Texts

mārkaṇḍeya uvāca / (1.1) Par.?

tataḥ krośāntare pārtha vāsavaṃ tīrthamuttamam / (1.2) Par.?

vasubhiḥ sthāpitaṃ tatra sthitvā vai dvādaśābdakam // (1.3) Par.?

dharo dhruvaśca somaśca āpaścaivānilo 'nalaḥ / (2.1) Par.?

pratyūṣaśca prabhāsaśca vasavo 'ṣṭāvime purā // (2.2) Par.?

pitṛśāpaparikliṣṭā garbhavāsāya bhārata / (3.1) Par.?

nārmadaṃ tīrthamāsādya tapaścakruryatendriyāḥ // (3.2) Par.?

ārādhayantaḥ paramaṃ bhavānīpatim avyam / (4.1) Par.?

dvādaśābdāni rājendra tatastuṣṭo maheśvaraḥ // (4.2) Par.?

pratyakṣaḥ pradadau tebhyas tvabhīṣṭaṃ varamuttamam / (5.1) Par.?

tataḥ svanāmnā saṃsthāpya vasavastaṃ maheśvaram / (5.2) Par.?

jagmurākāśamāviśya prasanne sati śaṅkare // (5.3) Par.?

tataḥ prabhṛti vikhyātaṃ tīrthaṃ tadvāsavāhvayam / (6.1) Par.?

tasmiṃstīrthe mahārāja yo bhaktyā pūjayecchivam / (6.2) Par.?

yathālabdhopahāraiśca dīpaṃ dadyāt prayatnataḥ // (6.3) Par.?

śuklapakṣe tadāṣṭamyāṃ pratyahaṃ vāpi śaktitaḥ / (7.1) Par.?

aṣṭau varṣasahasrāṇi sa vasecchivasaṃnidhau // (7.2) Par.?

tataḥ śivālayaṃ yāti garbhavāsaṃ na paśyati / (8.1) Par.?

puṣpairvā pallavairvāpi phalairdhānyais tathāpi vā // (8.2) Par.?

pūjayeddevamīśānaṃ sa dainyaṃ nāpnuyāt kvacit / (9.1) Par.?

sarvaśokavinirmuktaḥ svargaloke mahīyate // (9.2) Par.?

ekāhamapi kaunteya yo vasedvāsaveśvare / (10.1) Par.?

pāparāśiṃ vinirdhūya bhānuvaddivi modate // (10.2) Par.?

viprāṃśca bhojayedbhaktyā dadyād vāsāṃsi dakṣiṇām // (11.1) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe vāsaveśvaratīrthamāhātmyavarṇanaṃ nāma trayoviṃśatyadhikadviśatatamo 'dhyāyaḥ // (12.1) Par.?