Texts

vaiśaṃpāyana uvāca / (1.1) Par.?

evam uktastu rājñā sa viduro buddhisattamaḥ / (1.2) Par.?

dhṛtarāṣṭram upetyedaṃ vākyam āha mahārthavat // (1.3) Par.?

ukto yudhiṣṭhiro rājā bhavadvacanam āditaḥ / (2.1) Par.?

sa ca saṃśrutya vākyaṃ te praśaśaṃsa mahādyutiḥ // (2.2) Par.?

bībhatsuśca mahātejā nivedayati te gṛhān / (3.1) Par.?

vasu tasya gṛhe yacca prāṇān api ca kevalān // (3.2) Par.?

dharmarājaśca putraste rājyaṃ prāṇān dhanāni ca / (4.1) Par.?

anujānāti rājarṣe yaccānyad api kiṃcana // (4.2) Par.?

bhīmastu sarvaduḥkhāni saṃsmṛtya bahulānyuta / (5.1) Par.?

kṛcchrād iva mahābāhur anumanye viniḥśvasan // (5.2) Par.?

sa rājñā dharmaśīlena bhrātrā bībhatsunā tathā / (6.1) Par.?

anunīto mahābāhuḥ sauhṛde sthāpito 'pi ca // (6.2) Par.?

na ca manyustvayā kārya iti tvāṃ prāha dharmarāṭ / (7.1) Par.?

saṃsmṛtya bhīmastad vairaṃ yad anyāyavad ācaret // (7.2) Par.?

evaṃprāyo hi dharmo 'yaṃ kṣatriyāṇāṃ narādhipa / (8.1) Par.?

yuddhe kṣatriyadharme ca nirato 'yaṃ vṛkodaraḥ // (8.2) Par.?

vṛkodarakṛte cāham arjunaśca punaḥ punaḥ / (9.1) Par.?

prasādayāva nṛpate bhavān prabhur ihāsti yat // (9.2) Par.?

pradadātu bhavān vittaṃ yāvad icchasi pārthiva / (10.1) Par.?

tvam īśvaro no rājyasya prāṇānāṃ ceti bhārata // (10.2) Par.?

brahmadeyāgrahārāṃśca putrāṇāṃ caurdhvadehikam / (11.1) Par.?

ito ratnāni gāścaiva dāsīdāsam ajāvikam // (11.2) Par.?

ānayitvā kuruśreṣṭho brāhmaṇebhyaḥ prayacchatu / (12.1) Par.?

dīnāndhakṛpaṇebhyaśca tatra tatra nṛpājñayā // (12.2) Par.?

bahvannarasapānāḍhyāḥ sabhā vidura kāraya / (13.1) Par.?

gavāṃ nipānānyanyacca vividhaṃ puṇyakarma yat // (13.2) Par.?

iti mām abravīd rājā pārthaścaiva dhanaṃjayaḥ / (14.1) Par.?

yad atrānantaraṃ kāryaṃ tad bhavān vaktum arhati // (14.2) Par.?

ityukto vidureṇātha dhṛtarāṣṭro 'bhinandya tat / (15.1) Par.?

manaścakre mahādāne kārttikyāṃ janamejaya // (15.2) Par.?