Texts

śrīmārkaṇḍeya uvāca / (1.1) Par.?

evaṃ te kathitaṃ rājanpurāṇaṃ dharmasaṃhitam / (1.2) Par.?

śivaprītyā yathā proktaṃ vāyunā devasaṃsadi // (1.3) Par.?

ṣaṣṭitīrthasahasrāṇi ṣaṣṭikoṭistathaiva ca / (2.1) Par.?

ādimadhyāvasāneṣu narmadāyāṃ pade pade // (2.2) Par.?

mayā dvādaśasāhasrī saṃhitā yā śrutā purā / (3.1) Par.?

devadevasya gadataḥ sāmprataṃ kathitā tava // (3.2) Par.?

pṛṣṭastvayāhaṃ bhūpāla parvate 'marakaṇṭake / (4.1) Par.?

sthitaḥ saṃkṣepataḥ sarvaṃ mayā tatkathitaṃ tava // (4.2) Par.?

narmadācaritaṃ puṇyaṃ śṛṇu tasyāsti yatphalam / (5.1) Par.?

yatphalaṃ sarvavedaiḥ syāt saṣaḍaṅgapadakramaiḥ // (5.2) Par.?

paṭhitaiśca śrutair vāpi tasmād bahutaraṃ bhavet / (6.1) Par.?

satrayājī phalaṃ yatra labhate dvādaśābdikam // (6.2) Par.?

carite tu śrute devyā labhate tādṛśaṃ phalam / (7.1) Par.?

sarvatīrtheṣu yatpuṇyaṃ snātvā sāgaramāditaḥ // (7.2) Par.?

sakṛtsnātvā tathā śrutvā narmadāyāṃ phalaṃ hi tat / (8.1) Par.?

ādimadhyāvasānena narmadācaritaṃ śubham // (8.2) Par.?

yaḥ śṛṇoti naro bhaktyā tasya puṇyaphalaṃ śṛṇu / (9.1) Par.?

sa prāpya śivasaṃsthānaṃ rudrakanyāsamāvṛtaḥ // (9.2) Par.?

rudrasyānucaro bhūtvā tenaiva saha modate / (10.1) Par.?

etad dharmamupākhyānaṃ sarvaśāstreṣu sattamam // (10.2) Par.?

deśe vā maṇḍale vāpi vā grāme nagare 'pi vā / (11.1) Par.?

gṛhe vā tiṣṭhate yasya cāturvarṇyasya bhārata // (11.2) Par.?

sa brahmā sa śivaḥ sākṣātsa ca devo janārdanaḥ / (12.1) Par.?

trividhaṃ kāraṇaṃ loke dharmapanthānamuttamam // (12.2) Par.?

devatānāṃ guruṃ śāstraṃ paramaṃ siddhikāraṇam / (13.1) Par.?

śrutveśvaramukhātpārtha mayāpi tava kīrtitam // (13.2) Par.?

dakṣiṇe cottare kūle yāni tīrthāni kānicit / (14.1) Par.?

pradhānataḥ supuṇyāni kathitāni viśeṣataḥ // (14.2) Par.?

sparśanād darśanāt teṣāṃ kīrtanācchravaṇāt tathā / (15.1) Par.?

mucyate sarvapāpebhyo rudralokaṃ sa gacchati // (15.2) Par.?

idaṃ yaḥ śṛṇuyān nityaṃ purāṇaṃ śivabhāṣitam / (16.1) Par.?

brāhmaṇo vedavidyāvān kṣatriyo vijayī bhavet // (16.2) Par.?

dhanabhāgī bhaved vaiśyaḥ śūdro vai dharmabhāgbhavet / (17.1) Par.?

saubhāgyaṃ santatiṃ svargaṃ nārī śrutvāpnuyāddhanam // (17.2) Par.?

brahmaghnaśca surāpaśca steyī ca gurutalpagaḥ / (18.1) Par.?

māhātmyaṃ narmadāyāstu śrutvā pāpabahiṣkṛtāḥ // (18.2) Par.?

pāpabhedī kṛtaghnaśca svāmiviśvāsaghātakaḥ / (19.1) Par.?

goghnaśca garadaścaiva kanyāvikrayakārakaḥ // (19.2) Par.?

ete śrutvaiva pāpebhyo mucyante nātra saṃśayaḥ / (20.1) Par.?

ye punarbhāvitātmānaḥ śṛṇvanti satataṃ nṛpa // (20.2) Par.?

pūjayanta idaṃ devāḥ pūjitā guravaśca taiḥ / (21.1) Par.?

narmadā pūjitā tena bhagavāṃśca maheśvaraḥ // (21.2) Par.?

tasmātsarvaprayatnena gandhapuṣpavibhūṣaṇaiḥ / (22.1) Par.?

pūjitaṃ parayā bhaktyā śāstrametatphalapradam // (22.2) Par.?

lekhāpayitvā sakalaṃ narmadācaritaṃ śubham / (23.1) Par.?

uttamaṃ sarvaśāstrebhyo yo dadāti dvijanmane // (23.2) Par.?

narmadāsarvatīrtheṣu snāne dāne ca yatphalam / (24.1) Par.?

tatphalaṃ samavāpnoti sa naro nātra saṃśayaḥ // (24.2) Par.?

etatpurāṇaṃ rudroktaṃ mahāpuṇyaphalapradam / (25.1) Par.?

svargadaṃ putradaṃ dhanyaṃ yaśasyaṃ kīrtivardhanam // (25.2) Par.?

sarvapāpaharaṃ pārtha duḥkhaduḥsvapnanāśanam / (26.1) Par.?

paṭhatāṃ śṛṇvatāṃ rājan sarvakāmārthasiddhidam // (26.2) Par.?

śāntirastu śivaṃ cāstu lokāḥ santu nirāmayāḥ / (27.1) Par.?

gobrāhmaṇebhyaḥ svastyastu dharmaṃ dharmātmajāśrayaḥ // (27.2) Par.?

narakāntakarī revā satīrthā viśvapāvanī / (28.1) Par.?

narmadā dharmadā cāstu śarmadā pārtha te sadā // (28.2) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe mārkaṇḍeyayudhiṣṭhirasaṃvāde revākhaṇḍapaṭhanaśravaṇadānādiphalaśrutivarṇanaṃ nāmaikonatriṃśadadhikadviśatatamo 'dhyāyaḥ // (29.1) Par.?