Texts

saṃjaya uvāca / (1.1) Par.?

tasmiṃstathā vartamāne karṇarākṣasayor mṛdhe / (1.2) Par.?

alāyudho rākṣasendro vīryavān abhyavartata // (1.3) Par.?

mahatyā senayā yuktaḥ suyodhanam upāgamat / (2.1) Par.?

rākṣasānāṃ virūpāṇāṃ sahasraiḥ parivāritaḥ / (2.2) Par.?

nānārūpadharair vīraiḥ pūrvavairam anusmaran // (2.3) Par.?

tasya jñātir hi vikrānto brāhmaṇādo bako hataḥ / (3.1) Par.?

kirmīraśca mahātejā hiḍimbaśca sakhā tathā // (3.2) Par.?

sa dīrghakālādhyuṣitaṃ pūrvavairam anusmaran / (4.1) Par.?

vijñāyaitanniśāyuddhaṃ jighāṃsur bhīmam āhave // (4.2) Par.?

sa matta iva mātaṅgaḥ saṃkruddha iva coragaḥ / (5.1) Par.?

duryodhanam idaṃ vākyam abravīd yuddhalālasaḥ // (5.2) Par.?

viditaṃ te mahārāja yathā bhīmena rākṣasāḥ / (6.1) Par.?

hiḍimbabakakirmīrā nihatā mama bāndhavāḥ // (6.2) Par.?

parāmarśaśca kanyāyā hiḍimbāyāḥ kṛtaḥ purā / (7.1) Par.?

kim anyad rākṣasān anyān asmāṃśca paribhūya ha // (7.2) Par.?

tam ahaṃ sagaṇaṃ rājan savājirathakuñjaram / (8.1) Par.?

haiḍimbaṃ ca sahāmātyaṃ hantum abhyāgataḥ svayam // (8.2) Par.?

adya kuntīsutān sarvān vāsudevapurogamān / (9.1) Par.?

hatvā saṃbhakṣayiṣyāmi sarvair anucaraiḥ saha / (9.2) Par.?

nivāraya balaṃ sarvaṃ vayaṃ yotsyāma pāṇḍavān // (9.3) Par.?

tasya tad vacanaṃ śrutvā hṛṣṭo duryodhanastadā / (10.1) Par.?

pratipūjyābravīd vākyaṃ bhrātṛbhiḥ parivāritaḥ // (10.2) Par.?

tvāṃ puraskṛtya sagaṇaṃ vayaṃ yotsyāmahe parān / (11.1) Par.?

na hi vairāntamanasaḥ sthāsyanti mama sainikāḥ // (11.2) Par.?

evam astviti rājānam uktvā rākṣasapuṃgavaḥ / (12.1) Par.?

abhyayāt tvarito bhīmaṃ sahitaḥ puruṣāśanaiḥ // (12.2) Par.?

dīpyamānena vapuṣā rathenādityavarcasā / (13.1) Par.?

tādṛśenaiva rājendra yādṛśena ghaṭotkacaḥ // (13.2) Par.?

tasyāpyatulanirghoṣo bahutoraṇacitritaḥ / (14.1) Par.?

ṛkṣacarmāvanaddhāṅgo nalvamātro mahārathaḥ // (14.2) Par.?

tasyāpi turagāḥ śīghrā hastikāyāḥ kharasvanāḥ / (15.1) Par.?

śataṃ yuktā mahākāyā māṃsaśoṇitabhojanāḥ // (15.2) Par.?

tasyāpi rathanirghoṣo mahāmegharavopamaḥ / (16.1) Par.?

tasyāpi sumahaccāpaṃ dṛḍhajyaṃ balavattaram // (16.2) Par.?

tasyāpyakṣasamā bāṇā rukmapuṅkhāḥ śilāśitāḥ / (17.1) Par.?

so 'pi vīro mahābāhur yathaiva sa ghaṭotkacaḥ // (17.2) Par.?

tasyāpi gomāyubaḍābhigupto babhūva ketur jvalanārkatulyaḥ / (18.1) Par.?

sa cāpi rūpeṇa ghaṭotkacasya śrīmattamo vyākuladīpitāsyaḥ // (18.2) Par.?

dīptāṅgado dīptakirīṭamālī baddhasraguṣṇīṣanibaddhakhaḍgaḥ / (19.1) Par.?

gadī bhuśuṇḍī musalī halī ca śarāsanī vāraṇatulyavarṣmā // (19.2) Par.?

rathena tenānalavarcasā ca vidrāvayan pāṇḍavavāhinīṃ tām / (20.1) Par.?

rarāja saṃkhye parivartamāno vidyunmālī megha ivāntarikṣe // (20.2) Par.?

te cāpi sarve pravarā narendrā mahābalā varmiṇaścarmiṇaśca / (21.1) Par.?

harṣānvitā yuyudhustatra rājan samantataḥ pāṇḍavayodhavīrāḥ // (21.2) Par.?