Texts

athāto 'naśnatsaṃhitāyāḥ kalpaṃ vyākhyāsyāmaḥ // (1) Par.?

śucivāsāḥ syāccīravāsā vā // (2) Par.?

haviṣyam annam aśanam icched apaḥ phalāni vā // (3) Par.?

brāhmaṇastveva pratyāharet // (4) Par.?

prāṅ vodaṅ vā grāmān niṣkramya śucau deśa udakānte vā gomayena gocarmamātraṃ sthaṇḍilam upalipya prokṣya lakṣaṇam ullikhyādbhir abhyukṣyāgnim upasamādhāyāghārāv ājyabhāgau hutvājyāhutīr juhoty agnaye somāya rudrāyendrāya brahmaṇe prajāpataye bṛhaspataye viśvebhyo devebhyo ṛṣibhya ṛgbhyo yajurbhyaḥ sāmabhyaḥ śraddhāyai prajñāyai medhāyai sāvitryai sadasaspataye 'numataye ca // (5) Par.?

hutvā darbheṣv āsīnaḥ prāktūleṣūdaktūleṣu vā dakṣiṇena pāṇinā darbhān dhārayann oṃpūrvā vyāhṛtīḥ sāvitrīṃ ca catur anudrutya manasā sāmasāvitrīṃ ca somaṃ rājānaṃ brahmajajñānīye cobhe vedādim ārabheta // (6) Par.?

saṃtatam adhīyīta maunī // (7) Par.?

na cāntarā viramet // (8) Par.?

athāntarā vyāhared athāntarā viramet // (9) Par.?

trīn prāṇān āyamyātamyācamya vṛttāntād evārabheta // (10) Par.?

apratibhāyāṃ yāvatā kālena vedam adhīyīta tāvatkālam adhīyīta yaj jānīyād ṛkto yajuṣṭaḥ sāmatas tad avāpnuyāt // (11) Par.?

tadbrāhmaṇaṃ tacchāndasaṃ taddaivataṃ sāma vā // (12) Par.?

akrān ity etad eva vābhyasyet // (13) Par.?

tiṣṭhann āsīnaḥ śayānaś caṅkramyamāṇo vā saṃhitāṃ prayuñjyāt // (14) Par.?

samṛddhir evāsya bhavati // (15) Par.?

ādyaṃ trivargaṃ vā sahasrakṛtva iti jaiminiś ca // (16) Par.?

vāryamantaṃ vā // (17) Par.?

yathākāmī vā // (18) Par.?

dvādaśa saṃhitā adhītya yad anenānadhyāyeṣv adhītaṃ yad guravaḥ kopitā yāny akāryāṇi kṛtāni tābhiḥ pavate // (19) Par.?

śuddham asya pūtaṃ brahma bhavati // (20) Par.?

athāparā dvādaśa saṃhitā adhītya tābhiḥ prajāpater lokam avāpnoti // (21) Par.?

athāparā dvādaśa saṃhitā adhītya tābhir uśanaso lokam avāpnoti // (22) Par.?

anaśnatsaṃhitāsahasram adhītya brahmabhūto virajo bhavati kāmacārī sarvān kāmān avāpnoti // (23) Par.?

saṃvatsaraṃ bhaikṣabhakṣaḥ prayuñjānaś cakṣur labhate // (24) Par.?

ṣaṇ māsān yāvakabhakṣaś caturo māsān udakasaktubhakṣo dvau māsau phalabhakṣo māsam abbhakṣo dvādaśarātraṃ vānaśnan kṣipram antardhīyate // (25) Par.?

jñātīn punāti // (26) Par.?

saptātītān saptānāgatān ātmānaṃ ca pañcadaśaṃ tārayate // (27) Par.?

tām etāṃ devaniśreṇīty ācakṣate // (28) Par.?

etayā vai devā devatvam agacchann ṛṣaya ṛṣitvam // (29) Par.?

tasya ha vā etasya brahmasattrasya trividha evārambho bhavati prātaḥsavane mādhyaṃdine savane brāhme vāpararātre // (30) Par.?

tasya ha vā etasya dvāv evānadhyāyau yad ātmāśucir yad deśaḥ // (31) Par.?

tad vā etat prajāpatiḥ saptaṛṣibhyaḥ provāca saptaṛṣayo mahājahnave mahājahnur brāhmaṇebhyaḥ // (32) Par.?