Texts

uttarauṣṭham antarmukhaṃ nayanam iti muktvā cumbanavad daśanaradanasthānāni // (1.1) Par.?

samāḥ snigdhacchāyā rāgagrāhiṇo yuktapramāṇā niśchidrāstīkṣṇāgrā iti daśanaguṇāḥ // (2.1) Par.?

kuṇṭhā rājyudgatāḥ paruṣāḥ viṣamāḥ ślakṣṇāḥ pṛthavo viralā iti ca doṣāḥ // (3.1) Par.?

gūḍhakam ucchūnakaṃ bindur bindumālā pravālamaṇir maṇimālā khaṇḍābhrakaṃ varāhacarvitakam iti daśanacchedanavikalpāḥ // (4.1) Par.?

nātilohitena rāgamātreṇa vibhāvanīyaṃ gūḍhakam // (5.1) Par.?

tad eva pīḍanād ucchūnakam // (6.1) Par.?

tad ubhayaṃ bindur adharamadhya iti // (7.1) Par.?

ucchūnakaṃ pravālamaṇiśca kapole // (8.1) Par.?

karṇapūracumbanaṃ nakhadaśanacchedyam iti savyakapolamaṇḍanāni // (9.1) Par.?

dantauṣṭhasaṃyogābhyāsaniṣpādanāt pravālamaṇisiddhiḥ // (10.1) Par.?

sarvasyeyaṃ maṇimālāyāśca // (11.1) Par.?

alpadeśāyāśca tvaco daśanadvayasaṃdaṃśajā bindusiddhiḥ // (12.1) Par.?

sarvair bindumālāyāśca // (13.1) Par.?

tasmān mālādvayam api galakakṣavaṅkṣaṇapradeśeṣu // (14.1) Par.?

lalāṭe corvor bindumālā // (15.1) Par.?

maṇḍalam iva viṣamakūṭakayuktaṃ khaṇḍābhrakaṃ stanapṛṣṭha eva // (16.1) Par.?

saṃhatāḥ pradīrghā bahvyo daśanapadarājayas tāmrāntarālā varāhacarvitakam / (17.1) Par.?

stanapṛṣṭha eva // (17.2) Par.?

tadubhayam api ca caṇḍavegayoḥ / (18.1) Par.?

iti daśanacchedyāni // (18.2) Par.?

viśeṣake karṇapūre puṣpāpīḍe tāmbūlapalāśe tamālapattre ceti prayojyāgāmiṣu nakhadaśanacchedyādīnyābhiyogikāni // (19.1) Par.?

deśasātmyācca yoṣita upacaret // (20.1) Par.?

madhyadeśyā āryaprāyāḥ śucyupacarāś cumbananakhadantapadadveṣiṇyaḥ // (21.1) Par.?

bāhlīkadeśyā āvantikāśca // (22.1) Par.?

citrarateṣu tv āsām abhiniveśaḥ // (23.1) Par.?

pariṣvaṅgacumbananakhadantacūṣaṇapradhānāḥ kṣatavarjitāḥ prahaṇanasādhyā mālavya ābhīryaśca // (24.1) Par.?

sindhuṣaṣṭhānāṃ ca nadīnām antarālīyā aupariṣṭakasātmyāḥ // (25.1) Par.?

caṇḍavegā mandaśītkṛtā āparāntikā lāṭhyaśca // (26.1) Par.?

dṛḍhaprahaṇanayoginyaḥ kharavegā eva apadravyapradhānāḥ strīrājye kosalāyāṃ ca // (27.1) Par.?

prakṛtyā mṛdvyo ratipriyā aśucirucayo nirācārāścāndhryaḥ // (28.1) Par.?

sakalacatuḥṣaṣṭiprayogarāgiṇyo 'ślīlaparuṣavākyapriyāḥ śayane ca sarabhasopakramā mahārāṣṭrikāḥ // (29.1) Par.?

tathāvidhā eva rahasi prakāśante nāgarikāḥ // (30.1) Par.?

mṛdyamānāścābhiyogān mandaṃ mandaṃ prasiñcante draviḍyaḥ // (31.1) Par.?

madhyamavegāḥ sarvaṃsahāḥ svāṅgaprachādinyaḥ parāṅgahāsinyaḥ kutsitāślīlaparuṣaparihāriṇyo vānavāsikāḥ // (32.1) Par.?

mṛdubhāṣiṇyo 'nurāgavatyo mṛdvyaṅgyaśca gauḍyaḥ // (33.1) Par.?

deśasātmyāt prakṛtisātmyaṃ balīya iti suvarṇanābhaḥ / (34.1) Par.?

na tatra deśyā upacārāḥ // (34.2) Par.?

kālayogācca deśād deśāntaram upacāraveṣalīlāś cānugacchanti / (35.1) Par.?

tacca vidyāt // (35.2) Par.?

upagūhanādiṣu ca rāgavardhanaṃ pūrvaṃ pūrvaṃ vicitram uttaram uttaraṃ ca // (36.1) Par.?

vāryamāṇaśca puruṣo yat kuryāt tad anu kṣatam / (37.1) Par.?

amṛṣyamāṇā dviguṇaṃ tad eva pratiyojayet // (37.2) Par.?

bindoḥ pratikriyā mālā mālāyāścābhrakhaṇḍakam / (38.1) Par.?

iti krodhādivāviṣṭā kalahān pratiyojayet // (38.2) Par.?

sakacagraham unnamya mukhaṃ tasya tataḥ pibet / (39.1) Par.?

nilīyeta daśeccaiva tatra tatra maderitā // (39.2) Par.?

unnamya kaṇṭhe kāntasya saṃśritā vakṣasaḥ sthalīm / (40.1) Par.?

maṇimālāṃ prayuñjīta yaccānyad api lakṣitam // (40.2) Par.?

divāpi janasaṃbādhe nāyakena pradarśitam / (41.1) Par.?

uddiśya svakṛtaṃ cihnaṃ hased anyair alakṣitā // (41.2) Par.?

vikūṇayantīva mukhaṃ kutsayantīva nāyakam / (42.1) Par.?

svagātrasthāni cihnāni sāsūyeva pradarśayet // (42.2) Par.?

parasparānukūlyena tad evaṃ lajjamānayoḥ / (43.1) Par.?

saṃvatsaraśatenāpi prītir na parihīyate // (43.2) Par.?