Texts

rājānam utthitam anūttiṣṭhante bhṛtyāḥ // (1.1) Par.?

pramādyantam anupramādyanti // (2.1) Par.?

karmāṇi cāsya bhakṣayanti // (3.1) Par.?

dviṣadbhiścātisaṃdhīyate / (4.1) Par.?

tasmād utthānam ātmanaḥ kurvīta // (4.2) Par.?

nālikābhir ahar aṣṭadhā rātriṃ ca vibhajet chāyāpramāṇena vā // (5.1) Par.?

tripauruṣī pauruṣī caturaṅgulā naṣṭacchāyo madhyāhneti catvāraḥ pūrve divasasyāṣṭabhāgāḥ // (6.1) Par.?

taiḥ paścimā vyākhyātāḥ // (7.1) Par.?

tatra pūrve divasasyāṣṭabhāge rakṣāvidhānam āyavyayau ca śṛṇuyāt // (8.1) Par.?

dvitīye paurajānapadānāṃ kāryāṇi paśyet // (9.1) Par.?

tṛtīye snānabhojanaṃ seveta svādhyāyaṃ ca kurvīta // (10.1) Par.?

caturthe hiraṇyapratigraham adhyakṣāṃśca kurvīta // (11.1) Par.?

pañcame mantripariṣadā pattrasampreṣaṇena mantrayeta cāraguhyabodhanīyāni ca budhyeta // (12.1) Par.?

ṣaṣṭhe svairavihāraṃ mantraṃ vā seveta // (13.1) Par.?

saptame hastyaśvarathāyudhīyān paśyet // (14.1) Par.?

aṣṭame senāpatisakho vikramaṃ cintayet // (15.1) Par.?

pratiṣṭhite 'hani saṃdhyām upāsīta // (16.1) Par.?

prathame rātribhāge gūḍhapuruṣān paśyet // (17.1) Par.?

dvitīye snānabhojanaṃ kurvīta svādhyāyaṃ ca // (18.1) Par.?

tṛtīye tūryaghoṣeṇa saṃviṣṭaścaturthapañcamau śayīta // (19.1) Par.?

ṣaṣṭhe tūryaghoṣeṇa pratibuddhaḥ śāstram itikartavyatāṃ ca cintayet // (20.1) Par.?

saptame mantram adhyāsīta gūḍhapuruṣāṃśca preṣayet // (21.1) Par.?

aṣṭame ṛtvigācāryapurohitasvastyayanāni pratigṛhṇīyāt cikitsakamāhānasikamauhūrtikāṃśca paśyet // (22.1) Par.?

savatsāṃ dhenuṃ vṛṣabhaṃ ca pradakṣiṇīkṛtyopasthānaṃ gacchet // (23.1) Par.?

ātmabalānukūlyena vā niśāharbhāgān pravibhajya kāryāṇi seveta // (24.1) Par.?

upasthānagataḥ kāryārthinām advārāsaṅgaṃ kārayet // (25.1) Par.?

durdarśo hi rājā kāryākāryaviparyāsam āsannaiḥ kāryate // (26.1) Par.?

tena prakṛtikopam arivaśaṃ vā gacchet // (27.1) Par.?

tasmād devatāśramapāṣaṇḍaśrotriyapaśupuṇyasthānānāṃ bālavṛddhavyādhitavyasanyanāthānāṃ strīṇāṃ ca krameṇa kāryāṇi paśyet kāryagauravād ātyayikavaśena vā // (28.1) Par.?

sarvam ātyayikaṃ kāryaṃ śṛṇuyān nātipātayet / (29.1) Par.?

kṛcchrasādhyam atikrāntam asādhyaṃ vāpi jāyate // (29.2) Par.?

agnyagāragataḥ kāryaṃ paśyed vaidyatapasvinām / (30.1) Par.?

purohitācāryasakhaḥ pratyutthāyābhivādya ca // (30.2) Par.?

tapasvināṃ tu kāryāṇi traividyaiḥ saha kārayet / (31.1) Par.?

māyāyogavidāṃ caiva na svayaṃ kopakāraṇāt // (31.2) Par.?

rājño hi vratam utthānaṃ yajñaḥ kāryānuśāsanam / (32.1) Par.?

dakṣiṇā vṛttisāmyaṃ tu dīkṣā tasyābhiṣecanam // (32.2) Par.?

prajāsukhe sukhaṃ rājñaḥ prajānāṃ ca hite hitam / (33.1) Par.?

nātmapriyaṃ hitaṃ rājñaḥ prajānāṃ tu priyaṃ hitam // (33.2) Par.?

tasmān nityotthito rājā kuryād arthānuśāsanam / (34.1) Par.?

arthasya mūlam utthānam anarthasya viparyayaḥ // (34.2) Par.?

anutthāne dhruvo nāśaḥ prāptasyānāgatasya ca / (35.1) Par.?

prāpyate phalam utthānāllabhate cārthasampadam // (35.2) Par.?