Texts

pratiprayāte kākutsthe mahendraḥ pākaśāsanaḥ / (1.1) Par.?

abravīt paramaprīto rāghavaṃ prāñjaliṃ sthitam // (1.2) Par.?

amoghaṃ darśanaṃ rāma tavāsmākaṃ paraṃtapa / (2.1) Par.?

prītiyukto 'smi tena tvaṃ brūhi yanmanasecchasi // (2.2) Par.?

evam uktastu kākutsthaḥ pratyuvāca kṛtāñjaliḥ / (3.1) Par.?

lakṣmaṇena saha bhrātrā sītayā cāpi bhāryayā // (3.2) Par.?

yadi prītiḥ samutpannā mayi sarvasureśvara / (4.1) Par.?

vakṣyāmi kuru me satyaṃ vacanaṃ vadatāṃ vara // (4.2) Par.?

mama hetoḥ parākrāntā ye gatā yamasādanam / (5.1) Par.?

te sarve jīvitaṃ prāpya samuttiṣṭhantu vānarāḥ // (5.2) Par.?

matpriyeṣvabhiraktāśca na mṛtyuṃ gaṇayanti ca / (6.1) Par.?

tvatprasādāt sameyuste varam etad ahaṃ vṛṇe // (6.2) Par.?

nīrujānnirvraṇāṃścaiva sampannabalapauruṣān / (7.1) Par.?

golāṅgūlāṃstathaivarkṣān draṣṭum icchāmi mānada // (7.2) Par.?

akāle cāpi mukhyāni mūlāni ca phalāni ca / (8.1) Par.?

nadyaśca vimalāstatra tiṣṭheyur yatra vānarāḥ // (8.2) Par.?

śrutvā tu vacanaṃ tasya rāghavasya mahātmanaḥ / (9.1) Par.?

mahendraḥ pratyuvācedaṃ vacanaṃ prītilakṣaṇam // (9.2) Par.?

mahān ayaṃ varastāta tvayokto raghunandana / (10.1) Par.?

samutthāsyanti harayaḥ suptā nidrākṣaye yathā // (10.2) Par.?

suhṛdbhir bāndhavaiścaiva jñātibhiḥ svajanena ca / (11.1) Par.?

sarva eva sameṣyanti saṃyuktāḥ parayā mudā // (11.2) Par.?

akāle puṣpaśabalāḥ phalavantaśca pādapāḥ / (12.1) Par.?

bhaviṣyanti maheṣvāsa nadyaśca salilāyutāḥ // (12.2) Par.?

savraṇaiḥ prathamaṃ gātraiḥ saṃvṛtair nirvraṇaiḥ punaḥ / (13.1) Par.?

babhūvur vānarāḥ sarve kim etad iti vismitāḥ // (13.2) Par.?

kākutsthaṃ paripūrṇārthaṃ dṛṣṭvā sarve surottamāḥ / (14.1) Par.?

ūcuste prathamaṃ stutvā stavārhaṃ sahalakṣmaṇam // (14.2) Par.?

gacchāyodhyām ito vīra visarjaya ca vānarān / (15.1) Par.?

maithilīṃ sāntvayasvainām anuraktāṃ tapasvinīm // (15.2) Par.?

bhrātaraṃ paśya bharataṃ tvacchokād vratacāriṇam / (16.1) Par.?

abhiṣecaya cātmānaṃ paurān gatvā praharṣaya // (16.2) Par.?

evam uktvā tam āmantrya rāmaṃ saumitriṇā saha / (17.1) Par.?

vimānaiḥ sūryasaṃkāśair hṛṣṭā jagmuḥ surā divam // (17.2) Par.?

abhivādya ca kākutsthaḥ sarvāṃstāṃstridaśottamān / (18.1) Par.?

lakṣmaṇena saha bhrātrā vāsam ājñāpayat tadā // (18.2) Par.?

tatastu sā lakṣmaṇarāmapālitā mahācamūr hṛṣṭajanā yaśasvinī / (19.1) Par.?

śriyā jvalantī virarāja sarvato niśāpraṇīteva hi śītaraśminā // (19.2) Par.?