Texts

dhanvantariruvāca / (1.1) Par.?

athāto yakṣmarogasya nidānaṃ pravadāmyaham / (1.2) Par.?

anekarogānugato bahurogapurogamaḥ // (1.3) Par.?

rājayakṣmā kṣayaḥ śoṣo rogarāḍiti kathyate / (2.1) Par.?

nakṣatrāṇāṃ dvijānāṃ ca rājño 'bhūdyadayaṃ purā // (2.2) Par.?

yacca rājā ca yakṣmā ca rājayakṣmā tato mataḥ / (3.1) Par.?

dehauṣadhakṣayakṛteḥ kṣayastatsambhavācca saḥ // (3.2) Par.?

rasādiśoṣaṇācchoṣo rogarāḍiti rājavat / (4.1) Par.?

sāhasaṃ vegasaṃrodhaḥ śukraujaḥsnehasaṃkṣayaḥ // (4.2) Par.?

annapānavidhityāgaś catvāras tasya hetavaḥ / (5.1) Par.?

tairudīrṇo 'nilaḥ pittaṃ vyarthaṃ codīrya sarvataḥ // (5.2) Par.?

śarīrasandhim āviśya tāḥ śirāḥ pratipīḍayan / (6.1) Par.?

mukhāni srotasāṃ ruddhvā tathaivātivisṛjya vā // (6.2) Par.?

madhyamūrdhvamadhastiryagavyathāṃ saṃjanayeddhṛdaḥ / (7.1) Par.?

rūpaṃ bhaviṣyatastasya pratiśyāyo bhṛśaṃ jvaraḥ // (7.2) Par.?

praseko mukhamādhuryaṃ mārdavaṃ vahnidehayoḥ / (8.1) Par.?

laulyabhāvo 'nnapānādau śucāvaśucivīkṣaṇam // (8.2) Par.?

makṣikātṛṇakeśādipātaḥ prāyo 'nnapānayoḥ / (9.1) Par.?

hṛllāsaśchardirarucirasnāte 'pi balakṣayaḥ // (9.2) Par.?

pāṇyoruvakṣaḥpādāsyakukṣyakṣṇor atiśuklatā / (10.1) Par.?

bāhvoḥ pratodo jihvāyāḥ kāye baibhatsyadarśanam // (10.2) Par.?

strīmadyamāṃsapriyatā ghṛṇitā mūrdhaguṇṭhanam / (11.1) Par.?

nakhakeśāsthivṛddhiśca svapne cābhibhavo bhavet // (11.2) Par.?

patanaṃ kṛkalāsāhikapiśvāpadapakṣibhiḥ / (12.1) Par.?

keśāsthituṣabhasmāditarau samadhirohaṇam // (12.2) Par.?

śūnyānāṃ grāmadeśānāṃ darśanaṃ śuṣyato 'mbhasaḥ / (13.1) Par.?

jyotirdivi davāgnīnāṃ jvalatāṃ ca mahīruhām // (13.2) Par.?

pīnasaśvāsakāsaṃ ca svaramūrdharujo 'ruciḥ / (14.1) Par.?

ūrdhvaniḥśvāsasaṃśoṣāvadhaś chardiśca koṣṭhage // (14.2) Par.?

sthite pārśve ca rugbodhe sandhisthe bhavati jvaraḥ / (15.1) Par.?

rūpāṇyekādaśaitāni jāyante rājayakṣmaṇaḥ // (15.2) Par.?

teṣāmupadravānvidyātkaṇṭhadhvaṃsakarī rujāḥ / (16.1) Par.?

jṛmbhāṅgamardaniṣṭhīvavahnimāndyāsyapūtitā // (16.2) Par.?

tatra vātāc chiraḥpārśvaśūlanaṃ sāṅgamardanam / (17.1) Par.?

kaṇṭharodhaḥ svarabhraṃśaḥ pittātpādāṃsapāṇiṣu // (17.2) Par.?

dāho 'tisāro 'sṛkchardir mukhagandho jvaro madaḥ / (18.1) Par.?

kaphādarocakacchardikāsā ardhvāṅgagauravam // (18.2) Par.?

prasekaḥ pīnasaḥ śvāsaḥ svarabhedo 'lpavahnitā / (19.1) Par.?

doṣairmandānalatvena śothalepakapholbaṇaiḥ // (19.2) Par.?

srotomukheṣu ruddheṣu dhātuṣu svalpakeṣu ca / (20.1) Par.?

vidāho manasaḥ sthāne bhavantyanye hyupadravāḥ // (20.2) Par.?

pacyate koṣṭha evānnamamlayuktai rasairyutam / (21.1) Par.?

prāyo 'sya kṣayabhāgānāṃ naivānnaṃ cāṅgapuṣṭaye // (21.2) Par.?

raso hyasya na raktāya māṃsāya kurute tu tat / (22.1) Par.?

upaṣṭabdhaḥ samantācca kevalaṃ vartate kṣayī // (22.2) Par.?

liṅgeṣvalpeṣvatikṣīṇaṃ vyādhau ṣaṭkaraṇakṣayam / (23.1) Par.?

varjayetsādhayedeva sarveṣvapi tato 'nyathā // (23.2) Par.?

doṣairvyastaiḥ samastaiśca kṣayātsarvasya medasaḥ / (24.1) Par.?

svarabhedo bhavettasya kṣāmo rūkṣaścalaḥ svaraḥ // (24.2) Par.?

śukavarṇābhakaṇṭhatvaṃ snigdhoṣṇopaśamo 'nilāt / (25.1) Par.?

pittāttālugale dāhaḥ śoṣo bhavati saṃtatam // (25.2) Par.?

limpanniva kaphaiḥ kaṇṭhaṃ mukhaṃ ghuraghurāyate / (26.1) Par.?

svayaṃ viruddhaiḥ sarvaistu sarvāliṅgaiḥ kṣayo bhavet // (26.2) Par.?

dhūmāyatīva cātyarthamudeti śleṣmalakṣaṇam / (27.1) Par.?

kṛcchrasādhyāḥ kṣayāścātra sarvair alpaṃ ca varjayet // (27.2) Par.?

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe yakṣmanidānā nāma dvipañcāśaduttaraśatatamo 'dhyāyaḥ // (28.1) Par.?