Texts

śrīmārkaṇḍeya uvāca / (1.1) Par.?

ataḥ paraṃ mahārāja gacchet kedārasaṃjñakam / (1.2) Par.?

yatra gatvā mahārāja śrāddhaṃ kṛtvā pibejjalam / (1.3) Par.?

sampūjya devadeveśaṃ kedārotthaṃ phalaṃ labhet // (1.4) Par.?

yudhiṣṭhira uvāca / (2.1) Par.?

katham atra suraśreṣṭha kedārākhyaḥ sthitaḥ svayam / (2.2) Par.?

uttare narmadākūle etadvistarato vada // (2.3) Par.?

śrīmārkaṇḍeya uvāca / (3.1) Par.?

purā kṛtayugasyādau śaṅkaras tu maheśvaraḥ / (3.2) Par.?

bhṛguṇārādhitaḥ śaptaḥ śriyā ca bhṛgukacchake // (3.3) Par.?

apavitramidaṃ kṣetraṃ sarvavedavivarjitam / (4.1) Par.?

bhaviṣyati nṛpaśreṣṭha gatetyuktvā haripriyā // (4.2) Par.?

tapaścacāra vipulaṃ bhṛgurvarṣasahasrakam / (5.1) Par.?

vāyubhakṣo nirāhāraściraṃ dhamanisaṃtataḥ // (5.2) Par.?

tataḥ pratyakṣatāmāgāl liṅgībhūto maheśvaraḥ / (6.1) Par.?

prādurbhūtastu sahasā bhittvā pātālasaptakam // (6.2) Par.?

dadarśātha bhṛgurdevam autpalīṃ kelikāmiva / (7.1) Par.?

stutiṃ cakre sa devāya sthāṇave tryambaketi ca // (7.2) Par.?

evaṃ stutaḥ sa bhagavān provāca prahasanniva / (8.1) Par.?

punaḥ punarbhṛguṃ mattaḥ kiṃtu prārthayase mune // (8.2) Par.?

bhṛguruvāca / (9.1) Par.?

pañcakrośamidaṃ kṣetraṃ padmayā śāpitaṃ vibho / (9.2) Par.?

upavitram idaṃ kṣetraṃ sarvavedavivarjitam / (9.3) Par.?

bhaviṣyatīti ca procya gatā devī vidaṃ prati // (9.4) Par.?

punaḥ pavitratāṃ yāti yathedaṃ kṣetramuttamam / (10.1) Par.?

tathā kuru maheśāna prasanno yadi śaṅkara // (10.2) Par.?

īśvara uvāca / (11.1) Par.?

kedārākhyamidaṃ brahmaṃl liṅgamādyaṃ bhaviṣyati / (11.2) Par.?

kṛtvedamādiliṅgāni bhaviṣyanti daśaiva hi // (11.3) Par.?

ekādaśam adṛśyaṃ hi kṣetramadhye bhaviṣyati / (12.1) Par.?

pāvayiṣyati tatkṣetramekādaśaḥ svayaṃ vibhuḥ // (12.2) Par.?

tathā vai dvādaśādityā matprasādāttu mūrtitaḥ / (13.1) Par.?

vasiṣyanti bhṛgukṣetre rogaduḥkhanibarhaṇāḥ // (13.2) Par.?

durgāḥ hyaṣṭādaśa tathā kṣetrapālāstu ṣoḍaśa / (14.1) Par.?

bhṛgukṣetre bhaviṣyanti vīrabhadrāśca mātaraḥ // (14.2) Par.?

pavitrīkṛtam etaddhi nityaṃ kṣetraṃ bhaviṣyati / (15.1) Par.?

nāghamāse hyuṣaḥkāle snātvā māsaṃ jitendriyaḥ // (15.2) Par.?

yaḥ pūjayati kedāraṃ sa gacchecchivamandiram / (16.1) Par.?

tasmiṃstīrthe naraḥ snātvā pitṝnuddiśya bhārata / (16.2) Par.?

śrāddhaṃ dadāti vidhivat tasya prītāḥ pitāmahāḥ // (16.3) Par.?

iti te kathitaṃ samyakkedārākhyaṃ savistaram / (17.1) Par.?

sarvapāpaharaṃ puṇyaṃ sarvaduḥkhapraṇāśanam // (17.2) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe kedāreśvaratīrthamāhātmyavarṇanaṃ nāma tryaśītyuttaraśatatamo 'dhyāyaḥ // (18.1) Par.?