Texts

so 'rodīd yad arodīt tad rudrasya rudratvaṃ prajāpatir ātmano vapām udakhidat // (1) Par.?

devā vai devayajanam adhyavasāya diśo na prājānan ityevamādīni samāmnātāraḥ samāmananti vākyāni // (2) Par.?

tāni kiṃ kaṃcid dharmaṃ pramimate uta neti bhavati vicāraṇā // (3) Par.?

tad abhidhīyate kriyā katham anuṣṭheyeti tāṃ vadituṃ samāmnātāro vākyāni samāmananti // (4) Par.?

tad yāni vākyāni kriyāṃ nāvagamayanti kriyāsaṃbaddhaṃ vā kiṃcid evam eva bhūtam artham anvācakṣate ruditavān rudro vapām uccikheda prajāpatir devā vai diśo na prajajñira ityevaṃjātīyakāni tāni kaṃ dharmaṃ pramimīran // (5) Par.?

athocyetādhyāhāreṇa vā vipariṇāmena vā vyavahitakalpanayā vā vyavadhāraṇakalpanayā vā guṇakalpanayā vā kaścid arthaḥ kalpayiṣyata iti // (6) Par.?

sa kalpyamānaḥ kaḥ kalpyeta rudraḥ kila rurodāto 'nyenāpi roditavyam // (7) Par.?

uccikhedātmavapāṃ prajāpatir ato 'nyo 'py utkhided ātmano vapām // (8) Par.?

devā vai devayajanakāle diśo na prajñātavanto 'to 'nyo 'pi diśo na prajānīyād iti tac cāśakyam iṣṭaviyogenābhighātena vā yad bāṣpanirmocanaṃ tad rodanam ity ucyate na ca tad icchāto bhavati // (9) Par.?

na ca kaścid ātmano vapām utkhidya tām agnau prahṛtya tata utthitena tūpareṇa paśuṇā yaṣṭuṃ śaknuyāt // (10) Par.?

na ca devayajanādhyavasānakāle kecid diśo muhyeyuḥ // (11) Par.?

ata eṣām ānarthakyam // (12) Par.?

tasmād evaṃjātīyakāni vākyāny anityānīty ucyante yady api ca nityāni tathāpi na nityam arthaṃ kurvanti iti // (13) Par.?

sa eṣa vākyaikadeśasyākṣepo na kṛtsnasya vākyasya // (14) Par.?

nanv ekadeśād vinā sākāṅkṣaḥ padasamūho na paryāptaḥ svasmai prayojanāyāta ākṣipta eveti // (15) Par.?

naivaṃ bhavati hi kaścit padasamūho yo 'rthavādebhyo vināpi vidadhāti kaṃcid arthaṃ yāni punas taiḥ saha saṃyujyārthāntare vartante tāny ekadeśākṣepeṇākṣipyante // (16) Par.?