Texts

yad uktaṃ vyaktāvyaktajñavijñānān mokṣaḥ prāpyata iti // (1) Par.?

tatra vyaktād anantaram avyaktaṃ pañcabhiḥ kāraṇair adhigatam // (2) Par.?

avyaktavat puruṣo 'pi sūkṣmastasyādhunānumitāstitvaṃ pratikriyate 'sti puruṣaḥ // (3) Par.?

kasmāt // (4) Par.?

saṃghātaparārthatvāt // (5) Par.?

yo 'yaṃ mahadādisaṃghātaḥ sa puruṣārthaḥ // (6) Par.?

ityanumīyate 'cetanatvāt paryaṅkavad yathā paryaṅkaḥ pratyekaṃ gātrotpalakapādapīṭhatūlīpracchādanapaṭopadhānasaṃghātaḥ parārtho na hi svārthaḥ // (7) Par.?

paryaṅkasya na hi kiṃcid api gātrotpalādyavayavānāṃ parasparaṃ kṛtyam asti // (8) Par.?

ato 'vagamyate // (9) Par.?

asti puruṣo yaḥ paryaṅke śete yasyārthaṃ paryaṅkaḥ // (10) Par.?

tat parārtham idaṃ śarīraṃ pañcānāṃ mahābhūtānāṃ saṃghāto vartate // (11) Par.?

asti puruṣo yasyedaṃ bhogyaṃ śarīraṃ bhogyamahadādisaṃghātarūpaṃ samutpannam iti // (12) Par.?

itaścātmāsti triguṇādiviparyayāt // (13) Par.?

yad uktaṃ pūrvasyām āryāyāṃ triguṇam aviveki viṣaya ityādi tasmād viparyayāt // (14) Par.?

yenoktaṃ tadviparītastathā ca pumān // (15) Par.?

adhiṣṭhānāt // (16) Par.?

yatheha laṅghanaplavanadhāvanasamarthair aśvair yukto rathaḥ sārathinādhiṣṭhitaḥ pravartate // (17) Par.?

tathātmādhiṣṭhānāccharīram iti // (18) Par.?

tathā coktaṃ ṣaṣṭitantre puruṣādhiṣṭhitaṃ pradhānaṃ pravartate // (19) Par.?

ato 'styātmā bhoktṛtvāt // (20) Par.?

yathā madhurāmlalavaṇakaṭutiktakaṣāyaṣaḍrasopabṛṃhitasya saṃyuktasyānnasya sādhyata evaṃ mahadādiliṅgasya bhoktṛtvābhāvād asti sa ātmā yasyedaṃ bhogyaṃ śarīram iti // (21) Par.?

itaśca kaivalyārthaṃ pravṛtteś ca // (22) Par.?

kevalasya bhāvaḥ kaivalyam // (23) Par.?

tannimittaṃ yā ca pravṛttistasyāḥ svakaivalyārthaṃ pravṛtteḥ sakāśād anumīyate 'styātmeti yataḥ sarvo vidvān avidvāṃśca saṃsārakṣayam icchati // (24) Par.?

evam ebhir hetubhir astyātmā śarīrād vyatiriktaḥ // (25) Par.?

atha sa kim ekaḥ sarvaśarīre 'dhiṣṭhātā maṇirasanātmakasūtravad āhosvid bahava ātmānaḥ pratiśarīram adhiṣṭhātāra ityatrocyate // (26) Par.?