Texts

Help

Select a text:
Bibliography
Select a chapter:
 (no revisions)
Show parallels  Show headlines
Use dependency labeler
Chapter id: 3279
  • Click on a sentence to show its analysis
  • Keep the mouse pointer over a lemma to show its meanings.
tām abravīnmahātejā hanūmānmārutātmajaḥ / (1.1) Par.?
śirasyañjalim ādhāya sītāṃ madhurayā girā // (1.2) Par.?
kā nu padmapalāśākṣī kliṣṭakauśeyavāsinī / (2.1) Par.?
drumasya śākhām ālambya tiṣṭhasi tvam aninditā // (2.2) Par.?
kimarthaṃ tava netrābhyāṃ vāri sravati śokajam / (3.1) Par.?
puṇḍarīkapalāśābhyāṃ viprakīrṇam ivodakam // (3.2) Par.?
surāṇām asurāṇāṃ ca nāgagandharvarakṣasām / (4.1) Par.?
yakṣāṇāṃ kiṃnarāṇāṃ ca kā tvaṃ bhavasi śobhane // (4.2) Par.?
kā tvaṃ bhavasi rudrāṇāṃ marutāṃ vā varānane / (5.1) Par.?
vasūnāṃ vā varārohe devatā pratibhāsi me // (5.2) Par.?
kiṃ nu candramasā hīnā patitā vibudhālayāt / (6.1) Par.?
rohiṇī jyotiṣāṃ śreṣṭhā śreṣṭhā sarvaguṇānvitā // (6.2) Par.?
kopād vā yadi vā mohād bhartāram asitekṣaṇā / (7.1) Par.?
vasiṣṭhaṃ kopayitvā tvaṃ nāsi kalyāṇyarundhatī // (7.2) Par.?
ko nau putraḥ pitā bhrātā bhartā vā te sumadhyame / (8.1) Par.?
asmāl lokād amuṃ lokaṃ gataṃ tvam anuśocasi // (8.2) Par.?
vyañjanāni hi te yāni lakṣaṇāni ca lakṣaye / (9.1) Par.?
mahiṣī bhūmipālasya rājakanyāsi me matā // (9.2) Par.?
rāvaṇena janasthānād balād apahṛtā yadi / (10.1) Par.?
sītā tvam asi bhadraṃ te tanmamācakṣva pṛcchataḥ // (10.2) Par.?
sā tasya vacanaṃ śrutvā rāmakīrtanaharṣitā / (11.1) Par.?
uvāca vākyaṃ vaidehī hanūmantaṃ drumāśritam // (11.2) Par.?
duhitā janakasyāhaṃ vaidehasya mahātmanaḥ / (12.1) Par.?
sītā ca nāma nāmnāhaṃ bhāryā rāmasya dhīmataḥ // (12.2) Par.?
samā dvādaśa tatrāhaṃ rāghavasya niveśane / (13.1) Par.?
bhuñjānā mānuṣān bhogān sarvakāmasamṛddhinī // (13.2) Par.?
tatastrayodaśe varṣe rājyenekṣvākunandanam / (14.1) Par.?
abhiṣecayituṃ rājā sopādhyāyaḥ pracakrame // (14.2) Par.?
tasmin saṃbhriyamāṇe tu rāghavasyābhiṣecane / (15.1) Par.?
kaikeyī nāma bhartāraṃ devī vacanam abravīt // (15.2) Par.?
na pibeyaṃ na khādeyaṃ pratyahaṃ mama bhojanam / (16.1) Par.?
eṣa me jīvitasyānto rāmo yadyabhiṣicyate // (16.2) Par.?
yat tad uktaṃ tvayā vākyaṃ prītyā nṛpatisattama / (17.1) Par.?
tac cen na vitathaṃ kāryaṃ vanaṃ gacchatu rāghavaḥ // (17.2) Par.?
sa rājā satyavāg devyā varadānam anusmaran / (18.1) Par.?
mumoha vacanaṃ śrutvā kaikeyyāḥ krūram apriyam // (18.2) Par.?
tatastu sthaviro rājā satyadharme vyavasthitaḥ / (19.1) Par.?
jyeṣṭhaṃ yaśasvinaṃ putraṃ rudan rājyam ayācata // (19.2) Par.?
sa pitur vacanaṃ śrīmān abhiṣekāt paraṃ priyam / (20.1) Par.?
manasā pūrvam āsādya vācā pratigṛhītavān // (20.2) Par.?
dadyānna pratigṛhṇīyānna brūyāt kiṃcid apriyam / (21.1) Par.?
api jīvitahetor hi rāmaḥ satyaparākramaḥ // (21.2) Par.?
sa vihāyottarīyāṇi mahārhāṇi mahāyaśāḥ / (22.1) Par.?
visṛjya manasā rājyaṃ jananyai māṃ samādiśat // (22.2) Par.?
sāhaṃ tasyāgratastūrṇaṃ prasthitā vanacāriṇī / (23.1) Par.?
na hi me tena hīnāyā vāsaḥ svarge 'pi rocate // (23.2) Par.?
prāg eva tu mahābhāgaḥ saumitrir mitranandanaḥ / (24.1) Par.?
pūrvajasyānuyātrārthe drumacīrair alaṃkṛtaḥ // (24.2) Par.?
te vayaṃ bhartur ādeśaṃ bahu mānya dṛḍhavratāḥ / (25.1) Par.?
praviṣṭāḥ sma purādṛṣṭaṃ vanaṃ gambhīradarśanam // (25.2) Par.?
vasato daṇḍakāraṇye tasyāham amitaujasaḥ / (26.1) Par.?
rakṣasāpahṛtā bhāryā rāvaṇena durātmanā // (26.2) Par.?
dvau māsau tena me kālo jīvitānugrahaḥ kṛtaḥ / (27.1) Par.?
ūrdhvaṃ dvābhyāṃ tu māsābhyāṃ tatastyakṣyāmi jīvitam // (27.2) Par.?
Duration=0.13690710067749 secs.