Texts

brāhmaṇa uvāca / (1.1) Par.?

āścaryaṃ nātra saṃdehaḥ suprīto 'smi bhujaṃgama / (1.2) Par.?

anvarthopagatair vākyaiḥ panthānaṃ cāsmi darśitaḥ // (1.3) Par.?

svasti te 'stu gamiṣyāmi sādho bhujagasattama / (2.1) Par.?

smaraṇīyo 'smi bhavatā saṃpreṣaṇaniyojanaiḥ // (2.2) Par.?

nāga uvāca / (3.1) Par.?

anuktvā madgataṃ kāryaṃ kvedānīṃ prasthito bhavān / (3.2) Par.?

ucyatāṃ dvija yat kāryaṃ yadarthaṃ tvam ihāgataḥ // (3.3) Par.?

uktānukte kṛte kārye mām āmantrya dvijarṣabha / (4.1) Par.?

mayā pratyabhyanujñātastato yāsyasi brāhmaṇa // (4.2) Par.?

na hi māṃ kevalaṃ dṛṣṭvā tyaktvā praṇayavān iha / (5.1) Par.?

gantum arhasi viprarṣe vṛkṣamūlagato yathā // (5.2) Par.?

tvayi cāhaṃ dvijaśreṣṭha bhavānmayi na saṃśayaḥ / (6.1) Par.?

loko 'yaṃ bhavataḥ sarvaḥ kā cintā mayi te 'nagha // (6.2) Par.?

brāhmaṇa uvāca / (7.1) Par.?

evam etanmahāprājña vijñātārtha bhujaṃgama / (7.2) Par.?

nātiriktāstvayā devāḥ sarvathaiva yathātatham // (7.3) Par.?

ya evāhaṃ sa eva tvam evam etad bhujaṃgama / (8.1) Par.?

ahaṃ bhavāṃśca bhūtāni sarve sarvatragāḥ sadā // (8.2) Par.?

āsīt tu me bhogapate saṃśayaḥ puṇyasaṃcaye / (9.1) Par.?

so 'ham uñchavrataṃ sādho cariṣyāmyarthadarśanam // (9.2) Par.?

eṣa me niścayaḥ sādho kṛtaḥ kāraṇavattaraḥ / (10.1) Par.?

āmantrayāmi bhadraṃ te kṛtārtho 'smi bhujaṃgama // (10.2) Par.?