Texts

athainām udīcīṃ saptapadāni prakrāmayati ekam iṣe dve ūrje trīṇi rāyaspoṣāya catvāri māyobhavāya pañca paśubhyaḥ ṣaḍ ṛtubhyaḥ sakhe saptapadā bhava sā mām anuvratā bhava // (1.1) Par.?

viṣṇus tvā nayatv iti sarvatrānuṣajati // (2.1) Par.?

niṣkramaṇaprabhṛty udakumbhaṃ skandhe kṛtvā dakṣiṇato 'gner vāgyataḥ sthito bhavati // (3.1) Par.?

uttarata ekeṣām // (4.1) Par.?

tata enāṃ mūrdhany abhiṣiñcati āpaḥ śivāḥ śivatamāḥ śāntāḥ śāntatamās tās te kṛṇvantu bheṣajam iti // (5.1) Par.?

āpo hi ṣṭheti ca tisṛbhiḥ // (6.1) Par.?

athaināṃ sūryam udīkṣayati tac cakṣur iti // (7.1) Par.?

athāsyai dakṣiṇāṃsam adhi hṛdayam ālabhate mama vrate te hṛdayaṃ dadhāmi mama cittam anu cittaṃ te astu mama vācam ekamanā juṣasva prajāpatiṣ ṭvā niyunaktu mahyam iti // (8.1) Par.?

athainām abhimantrayate sumaṅgalīr iyam vadhūr imāṃ sameta paśyata saubhāgyam asyai dattvāyāthāstaṃ viparetaneti // (9.1) Par.?

tāṃ dṛḍhapuruṣa unmathya prāg vodag vānugupta āgāra ānaḍuhe rohite carmaṇy upaveśayati iha gāvo niṣīdantv ihāśvā iha pūruṣāḥ / (10.1) Par.?

iho sahasradakṣiṇo yajña iha pūṣā niṣīdantv iti // (10.2) Par.?

grāmavacanaṃ ca kuryuḥ // (11.1) Par.?

vivāhaśmaśānayor grāmaṃ praviśatād iti vacanāt // (12.1) Par.?

tasmāt tayor grāmaḥ pramāṇam iti śruteḥ // (13.1) Par.?

ācāryāya varaṃ dadāti // (14.1) Par.?

gaur brāhmaṇasya varaḥ // (15.1) Par.?

grāmo rājanyasya // (16.1) Par.?

aśvo vaiśyasya // (17.1) Par.?

adhirathaṃ śataṃ duhitṛmate // (18.1) Par.?

astamite dhruvaṃ darśayati / (19.1) Par.?

dhruvam asi dhruvaṃ tvā paśyāmi dhruvaidhi poṣye mayi mahyaṃ tvādād bṛhaspatir mayā patyā prajāvatī saṃjīva śaradaḥ śatam iti // (19.2) Par.?

sā yadi na paśyet paśyāmīty eva brūyāt // (20.1) Par.?

trirātram akṣārālavaṇāśinau syātām adhaḥ śayīyātāṃ saṃvatsaraṃ na mithunam upeyātāṃ dvādaśarātraṃ ṣaḍrātraṃ trirātram antataḥ // (21.1) Par.?