Texts

Help

Select a text:
Bibliography
Select a chapter:
 (no revisions)
Associated topic(s): Mahāyāna

Show parallels  Show headlines
Use dependency labeler
Chapter id: 17446
  • Click on a sentence to show its analysis
  • Keep the mouse pointer over a lemma to show its meanings.
abhūm atītam adhvānaṃ nābhūvam iti dṛṣṭayaḥ / (1.1) Par.?
yās tāḥ śāśvatalokādyāḥ pūrvāntaṃ samupāśritāḥ // (1.2) Par.?
dṛṣṭayo na bhaviṣyāmi kim anyo 'nāgate 'dhvani / (2.1) Par.?
bhaviṣyāmīti cāntādyā aparāntaṃ samāśritāḥ // (2.2) Par.?
abhūm atītam adhvānam ity etan nopapadyate / (3.1) Par.?
yo hi janmasu pūrveṣu sa eva na bhavaty ayam // (3.2) Par.?
sa evātmeti tu bhaved upādānaṃ viśiṣyate / (4.1) Par.?
upādānavinirmukta ātmā te katamaḥ punaḥ // (4.2) Par.?
upādānavinirmukto nāsty ātmeti kṛte sati / (5.1) Par.?
syād upādānam evātmā nāsti cātmeti vaḥ punaḥ // (5.2) Par.?
na copādānam evātmā vyeti tat samudeti ca / (6.1) Par.?
kathaṃ hi nāmopādānam upādātā bhaviṣyati // (6.2) Par.?
anyaḥ punar upādānād ātmā naivopapadyate / (7.1) Par.?
gṛhyeta hy anupādāno yady anyo na ca gṛhyate // (7.2) Par.?
evaṃ nānya upādānān na copādānam eva saḥ / (8.1) Par.?
ātmā nāsty anupādāno nāpi nāsty eṣa niścayaḥ // (8.2) Par.?
nābhūm atītam adhvānam ity etan nopapadyate / (9.1) Par.?
yo hi janmasu pūrveṣu tato 'nyo na bhavaty ayam // (9.2) Par.?
yadi hy ayaṃ bhaved anyaḥ pratyākhyāyāpi taṃ bhavet / (10.1) Par.?
tathaiva ca sa saṃtiṣṭhet tatra jāyeta cāmṛtaḥ // (10.2) Par.?
ucchedaḥ karmaṇāṃ nāśaḥ kṛtam anyena karma ca / (11.1) Par.?
pratisaṃvedayed anya evamādi prasajyate // (11.2) Par.?
nāpy abhūtvā samudbhūto doṣo hy atra prasajyate / (12.1) Par.?
kṛtako vā bhaved ātmā sambhūto vāpy ahetukaḥ // (12.2) Par.?
evaṃ dṛṣṭir atīte yā nābhūm aham abhūm aham / (13.1) Par.?
ubhayaṃ nobhayaṃ ceti naiṣā samupapadyate // (13.2) Par.?
adhvany anāgate kiṃ nu bhaviṣyāmīti darśanam / (14.1) Par.?
na bhaviṣyāmi cety etad atītenādhvanā samam // (14.2) Par.?
sa devaḥ sa manuṣyaś ced evaṃ bhavati śāśvatam / (15.1) Par.?
anutpannaś ca devaḥ syāj jāyate na hi śāśvatam // (15.2) Par.?
devād anyo manuṣyaś ced aśāśvatam ato bhavet / (16.1) Par.?
devād anyo manuṣyaś cet saṃtatir nopapadyate // (16.2) Par.?
divyo yady ekadeśaḥ syād ekadeśaś ca mānuṣaḥ / (17.1) Par.?
aśāśvataṃ śāśvataṃ ca bhavet tac ca na yujyate // (17.2) Par.?
aśāśvataṃ śāśvataṃ ca prasiddham ubhayaṃ yadi / (18.1) Par.?
siddhe na śāśvataṃ kāmaṃ naivāśāśvatam ity api // (18.2) Par.?
kutaścid āgataḥ kaścit kiṃcid gacchet punaḥ kvacit / (19.1) Par.?
yadi tasmād anādis tu saṃsāraḥ syān na cāsti saḥ // (19.2) Par.?
nāsti cec chāśvataḥ kaścit ko bhaviṣyaty aśāśvataḥ / (20.1) Par.?
śāśvato 'śāśvataś cāpi dvābhyām ābhyāṃ tiraskṛtaḥ // (20.2) Par.?
antavān yadi lokaḥ syāt paralokaḥ kathaṃ bhavet / (21.1) Par.?
athāpy anantavāṃl lokaḥ paralokaḥ kathaṃ bhavet // (21.2) Par.?
skandhānām eṣa saṃtāno yasmād dīpārciṣām iva / (22.1) Par.?
tasmān nānantavattvaṃ ca nāntavattvaṃ ca yujyate // (22.2) Par.?
pūrve yadi ca bhajyerann utpadyeran na cāpy amī / (23.1) Par.?
skandhāḥ skandhān pratītyemān atha loko 'ntavān bhavet // (23.2) Par.?
pūrve yadi na bhajyerann utpadyeran na cāpyamī / (24.1) Par.?
skandhāḥ skandhān pratītyemāṃl loko 'nanto bhaved atha // (24.2) Par.?
antavān ekadeśaś ced ekadeśas tv anantavān / (25.1) Par.?
syād antavān anantaś ca lokas tac ca na yujyate // (25.2) Par.?
kathaṃ tāvad upādātur ekadeśo vinaṅkṣyate / (26.1) Par.?
na naṅkṣyate caikadeśa evaṃ caitan na yujyate // (26.2) Par.?
upādānaikadeśaś ca kathaṃ nāma vinaṅkṣyate / (27.1) Par.?
na naṅkṣyate caikadeśo naitad apy upapadyate // (27.2) Par.?
antavac cāpy anantaṃ ca prasiddham ubhayaṃ yadi / (28.1) Par.?
siddhe naivāntavat kāmaṃ naivānantavad ity api // (28.2) Par.?
atha vā sarvabhāvānāṃ śūnyatvāc chāśvatādayaḥ / (29.1) Par.?
kva kasya katamāḥ kasmāt sambhaviṣyanti dṛṣṭayaḥ // (29.2) Par.?
sarvadṛṣṭiprahāṇāya yaḥ saddharmam adeśayat / (30.1) Par.?
anukampām upādāya taṃ namasyāmi gautamam // (30.2) Par.?
Duration=0.24472403526306 secs.