Texts

janamejaya uvāca / (1.1) Par.?

prāpya rājyaṃ mahātejā dharmarājo yudhiṣṭhiraḥ / (1.2) Par.?

yad anyad akarod vipra tanme vaktum ihārhasi // (1.3) Par.?

bhagavān vā hṛṣīkeśastrailokyasya paro guruḥ / (2.1) Par.?

ṛṣe yad akarod vīrastacca vyākhyātum arhasi // (2.2) Par.?

vaiśaṃpāyana uvāca / (3.1) Par.?

śṛṇu rājendra tattvena kīrtyamānaṃ mayānagha / (3.2) Par.?

vāsudevaṃ puraskṛtya yad akurvata pāṇḍavāḥ // (3.3) Par.?

prāpya rājyaṃ mahātejā dharmarājo yudhiṣṭhiraḥ / (4.1) Par.?

cāturvarṇyaṃ yathāyogaṃ sve sve dharme nyaveśayat // (4.2) Par.?

brāhmaṇānāṃ sahasraṃ ca snātakānāṃ mahātmanām / (5.1) Par.?

sahasraniṣkam ekaikaṃ vācayāmāsa pāṇḍavaḥ // (5.2) Par.?

tathānujīvino bhṛtyān saṃśritān atithīn api / (6.1) Par.?

kāmaiḥ saṃtarpayāmāsa kṛpaṇāṃstarkakān api // (6.2) Par.?

purohitāya dhaumyāya prādād ayutaśaḥ sa gāḥ / (7.1) Par.?

dhanaṃ suvarṇaṃ rajataṃ vāsāṃsi vividhāni ca // (7.2) Par.?

kṛpāya ca mahārāja guruvṛttim avartata / (8.1) Par.?

vidurāya ca dharmātmā pūjāṃ cakre yatavrataḥ // (8.2) Par.?

bhakṣānnapānair vividhair vāsobhiḥ śayanāsanaiḥ / (9.1) Par.?

sarvān saṃtoṣayāmāsa saṃśritān dadatāṃ varaḥ // (9.2) Par.?

labdhapraśamanaṃ kṛtvā sa rājā rājasattama / (10.1) Par.?

yuyutsor dhārtarāṣṭrasya pūjāṃ cakre mahāyaśāḥ // (10.2) Par.?

dhṛtarāṣṭrāya tad rājyaṃ gāndhāryai vidurāya ca / (11.1) Par.?

nivedya svasthavad rājann āste rājā yudhiṣṭhiraḥ // (11.2) Par.?

tathā sarvaṃ sa nagaraṃ prasādya janamejaya / (12.1) Par.?

vāsudevaṃ mahātmānam abhyagacchat kṛtāñjaliḥ // (12.2) Par.?

tato mahati paryaṅke maṇikāñcanabhūṣite / (13.1) Par.?

dadarśa kṛṣṇam āsīnaṃ nīlaṃ merāvivāmbudam // (13.2) Par.?

jājvalyamānaṃ vapuṣā divyābharaṇabhūṣitam / (14.1) Par.?

pītakauśeyasaṃvītaṃ hemnīvopahitaṃ maṇim // (14.2) Par.?

kaustubhena uraḥsthena maṇinābhivirājitam / (15.1) Par.?

udyatevodayaṃ śailaṃ sūryeṇāptakirīṭinam / (15.2) Par.?

naupamyaṃ vidyate yasya triṣu lokeṣu kiṃcana // (15.3) Par.?

so 'bhigamya mahātmānaṃ viṣṇuṃ puruṣavigraham / (16.1) Par.?

uvāca madhurābhāṣaḥ smitapūrvam idaṃ tadā // (16.2) Par.?

sukhena te niśā kaccid vyuṣṭā buddhimatāṃ vara / (17.1) Par.?

kaccijjñānāni sarvāṇi prasannāni tavācyuta // (17.2) Par.?

tava hyāśritya tāṃ devīṃ buddhiṃ buddhimatāṃ vara / (18.1) Par.?

vayaṃ rājyam anuprāptāḥ pṛthivī ca vaśe sthitā // (18.2) Par.?

bhavatprasādād bhagavaṃstrilokagativikrama / (19.1) Par.?

jayaḥ prāpto yaśaścāgryaṃ na ca dharmāccyutā vayam // (19.2) Par.?

taṃ tathā bhāṣamāṇaṃ tu dharmarājaṃ yudhiṣṭhiram / (20.1) Par.?

novāca bhagavān kiṃcid dhyānam evānvapadyata // (20.2) Par.?