Texts

athādhvano 'sya prakṛta upayogaḥ prakāśyate // (1.1) Par.?

itthamadhvā samasto 'yaṃ yathā saṃvidi saṃsthitaḥ / (2.1) Par.?

taddvārā śūnyadhīprāṇanāḍīcakratanuṣvatho // (2.2) Par.?

bahiśca liṅgamūrtyagnisthaṇḍilādiṣu sarvataḥ / (3.1) Par.?

tathā sthitaḥ samastaśca vyastaścaiṣa kramākramāt // (3.2) Par.?

āsaṃvittattvam ābāhyaṃ yo 'yamadhvā vyavasthitaḥ / (4.1) Par.?

tatra tatrocitaṃ rūpaṃ svaṃ svātantryeṇa bhāsayet // (4.2) Par.?

sarvaṃ sarvatra rūpaṃ ca tasyāpi na na bhāsate / (5.1) Par.?

nahyavaccheditāṃ kvāpi svapne 'pi viṣahāmahe // (5.2) Par.?

evaṃ viśvādhvasampūrṇaṃ kālavyāpāracitritam / (6.1) Par.?

deśakālamayaspandasadma dehaṃ vilokayet // (6.2) Par.?

tathā vilokyamāno 'sau viśvāntardevatāmayaḥ / (7.1) Par.?

dhyeyaḥ pūjyaśca tarpyaśca tadāviṣṭo vimucyate // (7.2) Par.?

itthaṃ ghaṭaṃ paṭaṃ liṅgaṃ sthaṇḍilaṃ pustakaṃ jalam / (8.1) Par.?

yadvā kiṃcitkvacitpaśyettatra tanmayatāṃ vrajet // (8.2) Par.?

tatrārpaṇaṃ hi vastūnāmabhedenārcanaṃ matam / (9.1) Par.?

tathā sampūrṇarūpatvānusaṃdhir dhyānamucyate // (9.2) Par.?

sampūrṇatvānusaṃdhānam akampaṃ dārḍhyamānayan / (10.1) Par.?

tathāntarjalpayogena vimṛśañjapabhājanam // (10.2) Par.?

tatrārpitānāṃ bhāvānāṃ svakabhedavilāpanam / (11.1) Par.?

kurvaṃstadraśmisadbhāvaṃ dadyāddhomakriyāparaḥ // (11.2) Par.?

tathaivaṃ kurvataḥ sarvaṃ samabhāvena paśyataḥ / (12.1) Par.?

niṣkampatā vrataṃ śuddhaṃ sāmyaṃ nandiśikhoditam // (12.2) Par.?

tathārcanajapadhyānahomavratavidhikramāt / (13.1) Par.?

paripūrṇāṃ sthitiṃ prāhuḥ samādhiṃ guravaḥ purā // (13.2) Par.?

atra pūjājapādyeṣu bahirantardvayasthitau / (14.1) Par.?

dravyaughe na vidhiḥ ko 'pi na kāpi pratiṣiddhatā // (14.2) Par.?

kalpanāśuddhisaṃdhyādernopayogo 'tra kaścana / (15.1) Par.?

uktaṃ śrītrikasūtre ca jāyate yajanaṃ prati // (15.2) Par.?

avidhijño vidhijñaś cety evamādi suvistaram / (16.1) Par.?

yadā yathā yena yatra svā saṃvittiḥ prasīdati // (16.2) Par.?

tadā tathā tena tatra tattadbhogyaṃ vidhiśca saḥ / (17.1) Par.?

laukikālaukikaṃ sarvaṃ tenātra viniyojayet // (17.2) Par.?

niṣkampatve sakampastu kampaṃ nirhrāsayedbalāt / (18.1) Par.?

yathā yenābhyupāyena kramādakramato 'pi vā // (18.2) Par.?

vicikitsā galatyantastathāsau yatnavānbhavet / (19.1) Par.?

dhīkarmākṣagatā devīrniṣiddhaireva tarpayet // (19.2) Par.?

vīravrataṃ cābhinandediti bhargaśikhāvacaḥ / (20.1) Par.?

tathāhi śaṅkā mālinyaṃ glāniḥ saṃkoca ityadaḥ // (20.2) Par.?

saṃsārakārāgārāntaḥ sthūlasthūṇāghaṭāyate / (21.1) Par.?

mantrā varṇasvabhāvā ye dravyaṃ yatpāñcabhautikam // (21.2) Par.?

yaccidātma prāṇijātaṃ tatra kaḥ saṃkaraḥ katham / (22.1) Par.?

saṃkarābhāvataḥ keyaṃ śaṅkā tasyāmapi sphuṭam // (22.2) Par.?

na śaṅketa tathā śaṅkā vilīyetāvahelayā / (23.1) Par.?

śrīsarvācāravīrālīniśācarakramādiṣu // (23.2) Par.?

śāstreṣu vitataṃ caitattatra tatrocyate yataḥ / (24.1) Par.?

śaṅkayā jāyate glāniḥ śaṅkayā vighnabhājanam // (24.2) Par.?

uvācotpaladevaśca śrīmānasmadgurorguruḥ / (25.1) Par.?

sarvāśaṅkāśaniṃ mārgaṃ numo māheśvaraṃ tviti // (25.2) Par.?

anuttarapadāptaye tadidamāṇavaṃ darśitābhyupāyamativistarānnanu vidāṃkurudhvaṃ budhāḥ // (26.1) Par.?