Texts

pratigṛhya tato 'strāṇi prahṛṣṭavadanaḥ śuciḥ / (1.1) Par.?

gacchann eva ca kākutstho viśvāmitram athābravīt // (1.2) Par.?

gṛhītāstro 'smi bhagavan durādharṣaḥ surair api / (2.1) Par.?

astrāṇāṃ tv aham icchāmi saṃhāraṃ munipuṃgava // (2.2) Par.?

evaṃ bruvati kākutsthe viśvāmitro mahāmuniḥ / (3.1) Par.?

saṃhāraṃ vyājahārātha dhṛtimān suvrataḥ śuciḥ // (3.2) Par.?

satyavantaṃ satyakīrtiṃ dhṛṣṭaṃ rabhasam eva ca / (4.1) Par.?

pratihārataraṃ nāma parāṅmukham avāṅmukham // (4.2) Par.?

lakṣākṣaviṣamau caiva dṛḍhanābhasunābhakau / (5.1) Par.?

daśākṣaśatavaktrau ca daśaśīrṣaśatodarau // (5.2) Par.?

padmanābhamahānābhau dundunābhasunābhakau / (6.1) Par.?

jyotiṣaṃ kṛśanaṃ caiva nairāśyavimalāv ubhau // (6.2) Par.?

yaugaṃdharaharidrau ca daityapramathanau tathā / (7.1) Par.?

pitryaṃ saumanasaṃ caiva vidhūtamakarāv ubhau // (7.2) Par.?

karavīrakaraṃ caiva dhanadhānyau ca rāghava / (8.1) Par.?

kāmarūpaṃ kāmaruciṃ moham āvaraṇaṃ tathā // (8.2) Par.?

jṛmbhakaṃ sarvanābhaṃ ca saṃtānavaraṇau tathā / (9.1) Par.?

bhṛśāśvatanayān rāma bhāsvarān kāmarūpiṇaḥ // (9.2) Par.?

pratīccha mama bhadraṃ te pātrabhūto 'si rāghava / (10.1) Par.?

divyabhāsvaradehāś ca mūrtimantaḥ sukhapradāḥ // (10.2) Par.?

rāmaṃ prāñjalayo bhūtvābruvan madhurabhāṣiṇaḥ / (11.1) Par.?

ime sma naraśārdūla śādhi kiṃ karavāma te // (11.2) Par.?

gamyatām iti tān āha yatheṣṭaṃ raghunandanaḥ / (12.1) Par.?

mānasāḥ kāryakāleṣu sāhāyyaṃ me kariṣyatha // (12.2) Par.?

atha te rāmam āmantrya kṛtvā cāpi pradakṣiṇam / (13.1) Par.?

evam astv iti kākutstham uktvā jagmur yathāgatam // (13.2) Par.?

sa ca tān rāghavo jñātvā viśvāmitraṃ mahāmunim / (14.1) Par.?

gacchann evātha madhuraṃ ślakṣṇaṃ vacanam abravīt // (14.2) Par.?

kiṃ nv etan meghasaṃkāśaṃ parvatasyāvidūrataḥ / (15.1) Par.?

vṛkṣaṣaṇḍam ito bhāti paraṃ kautūhalaṃ hi me // (15.2) Par.?

darśanīyaṃ mṛgākīrṇaṃ manoharam atīva ca / (16.1) Par.?

nānāprakāraiḥ śakunair valgubhāṣair alaṃkṛtam // (16.2) Par.?

niḥsṛtāḥ sma muniśreṣṭha kāntārād romaharṣaṇāt / (17.1) Par.?

anayā tv avagacchāmi deśasya sukhavattayā // (17.2) Par.?

sarvaṃ me śaṃsa bhagavan kasyāśramapadaṃ tv idam / (18.1) Par.?

samprāptā yatra te pāpā brahmaghnā duṣṭacāriṇaḥ // (18.2) Par.?