Texts

śrībhagavānuvāca / (1.1) Par.?

athānyāmapi vakṣyāmi śobhanāṃ śubhasaptamīm / (1.2) Par.?

yāmupoṣya naro rogaśokaduḥkhaiḥ pramucyate // (1.3) Par.?

puṇyena cāśvayuje māsi kṛtasnānajapaḥ śuciḥ / (2.1) Par.?

vācayitvā tato viprānārabhecchubhasaptamīm // (2.2) Par.?

pūjayedbhaktyā gandhamālyānulepanaiḥ / (3.1) Par.?

namāmi sūryasambhūtām aśeṣabhuvanālayām / (3.2) Par.?

tvāmahaṃ śubhakalyāṇaśarīrāṃ sarvasiddhaye // (3.3) Par.?

atha kṛtvā tilaprasthaṃ tāmrapātreṇa saṃyutam / (4.1) Par.?

kāñcanaṃ vṛṣabhaṃ tadvad gandhamālyaguḍānvitaiḥ // (4.2) Par.?

phalair nānāvidhair bhakṣyairghṛtapāyasasaṃyutaiḥ / (5.1) Par.?

dadyāddvikālavelāyāmaryamā prīyatāmiti // (5.2) Par.?

pañcagavyaṃ ca saṃprāśya svapedbhūmau vimatsaraḥ / (6.1) Par.?

tataḥ prabhāte saṃjāte bhaktyā sampūjayeddvijān // (6.2) Par.?

anena vidhinā dadyānmāsi māsi sadā naraḥ / (7.1) Par.?

vāsasā vṛṣabhaṃ haimaṃ tadvadgāṃ kāñcanodbhavām // (7.2) Par.?

saṃvatsarānte śayanamikṣudaṇḍaguḍānvitam / (8.1) Par.?

sopadhānakaviśrāmaṃ bhājanāsanasaṃyutam // (8.2) Par.?

tāmrapātre tilaprasthaṃ sauvarṇaṃ vṛṣabhaṃ tathā / (9.1) Par.?

dadyādvedavide sarvaṃ viśvātmā prīyatāmiti // (9.2) Par.?

anena vidhinā vidvānkuryādyaḥ śubhasaptamīm / (10.1) Par.?

tasya śrīrvipulā kīrtirbhavejjanmani janmani // (10.2) Par.?

apsarogaṇagandharvaiḥ pūjyamānaḥ surālaye / (11.1) Par.?

vasedgaṇādhipo bhūtvā yāvadābhūtasaṃplavam / (11.2) Par.?

kalpādāvavatīrṇastu saptadvīpādhipo bhavet // (11.3) Par.?

brahmahatyāsahasrasya bhrūṇahatyāśatasya ca / (12.1) Par.?

nāśāyālamiyaṃ puṇyā paṭhyate śubhasaptamī // (12.2) Par.?

imāṃ paṭhedyaḥ śṛṇuyānmuhūrtaṃ paśyetprasaṅgādapi dīyamānam / (13.1) Par.?

so'pyatra sarvāghavimuktadehaḥ prāpnoti vidyādharanāyakatvam // (13.2) Par.?

yāvatsamāḥ sapta naraḥ karoti yaḥ saptamīṃ saptavidhānayuktām / (14.1) Par.?

sa saptalokādhipatiḥ krameṇa bhūtvā padaṃ yāti paraṃ murāreḥ // (14.2) Par.?