Texts

tato nipatitāṃ tārāṃ cyutāṃ tārām ivāmbarāt / (1.1) Par.?

śanair āśvāsayāmāsa hanūmān hariyūthapaḥ // (1.2) Par.?

guṇadoṣakṛtaṃ jantuḥ svakarmaphalahetukam / (2.1) Par.?

avyagras tad avāpnoti sarvaṃ pretya śubhāśubham // (2.2) Par.?

śocyā śocasi kaṃ śocyaṃ dīnaṃ dīnānukampase / (3.1) Par.?

kaś ca kasyānuśocyo 'sti dehe 'smin budbudopame // (3.2) Par.?

aṅgadas tu kumāro 'yaṃ draṣṭavyo jīvaputrayā / (4.1) Par.?

āyatyā ca vidheyāni samarthāny asya cintaya // (4.2) Par.?

jānāsy aniyatām evaṃ bhūtānām āgatiṃ gatim / (5.1) Par.?

tasmāc chubhaṃ hi kartavyaṃ paṇḍite naihalaukikam // (5.2) Par.?

yasmin harisahasrāṇi prayutāny arbudāni ca / (6.1) Par.?

vartayanti kṛtāṃśāni so 'yaṃ diṣṭāntam āgataḥ // (6.2) Par.?

yad ayaṃ nyāyadṛṣṭārthaḥ sāmadānakṣamāparaḥ / (7.1) Par.?

gato dharmajitāṃ bhūmiṃ nainaṃ śocitum arhasi // (7.2) Par.?

sarve ca hariśārdūlāḥ putraś cāyaṃ tavāṅgadaḥ / (8.1) Par.?

haryṛkṣapatirājyaṃ ca tvatsanātham anindite // (8.2) Par.?

tāv imau śokasaṃtaptau śanaiḥ preraya bhāmini / (9.1) Par.?

tvayā parigṛhīto 'yam aṅgadaḥ śāstu medinīm // (9.2) Par.?

saṃtatiś ca yathādṛṣṭā kṛtyaṃ yac cāpi sāmpratam / (10.1) Par.?

rājñas tat kriyatāṃ sarvam eṣa kālasya niścayaḥ // (10.2) Par.?

saṃskāryo harirājas tu aṅgadaś cābhiṣicyatām / (11.1) Par.?

siṃhāsanagataṃ putraṃ paśyantī śāntim eṣyasi // (11.2) Par.?

sā tasya vacanaṃ śrutvā bhartṛvyasanapīḍitā / (12.1) Par.?

abravīd uttaraṃ tārā hanūmantam avasthitam // (12.2) Par.?

aṅgadapratirūpāṇāṃ putrāṇām ekataḥ śatam / (13.1) Par.?

hatasyāpy asya vīrasya gātrasaṃśleṣaṇaṃ varam // (13.2) Par.?

na cāhaṃ harirājasya prabhavāmy aṅgadasya vā / (14.1) Par.?

pitṛvyastasya sugrīvaḥ sarvakāryeṣv anantaraḥ // (14.2) Par.?

na hy eṣā buddhir āstheyā hanūmann aṅgadaṃ prati / (15.1) Par.?

pitā hi bandhuḥ putrasya na mātā harisattama // (15.2) Par.?

na hi mama harirājasaṃśrayāt kṣamataram asti paratra ceha vā / (16.1) Par.?

abhimukhahatavīrasevitaṃ śayanam idaṃ mama sevituṃ kṣamam // (16.2) Par.?