

tābhir enaṃ ni vartaya // (4.2) Par.?

Sūkta 2

adārasṛd bhavatu deva somāyam asmin yajñe maruto mṛḍatā naḥ / (5.1) Par.?

mā no vidad abhibhā mo aśastir mā naḥ prāpad ducchunā dveṣyā yā // (5.2) Par.?

yo adya daivyo vadho jighāṃsan na upāyati / (6.1) Par.?

yuvaṃ taṃ mitrāvaruṇāv asmad yāvayataṃ pari // (6.2) Par.?

itaś cāmutaś cāghaṃ varuṇa yāvaya / (7.1) Par.?

vi mahac charma yaccha varīyo yāvayā vadham // (7.2) Par.?

apendra prāco maghavann amitrān apāpāco abhibhūte nudasva / (8.1) Par.?

apodīco apa śūrādharāca urau yathā tava śarman madema // (8.2) Par.?

Sūkta 3

tena bhūtasya haviṣā punar ā pyāyatām ayam / (9.1) Par.?

jāyāṃ yām asmā avidan sā rasenābhi vardhatām // (9.2) Par.?

abhi vardhatāṃ prajayābhi rāṣṭreṇa vardhatām / (10.1) Par.?

iṣā sahasravīryāv imau stām anupakṣitau // (10.2) Par.?

tvaṣṭā jāyām ajanayat tvaṣṭāsyai tvāṃ patiṃ dadhau / (11.1) Par.?

tvaṣṭā sahasram āyūṃṣi dīrgham āyuṣ kṛṇotu vām // (11.2) Par.?

Sūkta 4

antarikṣeṇa patati viśvā bhūtāvacākaśat / (12.1) Par.?

śuno divyasyaitan mahas tasmā etena haviṣā juhomi // (12.2) Par.?

apsu te janma divi te sadhasthaṃ samudra ātmā mahimā te pṛthivyām / (13.1) Par.?

śuno divyasyaitan mahas tasmā etena haviṣā juhomi // (13.2) Par.?

ye trayaḥ kālakāñjā divi devā iva śritāḥ / (14.1) Par.?

tān sarvān ahva ūtaye 'smā ariṣṭatātaye // (14.2) Par.?

yaḥ puruṣaṃ hūrcchayasi śvā divyo avīrahā / (15.1) Par.?

taṃ tvāhaṃ brahmaṇā nude puruṣaṃ mā parā vadhīḥ // (15.2) Par.?

yaḥ piśaṅgo ayodaṃṣṭraḥ śvā divyaḥ pariplavaḥ / (16.1) Par.?

tasyāhaṃ nāma jagrabhāsmā ariṣṭatātaye ayaṃ no jīvatād iti // (16.2) Par.?

Sūkta 5

ayaṃ no nabhasas patiḥ saṃsphāno abhi rakṣatu / (17.1) Par.?

asamātiṃ gṛheṣu naḥ // (17.2) Par.?

tvaṃ no nabhasas pata ūrjaṃ gṛheṣu dhāraya / (18.1) Par.?

ā puṣṭam etv ā vasu // (18.2) Par.?

deva saṃsphāna sahasrāpoṣasyeśiṣe / (19.1) Par.?

tasya no dhehi tasya te bhakṣīmahi tasya te bhaktivāṃso bhūyāsma svāhā // (19.2) Par.?

Duration=0.11158800125122 secs.