Texts

vaiśaṃpāyana uvāca / (1.1) Par.?

etacchrutvā mahārāja dhṛtarāṣṭro 'mbikāsutaḥ / (1.2) Par.?

śokasyāntam apaśyan vai hataṃ matvā suyodhanam / (1.3) Par.?

vihvalaḥ patito bhūmau naṣṭacetā iva dvipaḥ // (1.4) Par.?

tasmin nipatite bhūmau vihvale rājasattame / (2.1) Par.?

ārtanādo mahān āsīt strīṇāṃ bharatasattama // (2.2) Par.?

sa śabdaḥ pṛthivīṃ sarvāṃ pūrayāmāsa sarvaśaḥ / (3.1) Par.?

śokārṇave mahāghore nimagnā bharatastriyaḥ // (3.2) Par.?

rājānaṃ ca samāsādya gāndhārī bharatarṣabha / (4.1) Par.?

niḥsaṃjñā patitā bhūmau sarvāṇy antaḥpurāṇi ca // (4.2) Par.?

tatas tāḥ saṃjayo rājan samāśvāsayad āturāḥ / (5.1) Par.?

muhyamānāḥ subahuśo muñcantyo vāri netrajam // (5.2) Par.?

samāśvastāḥ striyas tās tu vepamānā muhur muhuḥ / (6.1) Par.?

kadalya iva vātena dhūyamānāḥ samantataḥ // (6.2) Par.?

rājānaṃ viduraś cāpi prajñācakṣuṣam īśvaram / (7.1) Par.?

āśvāsayāmāsa tadā siñcaṃs toyena kauravam // (7.2) Par.?

sa labdhvā śanakaiḥ saṃjñāṃ tāś ca dṛṣṭvā striyo nṛpa / (8.1) Par.?

unmatta iva rājā sa sthitas tūṣṇīṃ viśāṃ pate // (8.2) Par.?

tato dhyātvā ciraṃ kālaṃ niḥśvasaṃś ca punaḥ punaḥ / (9.1) Par.?

svān putrān garhayāmāsa bahu mene ca pāṇḍavān // (9.2) Par.?

garhayitvātmano buddhiṃ śakuneḥ saubalasya ca / (10.1) Par.?

dhyātvā ca suciraṃ kālaṃ vepamāno muhur muhuḥ // (10.2) Par.?

saṃstabhya ca mano bhūyo rājā dhairyasamanvitaḥ / (11.1) Par.?

punar gāvalgaṇiṃ sūtaṃ paryapṛcchata saṃjayam // (11.2) Par.?

yat tvayā kathitaṃ vākyaṃ śrutaṃ saṃjaya tan mayā / (12.1) Par.?

kaccid duryodhanaḥ sūta na gato vai yamakṣayam / (12.2) Par.?

brūhi saṃjaya tattvena punar uktāṃ kathām imām // (12.3) Par.?

evam ukto 'bravīt sūto rājānaṃ janamejaya / (13.1) Par.?

hato vaikartano rājan saha putrair mahārathaiḥ / (13.2) Par.?

bhrātṛbhiś ca maheṣvāsaiḥ sūtaputrais tanutyajaiḥ // (13.3) Par.?

duḥśāsanaś ca nihataḥ pāṇḍavena yaśasvinā / (14.1) Par.?

pītaṃ ca rudhiraṃ kopād bhīmasenena saṃyuge // (14.2) Par.?