Texts

ṣaṭtriṃśat prakramāḥ prācī caturviṃśatir agreṇa triṃśaj jaghanena // (1) Par.?

tathā virājā saṃmitā // (2) Par.?

atho chandāṃsi vai virāṭ // (3) Par.?

chandāṃsi vāvāsyaitad yajñamukhe yunakti // (4) Par.?

etad vā eṣābhyanūktā // (5) Par.?

indrāṇī patyā sujitaṃ jigāyodaṃśena patividye bibheda / (6.1) Par.?

triṃśad yasyā jaghanaṃ yojanāny upasthā indraṃ sthaviraṃ bibhartīti // (6.2) Par.?

yad vāva prācīnapravaṇaṃ tad devayajanam // (7) Par.?

prāñcaṃ hi taṃ śayānam avindan // (8) Par.?

atha yat prācīnapravaṇam udīcīnāpanataṃ tad yajeta yaḥ kāmayetobhayor lokayor ṛdhnuyām iti // (9) Par.?

ubhayor vā etal lokayoḥ // (10) Par.?

ubhayor eva lokayor ṛdhnoti // (11) Par.?

atha yasya devayajanasyottarād anyad devayajanaṃ tad yajeta yaḥ kāmayetābhi mottaro yajño named iti // (12) Par.?

etad vā uttarāvan nāma devayajanam // (13) Par.?

abhy enam uttaro yajño namati // (14) Par.?

atha yasya devayajanasya madhyato bahulā oṣadhayas tat paśukāmo yajeta // (15) Par.?

paśavo vā oṣadhayaḥ // (16) Par.?

paśumān bhavati // (17) Par.?

yat samaṃ pratiṣṭhitaṃ tad gataśrīr yajeta // (18) Par.?

pratiṣṭhitaṃ vā etat // (19) Par.?

pratiṣṭhita eṣa yo gataśrīḥ // (20) Par.?

tad evainaṃ pratiṣṭhāpayati // (21) Par.?

pāpo hi sa // (22) Par.?

tataḥ pracyavamānaḥ // (23) Par.?

atha yasya devayajanasyāpaḥ purastāt tad yajeta yaḥ kāmayetābhi mottaro yajño named iti // (24) Par.?

etad vai purohavir nāma devayajanam // (25) Par.?

abhy enam uttaro yajño namati // (26) Par.?

atha yasya devayajanasya panthāḥ purastād iriṇaṃ vā karto vā bhrātṛvyavān yajeta // (27) Par.?

etad vā āptaṃ devayajanaṃ sadevam // (28) Par.?

yaddhi devayajanād devayajanam uñśiṃṣed bhrātṛvyāya lokam uñśiṃṣet // (29) Par.?

atha yasya devayajanasyāhavanīyād anyāḥ prācīr āpo dhāvanti gārhapatyād anyāḥ pratīcīs tad yajeta yaṃ talpe vā pātre vā mīmāṃseran // (30) Par.?

anuṣakto hi vā eṣa pāpmanā // (31) Par.?

athaitan mīmāṃsante // (32) Par.?

etad vai vyāvṛttaṃ pāpmanā // (33) Par.?

pāpmanaivainaṃ vyāvartayanti // (34) Par.?

yad vai yajñaḥ saṃtiṣṭhate prācīnam asya samṛddham eti pratīcīnaṃ vyṛddham // (35) Par.?

paśavo vai yajñasya samṛddham // (36) Par.?

āpaḥ khalu vai paśavaḥ // (37) Par.?

yat pratyaṅṅ avabhṛtham abhyaveyād yajñasya vyṛdhyena vyṛdhyeta // (38) Par.?

atha yat prāṅ avabhṛtham abhyavaiti yajñasya vā etat samṛdhyena samṛdhyate // (39) Par.?

yat tryunnataṃ tad bhrātṛvyavān yajeta // (40) Par.?

yasyāhavanīyaṃ ca havirdhānaṃ cāntaronnatam // (41) Par.?

yasya havirdhānaṃ ca sadaś cāntaronnatam // (42) Par.?

yasya sadaś ca gārhapatyaṃ cāntaronnatam // (43) Par.?

ato vai viṣṇur imāṃl lokān udajayat // (44) Par.?

viṣṇor evojjitam anv imāṃl lokān ujjayati // (45) Par.?

praibhyo lokebhyo bhrātṛvyaṃ nudate // (46) Par.?

atha yasya devayajanasya dakṣiṇata unnataṃ tad bhrātṛvyavān yajeta // (47) Par.?

etāṃ vai diśaṃ devā asurān praṇudya svargaṃ lokam āyan // (48) Par.?

athaibhyo 'mum ādityaṃ paridhiṃ paryadadhur apunarābhāvāya // (49) Par.?

etāṃ vā etad diśaṃ yajamāno bhrātṛvyaṃ praṇudya svargaṃ lokam eti // (50) Par.?

athāsmā amum ādityaṃ paridhiṃ paridadhāty apunarābhāvāya // (51) Par.?

sthale yajeta yaḥ kāmayetobhayeṣāṃ devamanuṣyāṇāṃ prakāśaṃ gaccheyam iti // (52) Par.?

prakāśo vai nāmaitad devayajanam // (53) Par.?

ubhayeṣāṃ devamanuṣyāṇāṃ prakāśaṃ gacchati // (54) Par.?

abhiśasyamānaṃ yājayet // (55) Par.?

parokṣaṃ guhā vane parokṣaṃ pṛṣṭhāny apeyuḥ // (56) Par.?

parokṣaṃ vā eṣa yam abhiśaṃsanti // (57) Par.?

parokṣam evāsmād guhā pāpīyāṃ vācaṃ karoti // (58) Par.?

atha yasya hotā prātaranuvākam anubruvann agnim apaḥ sūryaṃ tāni paśyet tad brahmavarcasakāmo yajeta // (59) Par.?

brahmavarcasaṃ vā agniḥ // (60) Par.?

brahmavarcasam āpaḥ // (61) Par.?

brahmavarcasam asā ādityaḥ // (62) Par.?

brahmavarcasam eva saṃdadhāti // (63) Par.?

brahmavarcasī bhavati // (64) Par.?

atha yasya devayajanasyānyā anyā madhyato bahulā oṣadhayaḥ // (65) Par.?

ato vā aṅgirasaḥ paśūn asṛjanta // (66) Par.?

tat paśukāmo yajeta // (67) Par.?

atha yasya devayajanasya madhyata unnatam // (68) Par.?

ato vā aṅgirasaḥ svargaṃ lokam āyan // (69) Par.?

tat svargakāmo yajeta // (70) Par.?

nirvraske 'bhicaran yajeta // (71) Par.?

yathaivaitaṃ nirṇayaty evaṃ taṃ nirṇayati yam abhicarati // (72) Par.?

yat kāryam iva syāt tad yajeta // (73) Par.?

yaḥ kārya iva syāt // (74) Par.?

ātmā vai devayajanam // (75) Par.?

karoty evainam // (76) Par.?

ye yuvāna ārṣeyā ṛtvijo vahnayas tad devayajanam // (77) Par.?

tasmād āhur yuvaivārtvijīnā iti // (78) Par.?

agnir vāva devayajanam // (79) Par.?

tad ya evaṃ vidvān yatraiva kva cāgnim ādhāya yajate devayajana eva yajate // (80) Par.?