Texts

samiddho añjan kṛdaraṃ matīnāṃ ghṛtam agne madhumat pinvamānaḥ / (1.1) Par.?

vājī vahan vājinaṃ jātavedo devānāṃ vakṣi priyam ā sadhastham // (1.2) Par.?

tanūnapāt saṃ patho devayānān prajānan vājy apyetu devān / (2.1) Par.?

anu tvā sapte pradiśaḥ sacantāṃ svadhāṃ devair yajamānāya dhehi // (2.2) Par.?

īḍyaś cāsi vandyaś cāsi vājinn āśuś cāsi medhyaś cāsi sapte / (3.1) Par.?

agniṣ ṭvā devair vasubhiḥ sajoṣāḥ prītaṃ vahniṃ vahatu jātavedāḥ // (3.2) Par.?

stīrṇaṃ barhiḥ suṣṭarīmā juṣāṇoru pṛthu prathamānaṃ pṛthivyām / (4.1) Par.?

devebhir aktam aditiḥ sajoṣāḥ syonaṃ kṛṇvānā suvite dadhātu // (4.2) Par.?

etā u vaḥ subhagā viśvavārā vi pakṣobhiḥ śrayamāṇā ud ātaiḥ / (5.1) Par.?

ṛṣvāḥ satīḥ kavaṣaḥ śumbhamānā dvāro devīḥ suprāyaṇā bhavantu // (5.2) Par.?

antarā mitrāvaruṇā carantī mukhaṃ yajñānām abhi saṃvidāne / (6.1) Par.?

uṣāsā vāṃ suhiraṇye suśilpe ṛtasya yonā iha sādayāmi // (6.2) Par.?

prathamā vāṃ sarathinā suvarṇā devau paśyantau bhuvanāni viśvā / (7.1) Par.?

apiprayaṃ codanā vāṃ mimānā hotārā jyotiḥ pradiśā diśantā // (7.2) Par.?

ādityair no bhāratī vaṣṭu yajñaṃ sarasvatī saha rudrair na āvīt / (8.1) Par.?

iḍopahūtā vasubhiḥ sajoṣāḥ syonaṃ kṛṇvānā suvite dadhātu // (8.2) Par.?

tvaṣṭā vīraṃ devakāmaṃ jajāna tvaṣṭur arvā jāyata āśur aśvaḥ // (9.1) Par.?

tvaṣṭemā viśvā bhuvanā jajāna bahoḥ kartāram iha yakṣi hotaḥ // (10.1) Par.?

aśvo ghṛtena tmanyā samaktā upa devaṃ ṛtuśaḥ pātha etu / (11.1) Par.?

vanaspatir devalokaṃ prajānann agninā havyā svaditāni vakṣat // (11.2) Par.?

prajāpates tapasā vāvṛdhānaḥ sadyo jāto dadhiṣe yajñam agne / (12.1) Par.?

svāhākṛtena haviṣā purogā yāhi sādhyā havir adantu devāḥ // (12.2) Par.?