Texts

oṃ mano hi dvividhaṃ proktaṃ śuddhaṃ cāśuddham eva ca / (1.1) Par.?

aśuddhaṃ kāmasaṃkalpaṃ śuddhaṃ kāmavivarjitam // (1.2) Par.?

mana eva manuṣyāṇāṃ kāraṇaṃ bandhamokṣayoḥ / (2.1) Par.?

bandhāya viṣayāsaktaṃ muktyai nirviṣayaṃ smṛtam // (2.2) Par.?

yato nirviṣayasyāsya manaso muktir iṣyate / (3.1) Par.?

tasmān nirviṣayaṃ nityaṃ manaḥ kāryaṃ mumukṣuṇā // (3.2) Par.?

nirastaviṣayāsaṅgaṃ saṃniruddhaṃ mano hṛdi / (4.1) Par.?

yadā yāty unmanībhāvaṃ tadā tat paramamadam // (4.2) Par.?

tāvad eva niroddhavyaṃ yāvaddhṛdi gataṃ kṣayam / (5.1) Par.?

etaj jñānaṃ ca mokṣaṃ ca ato 'nyo granthavistaraḥ // (5.2) Par.?

naiva cintyaṃ na cācintyam acintyaṃ cintyam eva ca / (6.1) Par.?

pakṣapātavinirmuktaṃ brahma sampadyate tadā // (6.2) Par.?

svareṇa saṃdhayed yogam asvaraṃ bhāvayet param / (7.1) Par.?

asvareṇa hi bhāvena bhāvo nābhāva iṣyate // (7.2) Par.?

tad eva niṣkalaṃ brahma nirvikalpaṃ nirañjanam / (8.1) Par.?

tad brahmāham iti jñātvā brahma sampadyate dhruvam // (8.2) Par.?

nirvikalpam anantaṃ ca hetudṛṣṭāntavarjitam / (9.1) Par.?

aprameyam anādyaṃ ca jñātvā ca paramaṃ śivam // (9.2) Par.?

na nirodho na cotpattir na vandyo na ca śāsanam / (10.1) Par.?

na mumukṣā na muktiś ca ity eṣā paramārthatā // (10.2) Par.?

eka evātmā mantavyo jāgratsvapnasuṣuptiṣu / (11.1) Par.?

sthānatrayād vyatītasya punarjanma na vidyate // (11.2) Par.?

eka eva hi bhūtātmā bhūte bhūte vyavasthitaḥ / (12.1) Par.?

ekadhā bahudhā caiva dṛśyate jalacandravat // (12.2) Par.?

ghaṭasaṃbhṛtam ākāśaṃ līyamāne ghaṭe yathā / (13.1) Par.?

ghaṭo līyeta nākāśaṃ tadvaj jīvo ghaṭopamaḥ // (13.2) Par.?

ghaṭavad vividhākāraṃ bhidyamānaṃ punaḥ punaḥ / (14.1) Par.?

tadbhagnaṃ na ca jānāti sa jānāti ca nityaśaḥ // (14.2) Par.?

śabdamāyāvṛto yāvat tāvat tiṣṭhati puṣkare / (15.1) Par.?

bhinne tamasi caikatvam ekam evānupaśyati // (15.2) Par.?

śabdākṣaraṃ paraṃ brahma yasmin kṣīṇe yad akṣaram / (16.1) Par.?

tad vidvān akṣaraṃ dhyāyed yadīcchecchāntim ātmanaḥ // (16.2) Par.?

dve vidye veditavye tu śabdabrahma paraṃ ca yat / (17.1) Par.?

śabdabrahmaṇi niṣṇātaḥ paraṃ brahmādhigacchati // (17.2) Par.?

grantham abhyasya medhāvī jñānavijñānatattvataḥ / (18.1) Par.?

palālam iva dhānyārthī tyajed grantham aśeṣataḥ // (18.2) Par.?

gavām anekavarṇānāṃ kṣīrasyāpy ekavarṇatā / (19.1) Par.?

kṣīravat paśyate jñānaṃ liṅginas tu gavāṃ yathā // (19.2) Par.?

ghṛtam iva payasi nigūḍhaṃ bhūte bhūte ca vasati vijñānam / (20.1) Par.?

satataṃ manthayitavyaṃ manasā manthānabhūtena // (20.2) Par.?

jñānanetraṃ samādāya cared vahnim ataḥ param / (21.1) Par.?

niṣkalaṃ nirmalaṃ ca śāntaṃ tad brahmāham iti smṛtam // (21.2) Par.?

sarvabhūtādhivāsaṃ ca yad bhūteṣu vasaty adhi / (22.1) Par.?

sarvānugrāhakatvena tad asmy ahaṃ vāsudeva tad asmy ahaṃ vāsudeva // (22.2) Par.?