Texts

vaiśvānarāya pṛthupājase vipo ratnā vidhanta dharuṇeṣu gātave / (1.1) Par.?

agnir hi devāṁ amṛto duvasyaty athā dharmāṇi sanatā na dūduṣat // (1.2) Par.?

antar dūto rodasī dasma īyate hotā niṣatto manuṣaḥ purohitaḥ / (2.1) Par.?

kṣayam bṛhantam pari bhūṣati dyubhir devebhir agnir iṣito dhiyāvasuḥ // (2.2) Par.?

ketuṃ yajñānāṃ vidathasya sādhanaṃ viprāso agnim mahayanta cittibhiḥ / (3.1) Par.?

apāṃsi yasminn adhi saṃdadhur giras tasmin sumnāni yajamāna ā cake // (3.2) Par.?

pitā yajñānām asuro vipaścitāṃ vimānam agnir vayunaṃ ca vāghatām / (4.1) Par.?

ā viveśa rodasī bhūrivarpasā purupriyo bhandate dhāmabhiḥ kaviḥ // (4.2) Par.?

candram agniṃ candrarathaṃ harivrataṃ vaiśvānaram apsuṣadaṃ svarvidam / (5.1) Par.?

vigāhaṃ tūrṇiṃ taviṣībhir āvṛtam bhūrṇiṃ devāsa iha suśriyaṃ dadhuḥ // (5.2) Par.?

agnir devebhir manuṣaś ca jantubhis tanvāno yajñam purupeśasaṃ dhiyā / (6.1) Par.?

rathīr antar īyate sādhadiṣṭibhir jīro damūnā abhiśasticātanaḥ // (6.2) Par.?

agne jarasva svapatya āyuny ūrjā pinvasva sam iṣo didīhi naḥ / (7.1) Par.?

vayāṃsi jinva bṛhataś ca jāgṛva uśig devānām asi sukratur vipām // (7.2) Par.?

viśpatiṃ yahvam atithiṃ naraḥ sadā yantāraṃ dhīnām uśijaṃ ca vāghatām / (8.1) Par.?

adhvarāṇāṃ cetanaṃ jātavedasam pra śaṃsanti namasā jūtibhir vṛdhe // (8.2) Par.?

vibhāvā devaḥ suraṇaḥ pari kṣitīr agnir babhūva śavasā sumadrathaḥ / (9.1) Par.?

tasya vratāni bhūripoṣiṇo vayam upa bhūṣema dama ā suvṛktibhiḥ // (9.2) Par.?

vaiśvānara tava dhāmāny ā cake yebhiḥ svarvid abhavo vicakṣaṇa / (10.1) Par.?

jāta āpṛṇo bhuvanāni rodasī agne tā viśvā paribhūr asi tmanā // (10.2) Par.?

vaiśvānarasya daṃsanābhyo bṛhad ariṇād ekaḥ svapasyayā kaviḥ / (11.1) Par.?

ubhā pitarā mahayann ajāyatāgnir dyāvāpṛthivī bhūriretasā // (11.2) Par.?