Texts

vaiśaṃpāyana uvāca / (1.1) Par.?

sa tu kauravyam āsādya drupadasya purohitaḥ / (1.2) Par.?

satkṛto dhṛtarāṣṭreṇa bhīṣmeṇa vidureṇa ca // (1.3) Par.?

sarvaṃ kauśalyam uktvādau pṛṣṭvā caivam anāmayam / (2.1) Par.?

sarvasenāpraṇetṝṇāṃ madhye vākyam uvāca ha // (2.2) Par.?

sarvair bhavadbhir vidito rājadharmaḥ sanātanaḥ / (3.1) Par.?

vākyopādānahetostu vakṣyāmi vidite sati // (3.2) Par.?

dhṛtarāṣṭraśca pāṇḍuśca sutāvekasya viśrutau / (4.1) Par.?

tayoḥ samānaṃ draviṇaṃ paitṛkaṃ nātra saṃśayaḥ // (4.2) Par.?

dhṛtarāṣṭrasya ye putrāste prāptāḥ paitṛkaṃ vasu / (5.1) Par.?

pāṇḍuputrāḥ kathaṃ nāma na prāptāḥ paitṛkaṃ vasu // (5.2) Par.?

evaṃ gate pāṇḍaveyair viditaṃ vaḥ purā yathā / (6.1) Par.?

na prāptaṃ paitṛkaṃ dravyaṃ dhārtarāṣṭreṇa saṃvṛtam // (6.2) Par.?

prāṇāntikair apyupāyaiḥ prayatadbhir anekaśaḥ / (7.1) Par.?

śeṣavanto na śakitā nayituṃ yamasādanam // (7.2) Par.?

punaśca vardhitaṃ rājyaṃ svabalena mahātmabhiḥ / (8.1) Par.?

chadmanāpahṛtaṃ kṣudrair dhārtarāṣṭraiḥ sasaubalaiḥ // (8.2) Par.?

tad apyanumataṃ karma tathāyuktam anena vai / (9.1) Par.?

vāsitāśca mahāraṇye varṣāṇīha trayodaśa // (9.2) Par.?

sabhāyāṃ kleśitair vīraiḥ sahabhāryaistathā bhṛśam / (10.1) Par.?

araṇye vividhāḥ kleśāḥ samprāptāstaiḥ sudāruṇāḥ // (10.2) Par.?

tathā virāṭanagare yonyantaragatair iva / (11.1) Par.?

prāptaḥ paramasaṃkleśo yathā pāpair mahātmabhiḥ // (11.2) Par.?

te sarve pṛṣṭhataḥ kṛtvā tat sarvaṃ pūrvakilbiṣam / (12.1) Par.?

sāmaiva kurubhiḥ sārdham icchanti kurupuṃgavāḥ // (12.2) Par.?

teṣāṃ ca vṛttam ājñāya vṛttaṃ duryodhanasya ca / (13.1) Par.?

anunetum ihārhanti dhṛtarāṣṭraṃ suhṛjjanāḥ // (13.2) Par.?

na hi te vigrahaṃ vīrāḥ kurvanti kurubhiḥ saha / (14.1) Par.?

avināśena lokasya kāṅkṣante pāṇḍavāḥ svakam // (14.2) Par.?

yaścāpi dhārtarāṣṭrasya hetuḥ syād vigrahaṃ prati / (15.1) Par.?

sa ca hetur na mantavyo balīyāṃsastathā hi te // (15.2) Par.?

akṣauhiṇyo hi saptaiva dharmaputrasya saṃgatāḥ / (16.1) Par.?

yuyutsamānāḥ kurubhiḥ pratīkṣante 'sya śāsanam // (16.2) Par.?

apare puruṣavyāghrāḥ sahasrākṣauhiṇīsamāḥ / (17.1) Par.?

sātyakir bhīmasenaśca yamau ca sumahābalau // (17.2) Par.?

ekādaśaitāḥ pṛtanā ekataśca samāgatāḥ / (18.1) Par.?

ekataśca mahābāhur bahurūpo dhanaṃjayaḥ // (18.2) Par.?

yathā kirīṭī senābhyaḥ sarvābhyo vyatiricyate / (19.1) Par.?

evam eva mahābāhur vāsudevo mahādyutiḥ // (19.2) Par.?

bahulatvaṃ ca senānāṃ vikramaṃ ca kirīṭinaḥ / (20.1) Par.?

buddhimattāṃ ca kṛṣṇasya buddhvā yudhyeta ko naraḥ // (20.2) Par.?

te bhavanto yathādharmaṃ yathāsamayam eva ca / (21.1) Par.?

prayacchantu pradātavyaṃ mā vaḥ kālo 'tyagād ayam // (21.2) Par.?