Texts

ekaviṃśatiṃ māṣān pratinyupya puruṣaśīrṣam āharati // (1) Par.?

amedhyā vai māṣāḥ // (2) Par.?

amedhyaṃ puruṣaśīrṣam // (3) Par.?

amedhyenaivāmedhyaṃ krīṇāti // (4) Par.?

ekaviṃśatir bhavanti // (5) Par.?

ekaviṃśo vai puruṣaḥ // (6) Par.?

yāvān evāsyātmā taṃ krīṇāti // (7) Par.?

saptadhātṛṇṇāṃ valmīkavapāṃ pratinidadhāti // (8) Par.?

vyṛddhaṃ vā etat prāṇaiḥ // (9) Par.?

sapta śīrṣaṇyāḥ prāṇāḥ // (10) Par.?

prāṇair evainat samardhayati // (11) Par.?

yamagāthā gāyati // (12) Par.?

yamalokād evainad vṛṅkte // (13) Par.?

tisro gāyati // (14) Par.?

traya ime lokāḥ // (15) Par.?

ebhya evainal lokebhyo vṛṅkte // (16) Par.?

tasmād gāyate na deyam // (17) Par.?

gāthā hy eva tad vṛṅkte // (18) Par.?

apa vā etasmād indriyaṃ krāmati prāṇāś śīrṣan vīryaṃ cakṣuś śrotraṃ vāk // (19) Par.?

vyṛddhendriyaṃ vā etad amedhyam // (20) Par.?

mṛtaśīrṣam iti vā etad āhuḥ // (21) Par.?

medhyaṃ hiraṇyam // (22) Par.?

yaddhiraṇyaśalkaiḥ pratyasyati medhyam evainad yajñiyaṃ karoti // (23) Par.?

ukhāyām apidhāya pratyasyati // (24) Par.?

pratiṣṭhām evainad gamayitvā prāṇais samardhayati // (25) Par.?

sahasradā asi sahasrāya tveti puruṣaśīrṣam upadadhāti // (26) Par.?

puruṣo ha tvai sahasraṃ paśūn yacchati // (27) Par.?

sahasram anye paśavaḥ // (28) Par.?

yan madhye puruṣaśīrṣam upadadhāti sayatvāya // (29) Par.?

athaitāni paśuśīrṣāṇi // (30) Par.?

etā ha vai sāhasrīr iṣṭakās somadakṣaḥ kauśreyaś śyāmaparṇāyopadadhau // (31) Par.?

tato vai sāhasrīṃ puṣṭiṃ paśūnāṃ jagāma // (32) Par.?

gacchati sāhasrīṃ puṣṭiṃ paśūnāṃ ya evaṃ vidvān etā upadhatte // (33) Par.?

purastāt pratīcīnam aśvasya śira upadadhāti paścāt prācīnam ṛṣabhasya // (34) Par.?

goaśvān evāsmin samīco dadhāti // (35) Par.?

samīcīnāny upadadhyād yaṃ kāmayeta paśumān syād iti // (36) Par.?

samīca evāsmin paśūn dadhāti // (37) Par.?

viṣūcīnāny upadadhyād yaṃ kāmayetāpaśus syād iti // (38) Par.?

vimukhān evāsmāt paśūn karoti // (39) Par.?

nāntarā paśuśīrṣāṇi vyaveyād adhvaryuḥ // (40) Par.?

yaviṣṭho vai nāmaiṣo 'gniḥ // (41) Par.?

prāṇān asya yuveta pramīyeta // (42) Par.?

ekam upadhāyaitais sarvair upatiṣṭheta // (43) Par.?

tad vā sarvato 'nuparihāraṃ sādayet // (44) Par.?

tenaiva sarvāṇy upadhīyante // (45) Par.?

nārtim ārchaty adhvaryuḥ // (46) Par.?

na bhreṣaṃ nyeti // (47) Par.?

etāvanto vai paśavo dvipādaś ca catuṣpādaś ca // (48) Par.?

tān etac chucārpayati // (49) Par.?

amum āraṇyam anu te diśāmīti grāmyebhya eva paśubhya āraṇyān paśūñ śucam anūtsṛjati // (50) Par.?

tasmād ete samāvat paśūnāṃ prajāyamānānāṃ kaniṣṭhāḥ // (51) Par.?

śucā hy eta ṛtāḥ // (52) Par.?