Texts

dakṣiṇā vai deveṣv āsīd yajño 'sureṣu // (1) Par.?

tāṃ dakṣiṇāṃ yajño 'bhyakāmayata // (2) Par.?

tām abhiparyāvartata // (3) Par.?

tāṃ samabhavat // (4) Par.?

sa indro 'ved yo vā asmād yoneḥ sambhaviṣyati sa idaṃ bhaviṣyatīti // (5) Par.?

tām indraḥ prāviśat // (6) Par.?

tatā indraḥ samabhavat // (7) Par.?

tatā indro 'jāyata // (8) Par.?

sa jāyamāno 'ved yo vā asmād yoner anyo mat sambhaviṣyati mādṛk sambhaviṣyatīti // (9) Par.?

tayā sahopaveṣṭayann ajāyata // (10) Par.?

yan nyaveṣṭayat tasmān niveṣṭitā // (11) Par.?

yan niveṣṭyamānā śyāvābhavat tasmāt kṛṣṇā // (12) Par.?

indraṃ ca vā eṣa prepsati dakṣiṇāṃ ca // (13) Par.?

indrasya ca khalu vā etad yonim ālabdha dakṣiṇāyāś cātmānam // (14) Par.?

atho sayonim eva yajñam ālabhate // (15) Par.?

kṛṣiṃ susasyām utkṛṣā iti viṣāṇayā bhūmyām upahanti // (16) Par.?

kṛṣim evāsya sasyena samardhayati // (17) Par.?

yajuṣā kaṇḍūyate // (18) Par.?

ayajuṣā hi manuṣyāḥ kaṇḍūyante vyāvṛttyai // (19) Par.?

yajuṣā kaṇḍūyate // (20) Par.?

tasmāt prajā apāmaṃbhaviṣṇavaḥ // (21) Par.?

pāmaṃbhaviṣṇavaḥ prajāḥ syur yad ayajuṣā kaṇḍūyeta // (22) Par.?

supippalā oṣadhīs kṛdhīti śiraḥ kaṇḍūyate // (23) Par.?

oṣadhīr eva phalaṃ grāhayati // (24) Par.?

tasmād oṣadhayaḥ śīrṣan phalaṃ gṛhṇanti // (25) Par.?

vāg vai sṛṣṭā caturdhā vyabhavat // (26) Par.?

tato yā atyaricyata sā vanaspatīn prāviśat // (27) Par.?

saiṣā yākṣe yā dundubhau yā tūṇave yā vīṇāyām // (28) Par.?

daṇḍaṃ prayacchati // (29) Par.?

tām evāsmai vācaṃ prayacchati // (30) Par.?

atho vajram evāsmai prayacchati gopīthāya // (31) Par.?

āsyadaghnaṃ prayacchati // (32) Par.?

etāvatī hīyaṃ vāg vadati // (33) Par.?

atho etāvatī hi vācā vīryaṃ kriyate // (34) Par.?

yad varṣīyāṃsaṃ prayacchet svāṃ vācaṃ maitrāvaruṇo vibhajet // (35) Par.?

taṃ śvaḥsutyāyāṃ maitrāvaruṇāya prayacchati // (36) Par.?

tāṃ śvo bhūte maitrāvaruṇa ṛtvigbhyo vibhajati // (37) Par.?

hotar yaja potar yaja neṣṭar yajeti sā saha vaṣaṭkāreṇāhavanīyaṃ gacchati // (38) Par.?

tāṃ puro 'dhvaryur vibhajati // (39) Par.?

hotar yaja potar yaja neṣṭar yajety adhvaryuḥ puro vācaṃ vibhajati maitrāvaruṇaḥ paścāt // (40) Par.?

svāhā yajñaṃ manaseti // (41) Par.?

manasā yajñam abhigacchanti // (42) Par.?

tata eva yajñam ālabdha // (43) Par.?

svāhā divaḥ svāhā pṛthivyā iti // (44) Par.?

dyāvāpṛthivī vā anv antarikṣaṃ yajña upaśritaḥ // (45) Par.?

tata eva yajñam ālabdha // (46) Par.?

svāhoror antarikṣād iti // (47) Par.?

antarikṣaṃ vai yajñaḥ // (48) Par.?

yadi vāto yadi vā paśavas tata eva yajñam ālabdha // (49) Par.?

svāhā vātāt parigṛhṇāmi svāheti // (50) Par.?

ayaṃ vāva yaḥ pavata eṣa yajñas tam evālabdha // (51) Par.?

vācaṃ yacchati // (52) Par.?

yajñaṃ vā etad yacchati // (53) Par.?

yad vācaṃ visṛjed yajñaṃ visṛjet // (54) Par.?

tad āhuḥ punar dīkṣayitvā vāg yantavyeti // (55) Par.?

yat punar dīkṣayed āhutīr atirecayet // (56) Par.?

vaiṣṇavīm anūcya vāg yantavyā // (57) Par.?

viṣṇur vai yajñaḥ // (58) Par.?

yajñam evālabdha // (59) Par.?

āgnāvaiṣṇavīm anūcya vāg yantavyā // (60) Par.?

agnir vai sarvā devatāḥ // (61) Par.?

viṣṇur yajñaḥ // (62) Par.?

devatāś caiva yajñaṃ cālabdha // (63) Par.?

sārasvatīm anūcya vāg yantavyā // (64) Par.?

vāg vai sarasvatī // (65) Par.?

vācā yajñaḥ saṃtataḥ // (66) Par.?

vācaiva yajñaṃ saṃtanoti // (67) Par.?

bārhaspatyām anūcya vāg yantavyā // (68) Par.?

brahma vai bṛhaspatiḥ // (69) Par.?

brahmaṇā yajñaḥ saṃhitaḥ // (70) Par.?

brahmaṇaiva yajñaṃ saṃdadhāti // (71) Par.?