Texts

evaṃ bahuvidhāṃ cintāṃ cintayitvā mahākapiḥ / (1.1) Par.?

saṃśrave madhuraṃ vākyaṃ vaidehyā vyājahāra ha // (1.2) Par.?

rājā daśaratho nāma rathakuñjaravājinām / (2.1) Par.?

puṇyaśīlo mahākīrtir ṛjur āsīnmahāyaśāḥ / (2.2) Par.?

cakravartikule jātaḥ puraṃdarasamo bale // (2.3) Par.?

ahiṃsāratir akṣudro ghṛṇī satyaparākramaḥ / (3.1) Par.?

mukhyaścekṣvākuvaṃśasya lakṣmīvāṃllakṣmivardhanaḥ // (3.2) Par.?

pārthivavyañjanair yuktaḥ pṛthuśrīḥ pārthivarṣabhaḥ / (4.1) Par.?

pṛthivyāṃ caturantāyāṃ viśrutaḥ sukhadaḥ sukhī // (4.2) Par.?

tasya putraḥ priyo jyeṣṭhastārādhipanibhānanaḥ / (5.1) Par.?

rāmo nāma viśeṣajñaḥ śreṣṭhaḥ sarvadhanuṣmatām // (5.2) Par.?

rakṣitā svasya vṛttasya svajanasyāpi rakṣitā / (6.1) Par.?

rakṣitā jīvalokasya dharmasya ca paraṃtapaḥ // (6.2) Par.?

tasya satyābhisaṃdhasya vṛddhasya vacanāt pituḥ / (7.1) Par.?

sabhāryaḥ saha ca bhrātrā vīraḥ pravrajito vanam // (7.2) Par.?

tena tatra mahāraṇye mṛgayāṃ paridhāvatā / (8.1) Par.?

janasthānavadhaṃ śrutvā hatau ca kharadūṣaṇau / (8.2) Par.?

tatastvamarṣāpahṛtā jānakī rāvaṇena tu // (8.3) Par.?

yathārūpāṃ yathāvarṇāṃ yathālakṣmīṃ viniścitām / (9.1) Par.?

aśrauṣaṃ rāghavasyāhaṃ seyam āsāditā mayā // (9.2) Par.?

virarāmaivam uktvāsau vācaṃ vānarapuṃgavaḥ / (10.1) Par.?

jānakī cāpi tacchrutvā vismayaṃ paramaṃ gatā // (10.2) Par.?

tataḥ sā vakrakeśāntā sukeśī keśasaṃvṛtam / (11.1) Par.?

unnamya vadanaṃ bhīruḥ śiṃśapāvṛkṣam aikṣata // (11.2) Par.?

sā tiryag ūrdhvaṃ ca tathāpyadhastān nirīkṣamāṇā tam acintyabuddhim / (12.1) Par.?

dadarśa piṅgādhipater amātyaṃ vātātmajaṃ sūryam ivodayastham // (12.2) Par.?