Texts

puryāṃ tasyām ayodhyāyāṃ vedavit sarvasaṃgrahaḥ / (1.1) Par.?

dīrghadarśī mahātejāḥ paurajānapadapriyaḥ // (1.2) Par.?

ikṣvākūṇām atiratho yajvā dharmarato vaśī / (2.1) Par.?

maharṣikalpo rājarṣis triṣu lokeṣu viśrutaḥ // (2.2) Par.?

balavān nihatāmitro mitravān vijitendriyaḥ / (3.1) Par.?

dhanaiś ca saṃcayaiś cānyaiḥ śakravaiśravaṇopamaḥ // (3.2) Par.?

yathā manur mahātejā lokasya parirakṣitā / (4.1) Par.?

tathā daśaratho rājā vasañ jagad apālayat // (4.2) Par.?

tena satyābhisaṃdhena trivargam anutiṣṭhatā / (5.1) Par.?

pālitā sā purī śreṣṭhendreṇa ivāmarāvatī // (5.2) Par.?

tasmin puravare hṛṣṭā dharmātmanā bahu śrutāḥ / (6.1) Par.?

narās tuṣṭādhanaiḥ svaiḥ svair alubdhāḥ satyavādinaḥ // (6.2) Par.?

nālpasaṃnicayaḥ kaścid āsīt tasmin purottame / (7.1) Par.?

kuṭumbī yo hy asiddhārtho 'gavāśvadhanadhānyavān // (7.2) Par.?

kāmī vā na kadaryo vā nṛśaṃsaḥ puruṣaḥ kvacit / (8.1) Par.?

draṣṭuṃ śakyam ayodhyāyāṃ nāvidvān na ca nāstikaḥ // (8.2) Par.?

sarve narāś ca nāryaś ca dharmaśīlāḥ susaṃyatāḥ / (9.1) Par.?

muditāḥ śīlavṛttābhyāṃ maharṣaya ivāmalāḥ // (9.2) Par.?

nākuṇḍalī nāmukuṭī nāsragvī nālpabhogavān / (10.1) Par.?

nāmṛṣṭo nānuliptāṅgo nāsugandhaś ca vidyate // (10.2) Par.?

nāmṛṣṭabhojī nādātā nāpy anaṅgadaniṣkadhṛk / (11.1) Par.?

nāhastābharaṇo vāpi dṛśyate nāpy anātmavān // (11.2) Par.?

nānāhitāgnir nāyajvā vipro nāpy asahasradaḥ / (12.1) Par.?

kaścid āsīd ayodhyāyāṃ na ca nirvṛttasaṃkaraḥ // (12.2) Par.?

svakarmaniratā nityaṃ brāhmaṇā vijitendriyāḥ / (13.1) Par.?

dānādhyayanaśīlāś ca saṃyatāś ca pratigrahe // (13.2) Par.?

na nāstiko nānṛtako na kaścid abahuśrutaḥ / (14.1) Par.?

nāsūyako na cāśakto nāvidvān vidyate tadā // (14.2) Par.?

na dīnaḥ kṣiptacitto vā vyathito vāpi kaścana / (15.1) Par.?

kaścin naro vā nārī vā nāśrīmān nāpy arūpavān / (15.2) Par.?

draṣṭuṃ śakyam ayodhyāyāṃ nāpi rājanyabhaktimān // (15.3) Par.?

varṇeṣv agryacaturtheṣu devatātithipūjakāḥ / (16.1) Par.?

dīrghāyuṣo narāḥ sarve dharmaṃ satyaṃ ca saṃśritāḥ // (16.2) Par.?

kṣatraṃ brahmamukhaṃ cāsīd vaiśyāḥ kṣatram anuvratāḥ / (17.1) Par.?

śūdrāḥ svadharmaniratās trīn varṇān upacāriṇaḥ // (17.2) Par.?

sā tenekṣvākunāthena purī suparirakṣitā / (18.1) Par.?

yathā purastān manunā mānavendreṇa dhīmatā // (18.2) Par.?

yodhānām agnikalpānāṃ peśalānām amarṣiṇām / (19.1) Par.?

sampūrṇākṛtavidyānāṃ guhākesariṇām iva // (19.2) Par.?

kāmbojaviṣaye jātair vāhlīkaiś ca hayottamaiḥ / (20.1) Par.?

vanāyujair nadījaiś ca pūrṇā harihayopamaiḥ // (20.2) Par.?

vindhyaparvatajair mattaiḥ pūrṇā haimavatair api / (21.1) Par.?

madānvitair atibalair mātaṃgaiḥ parvatopamaiḥ // (21.2) Par.?

añjanād api niṣkrāntair vāmanād api ca dvipaiḥ / (22.1) Par.?

bhadramandrair bhadramṛgair mṛgamandraiś ca sā purī // (22.2) Par.?

nityamattaiḥ sadā pūrṇā nāgair acalasaṃnibhaiḥ / (23.1) Par.?

sā yojane ca dve bhūyaḥ satyanāmā prakāśate // (23.2) Par.?

tāṃ satyanāmāṃ dṛḍhatoraṇārgalām gṛhair vicitrair upaśobhitāṃ śivām / (24.1) Par.?

purīm ayodhyāṃ nṛsahasrasaṃkulāṃ śaśāsa vai śakrasamo mahīpatiḥ // (24.2) Par.?