Texts

rāmas tu sahasaumitriḥ sutīkṣṇenābhipūjitaḥ / (1.1) Par.?

pariṇāmya niśāṃ tatra prabhāte pratyabudhyata // (1.2) Par.?

utthāya tu yathākālaṃ rāghavaḥ saha sītayā / (2.1) Par.?

upāspṛśat suśītena jalenotpalagandhinā // (2.2) Par.?

atha te 'gniṃ surāṃś caiva vaidehī rāmalakṣmaṇau / (3.1) Par.?

kālyaṃ vidhivad abhyarcya tapasviśaraṇe vane // (3.2) Par.?

udayantaṃ dinakaraṃ dṛṣṭvā vigatakalmaṣāḥ / (4.1) Par.?

sutīkṣṇam abhigamyedaṃ ślakṣṇaṃ vacanam abruvan // (4.2) Par.?

sukhoṣitāḥ sma bhagavaṃs tvayā pūjyena pūjitāḥ / (5.1) Par.?

āpṛcchāmaḥ prayāsyāmo munayas tvarayanti naḥ // (5.2) Par.?

tvarāmahe vayaṃ draṣṭuṃ kṛtsnam āśramamaṇḍalam / (6.1) Par.?

ṛṣīṇāṃ puṇyaśīlānāṃ daṇḍakāraṇyavāsinām // (6.2) Par.?

abhyanujñātum icchāmaḥ sahaibhir munipuṃgavaiḥ / (7.1) Par.?

dharmanityais tapodāntair viśikhair iva pāvakaiḥ // (7.2) Par.?

aviṣahyātapo yāvat sūryo nātivirājate / (8.1) Par.?

amārgeṇāgatāṃ lakṣmīṃ prāpyevānvayavarjitaḥ // (8.2) Par.?

tāvad icchāmahe gantum ity uktvā caraṇau muneḥ / (9.1) Par.?

vavande sahasaumitriḥ sītayā saha rāghavaḥ // (9.2) Par.?

tau saṃspṛśantau caraṇāv utthāpya munipuṃgavaḥ / (10.1) Par.?

gāḍham āliṅgya sasneham idaṃ vacanam abravīt // (10.2) Par.?

ariṣṭaṃ gaccha panthānaṃ rāma saumitriṇā saha / (11.1) Par.?

sītayā cānayā sārdhaṃ chāyayevānuvṛttayā // (11.2) Par.?

paśyāśramapadaṃ ramyaṃ daṇḍakāraṇyavāsinām / (12.1) Par.?

eṣāṃ tapasvināṃ vīra tapasā bhāvitātmanām // (12.2) Par.?

suprājyaphalamūlāni puṣpitāni vanāni ca / (13.1) Par.?

praśāntamṛgayūthāni śāntapakṣigaṇāni ca // (13.2) Par.?

phullapaṅkajaṣaṇḍāni prasannasalilāni ca / (14.1) Par.?

kāraṇḍavavikīrṇāni taṭākāni sarāṃsi ca // (14.2) Par.?

drakṣyase dṛṣṭiramyāṇi giriprasravaṇāni ca / (15.1) Par.?

ramaṇīyāny araṇyāni mayūrābhirutāni ca // (15.2) Par.?

gamyatāṃ vatsa saumitre bhavān api ca gacchatu / (16.1) Par.?

āgantavyaṃ ca te dṛṣṭvā punar evāśramaṃ mama // (16.2) Par.?

evam uktas tathety uktvā kākutsthaḥ sahalakṣmaṇaḥ / (17.1) Par.?

pradakṣiṇaṃ muniṃ kṛtvā prasthātum upacakrame // (17.2) Par.?

tataḥ śubhatare tūṇī dhanuṣī cāyatekṣaṇā / (18.1) Par.?

dadau sītā tayor bhrātroḥ khaḍgau ca vimalau tataḥ // (18.2) Par.?

ābadhya ca śubhe tūṇī cāpau cādāya sasvanau / (19.1) Par.?

niṣkrāntāv āśramād gantum ubhau tau rāmalakṣmaṇau // (19.2) Par.?