Texts

yāṃ vā avidvān adhvaryur iṣṭakāṃ prathamām upadadhāti tayā yajamānasya prāṇam apidadhāti prajāyāś ca paśūnāṃ ca // (1) Par.?

svayamātṛṇṇā bhavati prāṇānām utsṛṣṭyai svargasya lokasyānukśātyai // (2) Par.?

prājāpatyo 'śvaḥ // (3) Par.?

yad aśvam upaghrāpayati prajāpatinaivainaṃ cinute // (4) Par.?

iyaṃ vai svayamātṛṇṇā // (5) Par.?

imām evaitad upadhatte // (6) Par.?

yadi manyeta pūrvo mātikrānto bhrātṛvya iti prācīm udūhet // (7) Par.?

ya evainaṃ pūrvo 'tikrānto bhrātṛvyas tam anayā praṇudate // (8) Par.?

yadi manyeta paścān me bhrātṛvya iti pratīcīm apohet // (9) Par.?

ya evāsya paścād bhrātṛvyas tam anayāpanudate // (10) Par.?

pra śreyāṃsaṃ bhrātṛvyaṃ nudate // (11) Par.?

prati pāpīyāṃsaṃ nudate // (12) Par.?

yadi manyeta sadṛṅ mayeti vicālayet // (13) Par.?

yā vā iyaṃ prajā vyadhūnuta parā tā abhavan // (14) Par.?

iyam evainaṃ vidhūnute // (15) Par.?

athaiṣā dūrveṣṭakā // (16) Par.?

paśur vā agniḥ // (17) Par.?

na paśava āyavase ramante // (18) Par.?

paśubhya evaitad āyatanaṃ karoti paśūnāṃ dhṛtyai // (19) Par.?

kāṇḍāt kāṇḍāt prarohantīti pratiṣṭhityai // (20) Par.?

sahasreṇa śatena ceti // (21) Par.?

sahasravatī prajāpatinā saṃmitā // (22) Par.?

gacchati sāhasrīṃ puṣṭiṃ paśūnāṃ ya evaṃ vidvān etām upadhatte // (23) Par.?

athaiṣā vāmabhṛt // (24) Par.?

etayā vai devā asurāṇāṃ vāmaṃ paśūn avṛñjata // (25) Par.?

vāmam evaitayā paśūn bhrātṛvyasya vṛṅkte // (26) Par.?

dviyajur bhavati // (27) Par.?

bhrātṛvyalokam eva dviyajuṣā vṛṅkte // (28) Par.?

dvitīye hi loke bhrātṛvyaḥ // (29) Par.?

hiraṇyaśīrṣṇī bhavati // (30) Par.?

hiraṇyajyotir eva svargaṃ lokam eti // (31) Par.?

prabāhuk kācā āhatau bhavataḥ // (32) Par.?

tasmāt prabāhug akṣyau // (33) Par.?

athaite retassicau // (34) Par.?

asau vai svarāṭ // (35) Par.?

iyaṃ virāṭ // (36) Par.?

uttānāyāṃ striyāṃ pumān retas siñcati // (37) Par.?

asā asyāṃ retas siñcati // (38) Par.?

iyaṃ prajanayati // (39) Par.?

agnir atti // (40) Par.?

saretasam agniṃ cinute // (41) Par.?

prajāyate 'tty annaṃ ya evaṃ vidvān ete upadhatte // (42) Par.?

svarāḍ asīti dakṣiṇata upadadhāti // (43) Par.?

tasmād dakṣiṇataḥ pumān striyam upaśaye // (44) Par.?

yadi pūrvavayase cinvītobhe saha prathamāyāṃ cityām upadadhyāt // (45) Par.?

samīcī evāsmai retas siñcataḥ // (46) Par.?

anyatarām upadadhyād yaṃ dviṣyāt tasya // (47) Par.?

retasaivainaṃ vyardhayati // (48) Par.?

yady uttaravayase cinvīta prathamāyām anyāṃ cityām upadadhyād uttamāyām anyām // (49) Par.?

reta eva siktam ābhyāṃ parigṛhṇāti // (50) Par.?

ṛtavye upadadhāty ṛtūnāṃ vidhṛtyai // (51) Par.?

dve dve upadadhāti // (52) Par.?

dvau dvau hy ṛtavaḥ // (53) Par.?

athaiṣā tryālikhitā // (54) Par.?

devāś ca vā asurāś ca samāvad eva yajñe 'kurvata // (55) Par.?

yad eva devā akurvata tad asurā akurvata // (56) Par.?

te devā etāṃ tryālikhitām apaśyan // (57) Par.?

tām uttaralakṣmāṇam upādadhata // (58) Par.?

tad asurā nānvavāyan // (59) Par.?

tato devā abhavan // (60) Par.?

parāsurā abhavan // (61) Par.?

ya evaṃ vidvān etām uttaralakṣmāṇam upadhatte bhrātṛvyasyānanvavāyāya bhavaty ātmanā parāsya bhrātṛvyo bhavati // (62) Par.?

adharalakṣmāṇam upadadhyād yaṃ dviṣyāt tasya // (63) Par.?

asurayonim evainam anuparābhāvayati // (64) Par.?

ime vai lokās tryālikhitāḥ // (65) Par.?

imān evaitayā lokān āpnoti // (66) Par.?

yasyā mṛda ukhāṃ kurvanti tasyā etāṃ kuryāt // (67) Par.?

tenaivāsya sarvā iṣṭakā jyotiṣmatīr yajuṣmatīr bhavanti // (68) Par.?