Texts

athātraiva tiṣṭhan saṃpraiṣam āha stṛṇīta barhiḥ pra vrataṃ yacchata sam apivratān hvayadhvam āstāvaṃ bahulaṃ stṛṇīta sadohavirdhāne bahule stṛṇītonnetar grāvṇo vāyavyāni droṇakalaśe daśāpavitre samavadhāya patnīśāle saṃsādayāgnīd ājyam adhiśraya pratiprasthātaḥ srucaḥ saṃmṛḍḍhy ājyenodehi pṛṣadājyāya dadhy āhareti // (1) Par.?

yathāsaṃpraiṣaṃ te kurvanti // (2) Par.?

atha dakṣiṇe vedyante barhirmuṣṭiṃ stṛṇāti devabarhir ūrṇāmradasaṃ tvā stṛṇāmi svāsasthaṃ devebhya iti // (3) Par.?

tāṃ bahulāṃ purastāt pratyañca stṛṇanto yanti // (4) Par.?

athāntaḥśālaṃ pṛṣadājyavanty ājyāni gṛhītvā parikarmibhya utpradāya brahmaṇe rājānam utprayacchati // (5) Par.?

taṃ brahmādāyottaratas tiṣṭhati // (6) Par.?

uttaratas tiṣṭhann agnim anvānayaty ud agne tiṣṭhānu mām udehi viśvair devair yajñiyaiḥ saṃvidānaḥ / (7.1) Par.?

suvarge loke yajamānaṃ hi dhehi māsyai hāsthā āhutyai yām upema iti // (7.2) Par.?

athābhyādadhātīdhmaṃ praṇayanīyam // (8) Par.?

upopayamanīḥ kalpayanti cātvālāt // (9) Par.?

samanvārabdheṣv apivrateṣu saṃpracchanneṣu gārhapatya ājyaṃ vilāpyotpūya sruci caturgṛhītaṃ gṛhītvā śālāmukhīye vaisarjanāni juhoti tvaṃ soma tanūkṛdbhyo dveṣobhyo 'nyakṛtebhya uru yantāsi varūthaṃ svāheti // (10) Par.?

sruveṇāptuṃ praskandayati juṣāṇo aptur ājyasya vetu svāheti // (11) Par.?

aparaṃ caturgṛhītaṃ gṛhītvā saṃpraiṣam āhāgnīṣomābhyāṃ praṇīyamānābhyām anubrūhīti // (12) Par.?

trir uktāyām udyacchante // (13) Par.?

hotur vaśaṃ yanti // (14) Par.?

atha vai bhavati // (15) Par.?

prāñcam agniṃ praharanty ut patnīm ānayanty anv anāṃsi pravartayantīti // (16) Par.?

yad asyātra śastraṃ bhavati pūrvaṃ tenāgnim anvavasyanti // (17) Par.?

athāgniprathamāḥ pratipadyante 'nvagrājñā cājyaiś cānvaggrāvṇo vāyavyāni // (18) Par.?

pūrvayā dvāropaniṣkrāmanty ayaṃ no agnir varivaḥ kṛṇotv ayaṃ mṛdhaḥ pura etu prabhindan / (19.1) Par.?

ayaṃ śatrūñ jayatu jarhṛṣāṇo 'yaṃ vājaṃ jayatu vājasātāv iti // (19.2) Par.?

uttareṇa sadaḥ parītyāgnīdhrāgāre 'gniṃ nidhāya nayavatyarcāgnīdhre juhoty agne naya supathā rāye asmān viśvāni deva vayunāni vidvān / (20.1) Par.?

yuyodhy asmaj juhurāṇam eno bhūyiṣṭhāṃ te namauktiṃ vidhema svāheti // (20.2) Par.?

atraivaitad grāvovāyavyaṃ samupasādyopātiyanti rājñā cājyaiś ca // (21) Par.?

āhavanīye sruvāhutiṃ juhoty uru viṣṇo vikramasvoru kṣayāya naḥ kṛdhi / (22.1) Par.?

ghṛtaṃ ghṛtayone piba pra pra yajñapatiṃ tira svāheti // (22.2) Par.?