Texts

sa tasya madhye bhavanasya vānaro latāgṛhāṃścitragṛhānniśāgṛhān / (1.1) Par.?

jagāma sītāṃ prati darśanotsuko na caiva tāṃ paśyati cārudarśanām // (1.2) Par.?

sa cintayāmāsa tato mahākapiḥ priyām apaśyan raghunandanasya tām / (2.1) Par.?

dhruvaṃ nu sītā mriyate yathā na me vicinvato darśanam eti maithilī // (2.2) Par.?

sā rākṣasānāṃ pravareṇa bālā svaśīlasaṃrakṣaṇatatparā satī / (3.1) Par.?

anena nūnaṃ pratiduṣṭakarmaṇā hatā bhaved āryapathe pare sthitā // (3.2) Par.?

virūparūpā vikṛtā vivarcaso mahānanā dīrghavirūpadarśanāḥ / (4.1) Par.?

samīkṣya sā rākṣasarājayoṣito bhayād vinaṣṭā janakeśvarātmajā // (4.2) Par.?

sītām adṛṣṭvā hyanavāpya pauruṣaṃ vihṛtya kālaṃ saha vānaraiściram / (5.1) Par.?

na me 'sti sugrīvasamīpagā gatiḥ sutīkṣṇadaṇḍo balavāṃśca vānaraḥ // (5.2) Par.?

dṛṣṭam antaḥpuraṃ sarvaṃ dṛṣṭvā rāvaṇayoṣitaḥ / (6.1) Par.?

na sītā dṛśyate sādhvī vṛthā jāto mama śramaḥ // (6.2) Par.?

kiṃ nu māṃ vānarāḥ sarve gataṃ vakṣyanti saṃgatāḥ / (7.1) Par.?

gatvā tatra tvayā vīra kiṃ kṛtaṃ tad vadasva naḥ // (7.2) Par.?

adṛṣṭvā kiṃ pravakṣyāmi tām ahaṃ janakātmajām / (8.1) Par.?

dhruvaṃ prāyam upeṣyanti kālasya vyativartane // (8.2) Par.?

kiṃ vā vakṣyati vṛddhaśca jāmbavān aṅgadaśca saḥ / (9.1) Par.?

gataṃ pāraṃ samudrasya vānarāśca samāgatāḥ // (9.2) Par.?

anirvedaḥ śriyo mūlam anirvedaḥ paraṃ sukham / (10.1) Par.?

bhūyastāvad viceṣyāmi na yatra vicayaḥ kṛtaḥ // (10.2) Par.?

anirvedo hi satataṃ sarvārtheṣu pravartakaḥ / (11.1) Par.?

karoti saphalaṃ jantoḥ karma yacca karoti saḥ // (11.2) Par.?

tasmād anirvedakṛtaṃ yatnaṃ ceṣṭe 'ham uttamam / (12.1) Par.?

adṛṣṭāṃśca viceṣyāmi deśān rāvaṇapālitān // (12.2) Par.?

āpānaśālā vicitāstathā puṣpagṛhāṇi ca / (13.1) Par.?

citraśālāśca vicitā bhūyaḥ krīḍāgṛhāṇi ca // (13.2) Par.?

niṣkuṭāntararathyāśca vimānāni ca sarvaśaḥ / (14.1) Par.?

iti saṃcintya bhūyo 'pi vicetum upacakrame // (14.2) Par.?

bhūmīgṛhāṃś caityagṛhān gṛhātigṛhakān api / (15.1) Par.?

utpatannipataṃścāpi tiṣṭhan gacchan punaḥ kvacit // (15.2) Par.?

apāvṛṇvaṃśca dvārāṇi kapāṭānyavaghaṭṭayan / (16.1) Par.?

praviśanniṣpataṃścāpi prapatann utpatann api / (16.2) Par.?

sarvam apyavakāśaṃ sa vicacāra mahākapiḥ // (16.3) Par.?

caturaṅgulamātro 'pi nāvakāśaḥ sa vidyate / (17.1) Par.?

rāvaṇāntaḥpure tasmin yaṃ kapir na jagāma saḥ // (17.2) Par.?

prākarāntararathyāśca vedikāścaityasaṃśrayāḥ / (18.1) Par.?

śvabhrāśca puṣkariṇyaśca sarvaṃ tenāvalokitam // (18.2) Par.?

rākṣasyo vividhākārā virūpā vikṛtāstathā / (19.1) Par.?

dṛṣṭā hanūmatā tatra na tu sā janakātmajā // (19.2) Par.?

rūpeṇāpratimā loke varā vidyādharastriyaḥ / (20.1) Par.?

dṛṣṭā hanūmatā tatra na tu rāghavanandinī // (20.2) Par.?

nāgakanyā varārohāḥ pūrṇacandranibhānanāḥ / (21.1) Par.?

dṛṣṭā hanūmatā tatra na tu sītā sumadhyamā // (21.2) Par.?

pramathya rākṣasendreṇa nāgakanyā balāddhṛtāḥ / (22.1) Par.?

dṛṣṭā hanūmatā tatra na sā janakanandinī // (22.2) Par.?

so 'paśyaṃstāṃ mahābāhuḥ paśyaṃścānyā varastriyaḥ / (23.1) Par.?

viṣasāda mahābāhur hanūmānmārutātmajaḥ // (23.2) Par.?

udyogaṃ vānarendrāṇāṃ plavanaṃ sāgarasya ca / (24.1) Par.?

vyarthaṃ vīkṣyānilasutaścintāṃ punar upāgamat // (24.2) Par.?

avatīrya vimānācca hanūmānmārutātmajaḥ / (25.1) Par.?

cintām upajagāmātha śokopahatacetanaḥ // (25.2) Par.?