Texts

he suvratāḥ parameśvarabhaktiprakarṣaparipoṣitaśobhātiśayatvāt suṣṭhu śobhanaṃ vrataṃ śāstrīyaniyamānuṣṭhānaṃ yeṣāṃ ta eva śrotāraḥ saṃbodhitāḥ // (1) Par.?

yad vakṣyaty upasaṃhāre bhavatsu śivaśītāṃśujyotsnāpāṇḍuṣv idaṃ mayā // (2) Par.?

tadicchayā mayaivoktam iti // (3) Par.?

harād indrakramāyātaṃ jñānaṃ śṛṇuta ākarṇayateti sambandhaḥ // (4) Par.?

harati paśubhyaḥ pāśān puṃso 'py ūrdhvaṃ padaṃ tatas tu haraḥ // (5) Par.?

iti yady api yaugikīyaṃ saṃjñā ananteśādiṣv api sāmānyā tathāpi indraśabdasaṃnidher ihomāpatāv eva haraśabdo jñeyaḥ // (6) Par.?

yathāhuḥ arthaḥ prakaraṇaṃ liṅgaṃ śabdasyānyasya saṃnidhiḥ // (7) Par.?

proktāḥ sāmānyaśabdānāṃ viśeṣasthitihetavaḥ // (8) Par.?

iti // (9) Par.?

kuta etad iti ced yasmād aindre asmin kāmikabhede bhagavata umāpater vaktṛtvena indrasya ca śrotṛtvenaiva sambandhaḥ pratītaḥ // (10) Par.?

tathā hi purastād ihaiva munīnām indro vakṣyati / (11.1) Par.?

śivodgīrṇam idaṃ jñānaṃ mantramantreśvareśvaraiḥ / (11.2) Par.?

kāmadatvāt kāmiketi pragītaṃ bahuvistaram // (11.3) Par.?

tebhyo 'vagatya dṛgjyotirjvālālīḍhasmaradrumaḥ / (12.1) Par.?

dadāv umāpatir mahyam iti // (12.2) Par.?

tasmāddharāt śrīkaṇṭhanāthāt indrādikrameṇāyātam iti avatīrṇam // (13) Par.?

kiṃ tat // (14) Par.?

jñāyante anena vidyācaryākriyāyogā iti jñānaṃ śāstram // (15) Par.?

kiṃ kṛtvā śṛṇuta // (16) Par.?

parameśvaraṃ namaskṛtya sṛṣṭisthitisaṃkṣobhaṇādibhiś cidacillakṣaṇaṃ viśvam īṣṭe itīśaḥ īdṛktvaṃ cānanteśādīnām apy astīti paramapadena viśeṣaṇam // (17) Par.?

paramaś cāsāv anyeṣāṃ tadanugrahataḥ śivatvābhivyakteḥ īśaś ca svātantryeṇa sthityādikaraṇāt parameśaḥ taṃ namaskṛtya kāyavāṅmanobhis tasmin prahvībhūya // (18) Par.?

tat ity anantaraṃ tantrāvatārakaṃ bharadvājam ṛṣim iti ṛ gatāv iti dhātvarthataḥ sarveṣāṃ ca gatyarthānāṃ jñānārthatvād avagataparamārthatayā ṛṣiḥ taṃ namaskṛtya śṛṇuteti śrotṝṇāṃ namaskāropadeśaḥ // (19) Par.?

anamaskṛtaparameśvarāṇām apraṇatagurūṇāṃ ca nirvighnasaṃhitādhigamanāsaṃbhavāt // (20) Par.?

yaś ca śrotṛjanam evaṃ śikṣayati so 'rthāt kṛtatathāvidhavidhiḥ pravṛtta iti gamyate // (21) Par.?

tena yathā parameśvaraṃ guruṃ ca nutvāham upadeṣṭuṃ pravṛttas tathā yūyam api pravartadhvam iti vyavasthitam // (22) Par.?

yathā caitad indrasyomāpatinā upadiṣṭaṃ tadgranthaparisamāptau yady api granthe evāsti tathāpi vyākhyānopakrame sambandhāder avaśyābhidheyatvāt kiṃcid ucyate // (23) Par.?

kadācid atiruciraratnaprakaravinicitakanakamayakamanīyamahītalamanoharasaptamajaladhitaṭaviharaṇahevākinaṃ nīlopalatviṣaṃ caturbhujaṃ dvikaṃdharādharaṃ mukhadvayena vedādhyayanasurāpānasaṃkarakāriṇam asuranivahaparivṛtaṃ durmadaṃ mahāsuraṃ tridaśapatir apaśyat // (24) Par.?

atha tathāvidhadurācāradarśanajanitakopākulitamunigaṇasahitaḥ śatakratur akṣamamāṇo labdhavaratvāt prasabham astrair avadhyatām asya buddhvā phenenāntarnihitavastreṇa asurasya śirodvayaṃ cicheda // (25) Par.?

tadvyāpādanataś ca brahmahatyājanitam agham āśaṅkamānas tatpraśāntaye bhagavantam acyutaṃ nāmnāṃ sahasreṇa ṛgyajuḥsāmabhiś cāstauṣīt // (26) Par.?

prasannena ca hariṇā navoditabhāsvadbhāsvaraṃ sarvabhūtābhibhāvukaṃ nārasiṃhaṃ kavacaṃ prayacchatā proktam // (27) Par.?

yathaitat saṃnaddhadehas tvam uttarakuruṣu bhagavantaṃ pinākinam ārādhaya varṣasahasrānte ca taṃ dṛṣṭvābhimatam āsādayiṣyasi ity uktvā antarhite surārau sarvaṃ tad indreṇa kṛtam // (28) Par.?

atha pratyakṣībhūte bhagavati pinākini nikhiladuḥkhāntaś cāsya saṃjātaḥ // (29) Par.?

śrīmatkāmikākhyaṃ cāsmai parameśvara upadideśa // (30) Par.?

yataś cendrasya nṛsiṃharūpiṇaḥ samupadiṣṭam idam umāpatinā tato mṛgendrasya śrotṛtvān mṛgendrasaṃjñayā prathitam // (31) Par.?

sambandhas tv atra ṣaṭprakāraḥ parādiḥ // (32) Par.?

tathāhi sargādau parameśvaraḥ ūrdhvaprāgdakṣiṇottarapaścimasrotaḥpañcakabhedabhinnaṃ jñānaṃ svecchānugṛhītavidyeśvarāṣṭakaprabodhanānantaraṃ tad abhivyaktaṃ mantreśvarādibhyo vakṣyamāṇavad ādideśa // (33) Par.?

tathā coktaṃ śrīmatkiraṇe / (34.1) Par.?

sṛṣṭyanantaram eveśaḥ śivān sṛṣṭvā dṛśātmajān / (34.2) Par.?

jñānam ekaṃ vibhajyāśu teṣāṃ tatsaṃkhyayāvadata // (34.3) Par.?

kāmikaṃ praṇavākhyasya śivākhyasya tu yogajam / (35.1) Par.?

ityādi // (35.2) Par.?

atra cātmajān iti ātmanaiva niradhikaraṇenānugraheṇānugṛhītān ity āśayaḥ // (36) Par.?

tebhya umāpatiḥ prāpa tasmāc ca śakraḥ tato 'pi bharadvājaḥ tatsakāśāt tu hārītaḥ // (37) Par.?

sa punaḥ svaśiṣyebhyaḥ prāheti purastāt sarvaṃ spaṣṭīkariṣyāmaḥ // (38) Par.?

abhidheyāś ceha jñānakriyāyogacaryāḥ // (39) Par.?

prayojanaṃ tv atra tattvajñaptiḥ // (40) Par.?

tatprayojanam api bhuktimuktī / (41.1) Par.?

parameśvarasadbhāvaprasādhakapramāṇopanyāsas tadbādhakanirākaraṇaṃ ca yady api tatpraṇītāgamaprāmāṇyasādhanāya prathamam evopayujyate tathāpi śāstrakāreṇaiva agre tad vivecitam atas tatraiva vakṣyāmaḥ // (41.2) Par.?

kevalam etāvad eveha pratijānīmahe // (42) Par.?

yad uktam / (43.1) Par.?

āyurvedāc ca gaṇitān mantravādāc ca sasvarāt / (43.2) Par.?

rasopaniṣadāṭopād āptaḥ sa parigṛhyate // (43.3) Par.?

iti tac cāptatvaṃ sāñjanatvād asarvārthadṛśāṃ darśanāntarapraṇetṝṇāṃ svasvaviṣayam eva nityanirmalaniratiśayasarvārthajñānakriyāśaktes tu sarvadā sarvānugrahapravṛttasya parameśvaratvād eva sarvādhiṣṭhātuḥ sarvaviṣayam // (44) Par.?

evaṃ vividhaviśeṣaṇaviśiṣṭasya vaktur vipralambhakatvāsaṃbhavān nāprāmāṇyam // (45) Par.?

etac ca yathāvasaraṃ vakṣyāmaḥ // (46) Par.?

tad evam īdṛgrūpo bhagavān āgamasya kartā // (47) Par.?

āgamas tu taṃ jñāpayati // (48) Par.?

ataś ca dvayor api visadṛśakriyatvān nātretaretarāśrayadoṣaḥ syāt // (49) Par.?

yathā kaścid evaṃ vakti devadatto 'ham āyāta iti // (50) Par.?

tadvākyaśravaṇāc ca tadanye manyante hanta devadatto 'yam āyāta iti // (51) Par.?

na cātra devadattasya tadvākyasya cetaretarāśrayatvaṃ yuktam // (52) Par.?

tadukteṣu ca dṛṣṭārtheṣu viṣabhūtarasavādādiṣu tadāgamasya phalavattvam upalabhyādṛṣṭārthasyāpi tacchāsanasyāvitathatvam anumīyate ity alam anena prakṛtam anusarāmaḥ // (53) Par.?

tad evaṃ hārītamuniḥ svaśiṣyāṇāṃ jñānopadeśaṃ pratijñāya indrakramāyātatvaṃ darśayitum āha // (54) Par.?