Texts

vākyam āgamalakṣaṇaṃ purāṇetihāsādigītam // (1.1) Par.?

yathāha mahābhāratādau bhagavān vyāsamuniḥ / (2.1) Par.?

sa śivas tāta tejasvī prasādād yāti te 'grataḥ / (2.2) Par.?

sendrādiṣu ca deveṣu tasyaivaiśvaryam ucyate // (2.3) Par.?

taṃ gaccha śaraṇaṃ devadevādiṃ bhuvaneśvaram / (3.1) Par.?

ityādi // (3.2) Par.?

śrutāv api / (4.1) Par.?

yo rudro 'gnau yo 'psu ya oṣadhīṣu yo vanaspatiṣu / (4.2) Par.?

yo rudro viśvā bhuvanā viveśa tasmai rudrāya namo 'stu // (4.3) Par.?

tathā / (5.1) Par.?

tryambakaṃ yajāmahe / (5.2) Par.?

ityādi // (5.3) Par.?

tad etad anyathāsiddham atra hi paurvāparyaparyālocanānirākṛto yathāśrutaśrutisamutpādito vākyārthaḥ // (6) Par.?

ato naiva pratītimātrāvipralabdhabuddhayas tatheti pratipattiṃ bhāvayanti // (7) Par.?

tathā kila viṣaṃ bhakṣaya mā cāsya gṛhe bhuṅkthāḥ ity atra viṣabhakṣaṇe 'bhyanujñānaṃ śrūyamāṇam api na vākyārthaḥ // (8) Par.?

kiṃ tarhi // (9) Par.?

pratikūlagṛhabhojananiṣedha eva tātparyam // (10) Par.?

evaṃ bhāratādāv upākhyānadvāreṇa sodyogasya vijigīṣor dviṣadupaśamo nirvighnaḥ kṣatriyāṇāṃ ca svadharmānuṣṭhānam abhyudayāyety evam arthaḥ stutivādaḥ // (11) Par.?

śrutau tu mantrārthavādapadānāṃ kāryātiśayāvedanaṃ vinā puruṣāpravṛtteḥ śraddhāvahavividhābhyudayajñānopajananapratītyaṅgatvaṃ na svarūpayāthārthyam ity aṅgatvam iti na taduktimātrād viśiṣṭadevatāsadbhāvāvedakatvam // (12) Par.?

tathā cāhuḥ / (13.1) Par.?

stutivādakṛtaś caiṣa janānāṃ mativibhramaḥ / (13.2) Par.?

paurvāparyāparāmṛṣṭaḥ śabdo 'nyāṃ kurute mitim // (13.3) Par.?

iti // (14) Par.?

atha sakalalokasiddhā prasiddhir anapahnavanīyā vidyate yat sarvo hy ayam āvidvadaṅganābālo janaḥ parameśvarasyecchāvidhipreritaḥ pravartate daivam evātra kāraṇam iti bruvāṇo dṛśyate ca upākhyānāni ca dakṣamakhamathanakāladamanakāmadāhāndhakavadhatrailokyākramaṇādyuparacitāni bahuśaḥ paṭhantaḥ kathayantaḥ śṛṇvantaś copalabhyante taduddeśena cārthaviniyoganiyamajapatapaḥprabhṛtikleśakāriṇīm api karmapaddhatim anutiṣṭhanto 'smān avagamayanti yad uta santi devatāviśeṣā ity āha // (15) Par.?