Texts

vijñaptimātramevedamasadarthāvabhāsanāt / (1.1) Par.?

yadvat taimirikasyāsatkeśoṇḍrakādidarśanam // (1.2) Par.?

na deśakālaniyamaḥ saṃtānāniyamo na ca / (2.1) Par.?

na ca kṛtyakriyā yuktā vijñaptiryadi nārthataḥ // (2.2) Par.?

deśādiniyamaḥ siddhaḥ svapnavat pretavatpunaḥ / (3.1) Par.?

saṃtānāniyamaḥ sarvaiḥ pūyanadyādidarśane // (3.2) Par.?

svapnopaghātavatkṛtyakriyā narakavatpunaḥ / (4.1) Par.?

narakapālādidarśane taiśca bādhane // (4.2) Par.?

tiraścāṃ saṃbhavaḥ svarge yathā ca narake tathā / (5.1) Par.?

na pretānāṃ yatastajjaṃ duḥkhaṃ nānubhavanti te // (5.2) Par.?

yadi tatkarmabhistatra bhūtānāṃ saṃbhavastathā / (6.1) Par.?

iṣyate pariṇāmaśca kiṃ vijñānasya neṣyate // (6.2) Par.?

karmaṇo vāsanānyatra phalamanyatra kalpyate / (7.1) Par.?

tatraiva neṣyate yatra vāsanā kiṃ nu kāraṇam // (7.2) Par.?

rūpādyāyatanāstitvaṃ tadvineyajanaṃ prati / (8.1) Par.?

abhiprāyavaśāduktamupapādukasattvavat // (8.2) Par.?

nāstīha sattva ātmā vā dharmāstvete sahetukāḥ / (9.1) Par.?

yataḥ svabījād vijñaptiryadābhāsā pravartate / (9.2) Par.?

dvividhāyatanatvena te tasyā munirabravīt // (9.3) Par.?

tathā pudgalanairātmyapraveśo hi anyathā punaḥ / (10.1) Par.?

deśanā dharmanairātmyapraveśaḥ kalpitātmanā // (10.2) Par.?

na tadekaṃ na cānekaṃ viṣayaḥ paramāṇuśaḥ / (11.1) Par.?

na ca te saṃhatā yasmātparamāṇurna sidhyati // (11.2) Par.?

ṣaṭkena yugapadyogātparamāṇoḥ ṣaḍaṃśatā / (12.1) Par.?

ṣaṇṇāṃ samānadeśatvātpiṇḍaḥ syādaṇumātrakaḥ // (12.2) Par.?

paramāṇorasaṃyoge tatsaṃghāte'sti kasya saḥ / (13.1) Par.?

na cānavayavatvena tatsaṃyogānna sidhyati // (13.2) Par.?

digbhāgabhedo yasyāsti tasyaikatvaṃ na yujyate / (14.1) Par.?

chāyāvṛtī kathaṃ vā anyo na piṇḍaś cen na tasya te // (14.2) Par.?

ekatve na krameṇetir yugapan na grahāgrahau / (15.1) Par.?

vicchinnānekavṛttiśca sūkṣmānīkṣā ca no bhavet // (15.2) Par.?

pratyakṣabuddhiḥ svapnādau yathā sā ca yadā tadā / (16.1) Par.?

na so'rtho dṛśyate tasya pratyakṣatvaṃ kathaṃ matam // (16.2) Par.?

uktaṃ yathā tadābhāsā vijñaptiḥ smaraṇaṃ tataḥ / (17.1) Par.?

svapnadṛgviṣayābhāvaṃ nāprabuddho 'vagacchati // (17.2) Par.?

anyonyādhipatitvena vijñaptiniyamo mithaḥ / (18.1) Par.?

middhenopahataṃ cittaṃ svapne tenāsamaṃ phalam // (18.2) Par.?

maraṇaṃ paravijñaptiviśeṣādvikriyā yathā / (19.1) Par.?

smṛtilopādikānyeṣāṃ piśācādimanovaśāt // (19.2) Par.?

kathaṃ vā daṇḍakāraṇyaśūnyatvamṛṣikopataḥ / (20.1) Par.?

manodaṇḍo mahāvadyaḥ kathaṃ vā tena sidhyati // (20.2) Par.?

paracittavidāṃ jñānamayathārthaṃ kathaṃ yathā / (21.1) Par.?

svacittajñānam ajñānādyathā buddhasya gocaraḥ // (21.2) Par.?

vijñaptimātratāsiddhiḥ svaśaktisadṛśī mayā / (22.1) Par.?

kṛteyaṃ sarvathā sā tu na cintyā buddhagocaraḥ // (22.2) Par.?