Texts

athottamarṇo 'dhamarṇād yathādattam arthaṃ gṛhṇīyāt // (1.1) Par.?

dvikaṃ trikaṃ catuṣkaṃ pañcakaṃ ca śataṃ varṇānukrameṇa pratimāsam // (2.1) Par.?

sarve varṇā vā svapratipannāṃ vṛddhiṃ dadyuḥ // (3.1) Par.?

akṛtām api vatsarātikrameṇa yathāvihitam // (4.1) Par.?

ādhyupabhoge vṛddhyabhāvaḥ // (5.1) Par.?

daivarājopaghātād ṛte vinaṣṭam ādhim uttamarṇo dadyāt // (6.1) Par.?

antavṛddhau praviṣṭāyām api // (7.1) Par.?

na sthāvaram ādhim ṛte vacanāt // (8.1) Par.?

gṛhītadhanapraveśārtham eva yat sthāvaraṃ dattaṃ tat gṛhītadhanapraveśe dadyāt // (9.1) Par.?

dīyamānaṃ prayuktam artham uttamarṇasyāgṛhṇatas tataḥ paraṃ na vardhate // (10.1) Par.?

hiraṇyasya parā vṛddhir dviguṇā // (11.1) Par.?

dhānyasya triguṇā // (12.1) Par.?

vastrasya caturguṇā // (13.1) Par.?

rasasyāṣṭaguṇā // (14.1) Par.?

saṃtatiḥ strīpaśūnām // (15.1) Par.?

kiṇvakārpāsasūtracarmāyudheṣṭakāṅgārāṇām akṣayā // (16.1) Par.?

anuktānāṃ dviguṇā // (17.1) Par.?

prayuktam arthaṃ yathā kathaṃcit sādhayan na rājño vācyaḥ syāt // (18.1) Par.?

sādhyamānaś ced rājānam abhigacchet tatsamaṃ daṇḍyaḥ // (19.1) Par.?

uttamarṇaś ced rājānam iyāt tadvibhāvito 'dhamarṇo rājñe dhanadaśabhāgasaṃmitaṃ daṇḍaṃ dadyāt // (20.1) Par.?

prāptārthaś cottamarṇo viṃśatitamam aṃśam // (21.1) Par.?

sarvāpalāpy ekadeśavibhāvito 'pi sarvaṃ dadyāt // (22.1) Par.?

tasya ca bhāvanās tisro bhavanti likhitaṃ sākṣiṇaḥ samayakriyā ca // (23.1) Par.?

sasākṣikam āptaṃ sasākṣikam eva dadyāt // (24.1) Par.?

likhitārthe praviṣṭe likhitaṃ pāṭayet // (25.1) Par.?

asamagradāne lekhyāsaṃnidhāne cottamarṇaḥ svalikhitaṃ dadyāt // (26.1) Par.?

dhanagrāhiṇi prete pravrajite dvidaśāḥ samāḥ pravasite vā tatputrapautrair dhanaṃ deyam // (27.1) Par.?

nātaḥ param anicchubhiḥ // (28.1) Par.?

saputrasya vāpy aputrasya vā rikthagrāhī ṛṇaṃ dadyāt // (29.1) Par.?

nirdhanasya strīgrāhī // (30.1) Par.?

na strī patiputrakṛtam // (31.1) Par.?

na strīkṛtaṃ patiputrau // (32.1) Par.?

na pitā putrakṛtam // (33.1) Par.?

avibhaktaiḥ kṛtam ṛṇaṃ yas tiṣṭhet sa dadyāt // (34.1) Par.?

paitṛkam ṛṇam avibhaktānāṃ bhrātṝṇāṃ ca // (35.1) Par.?

vibhaktāś ca dāyānurūpam aṃśam // (36.1) Par.?

gopaśauṇḍikaśailūṣarajakavyādhastrīṇāṃ patir dadyāt // (37.1) Par.?

vākpratipannaṃ nādeyaṃ kasyacit // (38.1) Par.?

kuṭumbārthe kṛtaṃ ca // (39.1) Par.?

yo gṛhītvā ṛṇaṃ sarvaṃ śvo dāsyāmīti sāmakam / (40.1) Par.?

na dadyāllobhataḥ paścāt tathā vṛddhim avāpnuyāt // (40.2) Par.?

darśane pratyaye dāne prātibhāvyaṃ vidhīyate / (41.1) Par.?

ādyau tu vitathe dāpyāvitarasya sutā api // (41.2) Par.?

bahavaś cet pratibhuvo dadyus te 'rthaṃ yathākṛtam / (42.1) Par.?

arthe 'viśeṣite tv eṣu dhanikacchandataḥ kriyā // (42.2) Par.?

yam arthaṃ pratibhūr dadyād dhanikenopapīḍitaḥ / (43.1) Par.?

ṛṇikas taṃ pratibhuve dviguṇaṃ dātum arhati // (43.2) Par.?