Texts

Help

Select a text:
Bibliography
Select a chapter:
 (no revisions)
Show parallels  Show headlines
Use dependency labeler
Chapter id: 5081
  • Click on a sentence to show its analysis
  • Keep the mouse pointer over a lemma to show its meanings.
tau rajanyāṃ prabhātāyāṃ snātau hutahutāśanau / (1.1) Par.?
yathoktam ṛṣiṇā pūrvaṃ tatra tatrābhyagāyatām // (1.2) Par.?
tāṃ sa śuśrāva kākutsthaḥ pūrvacaryāṃ tatastataḥ / (2.1) Par.?
apūrvāṃ pāṭhyajātiṃ ca geyena samalaṃkṛtām // (2.2) Par.?
pramāṇair bahubhir baddhāṃ tantrīlayasamanvitām / (3.1) Par.?
bālābhyāṃ rāghavaḥ śrutvā kautūhalaparo 'bhavat // (3.2) Par.?
atha karmāntare rājā samānīya mahāmunīn / (4.1) Par.?
pārthivāṃśca naravyāghraḥ paṇḍitānnaigamāṃstathā // (4.2) Par.?
paurāṇikāñśabdavido ye ca vṛddhā dvijātayaḥ / (5.1) Par.?
etān sarvān samānīya gātārau samaveśayat // (5.2) Par.?
hṛṣṭā ṛṣigaṇāstatra pārthivāśca mahaujasaḥ / (6.1) Par.?
pibanta iva cakṣurbhyāṃ rājānaṃ gāyakau ca tau // (6.2) Par.?
parasparam athocuste sarva eva samaṃ tataḥ / (7.1) Par.?
ubhau rāmasya sadṛśau bimbād bimbam ivoddhṛtau // (7.2) Par.?
jaṭilau yadi na syātāṃ na valkaladharau yadi / (8.1) Par.?
viśeṣaṃ nādhigacchāmo gāyato rāghavasya ca // (8.2) Par.?
teṣāṃ saṃvadatām evaṃ śrotṝṇāṃ harṣavardhanam / (9.1) Par.?
geyaṃ pracakratustatra tāvubhau munidārakau // (9.2) Par.?
tataḥ pravṛttaṃ madhuraṃ gāndharvam atimānuṣam / (10.1) Par.?
na ca tṛptiṃ yayuḥ sarve śrotāro geyasaṃpadā // (10.2) Par.?
pravṛttam āditaḥ pūrvaṃ sargānnāradadarśanāt / (11.1) Par.?
tataḥ prabhṛti sargāṃśca yāvadviṃśatyagāyatām // (11.2) Par.?
tato 'parāhṇasamaye rāghavaḥ samabhāṣata / (12.1) Par.?
śrutvā viṃśatisargāṃstān bharataṃ bhrātṛvatsalaḥ // (12.2) Par.?
aṣṭādaśa sahasrāṇi suvarṇasya mahātmanoḥ / (13.1) Par.?
dadasva śīghraṃ kākutstha bālayor mā vṛthā śramaḥ // (13.2) Par.?
dīyamānaṃ suvarṇaṃ tannāgṛhṇītāṃ kuśīlavau / (14.1) Par.?
ūcatuśca mahātmānau kim aneneti vismitau // (14.2) Par.?
vanyena phalamūlena niratau svo vanaukasau / (15.1) Par.?
suvarṇena hiraṇyena kiṃ kariṣyāvahe vane // (15.2) Par.?
tathā tayoḥ prabruvatoḥ kautūhalasamanvitāḥ / (16.1) Par.?
śrotāraścaiva rāmaśca sarva eva suvismitāḥ // (16.2) Par.?
tasya caivāgamaṃ rāmaḥ kāvyasya śrotum utsukaḥ / (17.1) Par.?
papraccha tau mahātejāstāvubhau munidārakau // (17.2) Par.?
kiṃpramāṇam idaṃ kāvyaṃ kā pratiṣṭhā mahātmanaḥ / (18.1) Par.?
kartā kāvyasya mahataḥ ko vāsau munipuṃgavaḥ // (18.2) Par.?
pṛcchantaṃ rāghavaṃ vākyam ūcatur munidārakau / (19.1) Par.?
vālmīkir bhagavān kartā samprāpto yajñasaṃnidhim / (19.2) Par.?
yenedaṃ caritaṃ tubhyam aśeṣaṃ saṃpradarśitam // (19.3) Par.?
ādiprabhṛti rājendra pañca sargaśatāni ca / (20.1) Par.?
pratiṣṭhā jīvitaṃ yāvat tāvad rājañśubhāśubham // (20.2) Par.?
yadi buddhiḥ kṛtā rājañśravaṇāya mahāratha / (21.1) Par.?
karmāntare kṣaṇībhūtastacchṛṇuṣva sahānujaḥ // (21.2) Par.?
bāḍham ityabravīd rāmastau cānujñāpya rāghavam / (22.1) Par.?
prahṛṣṭau jagmatur vāsaṃ yatrāsau munipuṃgavaḥ // (22.2) Par.?
rāmo 'pi munibhiḥ sārdhaṃ pārthivaiśca mahātmabhiḥ / (23.1) Par.?
śrutvā tad gītamādhuryaṃ karmaśālām upāgamat // (23.2) Par.?
Duration=0.17178893089294 secs.