Texts

pūrvajo 'py uktamātras tu lakṣmaṇena subhāṣitam / (1.1) Par.?

sāragrāhī mahāsāraṃ pratijagrāha rāghavaḥ // (1.2) Par.?

saṃnigṛhya mahābāhuḥ pravṛddhaṃ kopam ātmanaḥ / (2.1) Par.?

avaṣṭabhya dhanuś citraṃ rāmo lakṣmaṇam abravīt // (2.2) Par.?

kiṃ kariṣyāvahe vatsa kva vā gacchāva lakṣmaṇa / (3.1) Par.?

kenopāyena paśyeyaṃ sītām iti vicintaya // (3.2) Par.?

taṃ tathā paritāpārtaṃ lakṣmaṇo rāmam abravīt / (4.1) Par.?

idam eva janasthānaṃ tvam anveṣitum arhasi // (4.2) Par.?

rākṣasair bahubhiḥ kīrṇaṃ nānādrumalatāyutam / (5.1) Par.?

santīha giridurgāṇi nirdarāḥ kandarāṇi ca // (5.2) Par.?

guhāś ca vividhā ghorā nānāmṛgagaṇākulāḥ / (6.1) Par.?

āvāsāḥ kiṃnarāṇāṃ ca gandharvabhavanāni ca // (6.2) Par.?

tāni yukto mayā sārdhaṃ tvam anveṣitum arhasi / (7.1) Par.?

tvadvidhā buddhisampannā mahātmāno nararṣabha // (7.2) Par.?

āpatsu na prakampante vāyuvegair ivācalāḥ / (8.1) Par.?

ity uktas tad vanaṃ sarvaṃ vicacāra salakṣmaṇaḥ // (8.2) Par.?

kruddho rāmaḥ śaraṃ ghoraṃ saṃdhāya dhanuṣi kṣuram / (9.1) Par.?

tataḥ parvatakūṭābhaṃ mahābhāgaṃ dvijottamam // (9.2) Par.?

dadarśa patitaṃ bhūmau kṣatajārdraṃ jaṭāyuṣam / (10.1) Par.?

taṃ dṛṣṭvā giriśṛṅgābhaṃ rāmo lakṣmaṇam abravīt / (10.2) Par.?

anena sītā vaidehī bhakṣitā nātra saṃśayaḥ // (10.3) Par.?

gṛdhrarūpam idaṃ vyaktaṃ rakṣo bhramati kānanam / (11.1) Par.?

bhakṣayitvā viśālākṣīm āste sītāṃ yathāsukham / (11.2) Par.?

enaṃ vadhiṣye dīptāgrair ghorair bāṇair ajihmagaiḥ // (11.3) Par.?

ity uktvābhyapatad gṛdhraṃ saṃdhāya dhanuṣi kṣuram / (12.1) Par.?

kruddho rāmaḥ samudrāntāṃ cālayann iva medinīm // (12.2) Par.?

taṃ dīnadīnayā vācā saphenaṃ rudhiraṃ vaman / (13.1) Par.?

abhyabhāṣata pakṣī tu rāmaṃ daśarathātmajam // (13.2) Par.?

yām oṣadhim ivāyuṣmann anveṣasi mahāvane / (14.1) Par.?

sā devī mama ca prāṇā rāvaṇenobhayaṃ hṛtam // (14.2) Par.?

tvayā virahitā devī lakṣmaṇena ca rāghava / (15.1) Par.?

hriyamāṇā mayā dṛṣṭā rāvaṇena balīyasā // (15.2) Par.?

sītām abhyavapanno 'haṃ rāvaṇaś ca raṇe mayā / (16.1) Par.?

vidhvaṃsitarathacchattraḥ pātito dharaṇītale // (16.2) Par.?

etad asya dhanur bhagnam etad asya śarāvaram / (17.1) Par.?

ayam asya raṇe rāma bhagnaḥ sāṃgrāmiko rathaḥ // (17.2) Par.?

pariśrāntasya me pakṣau chittvā khaḍgena rāvaṇaḥ / (18.1) Par.?

sītām ādāya vaidehīm utpapāta vihāyasam / (18.2) Par.?

rakṣasā nihataṃ pūrvaṃ na māṃ hantuṃ tvam arhasi // (18.3) Par.?

rāmas tasya tu vijñāya sītāsaktāṃ priyāṃ kathām / (19.1) Par.?

gṛdhrarājaṃ pariṣvajya ruroda sahalakṣmaṇaḥ // (19.2) Par.?

ekam ekāyane durge niḥśvasantaṃ kathaṃcana / (20.1) Par.?

samīkṣya duḥkhito rāmaḥ saumitrim idam abravīt // (20.2) Par.?

rājyād bhraṃśo vane vāsaḥ sītā naṣṭā hato dvijaḥ / (21.1) Par.?

īdṛśīyaṃ mamālakṣmīr nirdahed api pāvakam // (21.2) Par.?

sampūrṇam api ced adya pratareyaṃ mahodadhim / (22.1) Par.?

so 'pi nūnaṃ mamālakṣmyā viśuṣyet saritāṃ patiḥ // (22.2) Par.?

nāsty abhāgyataro loke matto 'smin sacarācare / (23.1) Par.?

yeneyaṃ mahatī prāptā mayā vyasanavāgurā // (23.2) Par.?

ayaṃ pitṛvayasyo me gṛdhrarājo jarānvitaḥ / (24.1) Par.?

śete vinihato bhūmau mama bhāgyaviparyayāt // (24.2) Par.?

ity evam uktvā bahuśo rāghavaḥ sahalakṣmaṇaḥ / (25.1) Par.?

jaṭāyuṣaṃ ca pasparśa pitṛsnehaṃ nidarśayan // (25.2) Par.?

nikṛttapakṣaṃ rudhirāvasiktaṃ taṃ gṛdhrarājaṃ parirabhya rāmaḥ / (26.1) Par.?

kva maithili prāṇasamā mameti vimucya vācaṃ nipapāta bhūmau // (26.2) Par.?